1 Jwaloka lehlwa ha le sa tshwanele lehlabula, leha e le pula mohla kotulo, le yona hlompho ha e lokele lehlanya.
2 Jwaloka nonyana ha e fofafofela mona le mane, le lefokotsane ha le okaokela feela, ho jwalo thohako ya lefeela, ha e sebetse letho.
3 Pere e lokelwa ke phafa, le esele ke tomo; mokokotlo wa lehlanya le wona o lokelwa ke thupa.
4 O se ke wa fetola lehlanya ka bohlanya ba lona, esere mohlomong le wena wa tshwana le lona.
5 O fetole lehlanya ka tsa bohlanya ba lona, esere mohlomong la ipona bohlale mahlong a lona.
6 Ya romelang ditaba ka lehlanya o ikgaola maoto, o inwella tshenyo.
7 Jwalokaha maoto a sehole a leketla feela, polelo ya bohlale e jwalo melomong ya mahlanya.
8 Ho rorisa lehlanya ke ho tlamella lejwana ka letjeketjaneng.
9 Polelo ya bohlale molomong wa lehlanya e jwaloka meutlwa letsohong la letahwa.
10 Motho ya tholang lehlanya le basebi, o jwaloka mohlabani ya hlabang bohle.
11 Jwaloka ha ntja e boela mahlatseng a yona, lewatla le boela jwalo bowatleng ba lona.
12 Ana o bone motho ya iponang bohlale? Lehlanya le tshepisa ho fetisa eo.
13 Sekgoba se re: Tau e rorang e teng tseleng, tau e bohale e mabaleng.
14 Lemati la monyako le iphetola mahokelong a lona, le motswafi diphateng tsa hae.
15 Sekgoba se isa letsoho ho ngwatha lefisong; empa se tswafa ho le busetsa molomong.
16 Sekgoba se ipona bohlale ho fetisa ba supileng ba arabang ka masene.
17 Mofetakatsela ya kenang komang tsa ba bang ka bohale, o tshwara ntja ka ditsebe.
18 Ya thetsang wa habo o tshwana le motho ya soro, ya betsang dirumula le metsu le lefu,
19 a re: Na ke ne ke sa bapale na?
20 Mollo o tima ke ho hlokeha ha patsi; ho jwalo dikomang, di fela ha mosebi a le siyo.
21 Mashala a matsho a etsa mashala a hlenneng, patsi e hotetsa mollo; ho jwalo motho ya dikomang, o tukisa dikgang.
22 Dipolelo tsa mosebi di ka dijo tse hlabosang, di kena di tebela hare ka maleng.
23 Melomo e tukang le pelo e mpe, di jwaloka lelwapi la silefera le manehilweng hodima pitsa ya letsopa.
24 Ya hloyang o ikgakanya ka melomo ya hae, mme ka pelong o rera thetso;
25 leha a bua ka mosa, o se ke wa kgolwa ke yena, hobane manyala a supileng a ka pelong ho yena.
26 Hloyo e ipata ho ikgakanyeng, empa bolotsana ba yona bo tla senolwa pitsong.
27 Ya tjhekang lemena o tla wela teng, mme lejwe le tla boela hodima ya le thetang.
28 Leleme le leshano le hloile ba hlabilweng ke lona, mme molomo o qekisang o hlahisa tshenyeho.