1 Motho ya ikgethang ho ba bang o batla ho ikgahlisa yena a nnotshi; kgalefong ya hae o soma tsohle tsa bohlale.
2 Se kgahlisang lehlanya hase ho rua hlalefo, empa e le ho hlahatsa se ka pelong ya lona.
3 Ha ho hlaha sesenyi, se hlaha le nyediso, mme dihlong le tsona di tla le ho nyatseha.
4 Dipolelo tsa molomo wa motho di ka kwetsa, mme mohlodi wa bohlale ke noka e phallang.
5 Ha ho hotle ho emela tshobotsi ya moetsadibe, leha e le ho tswa ya lokileng nyeweng ya hae.
6 Melomo ya sethoto e se kenya diphapang, leleme la sona le mema melamu.
7 Molomo wa lehlanya ke tshenyeho ya lona, leleme la lona ke sefi ho moya wa lona.
8 Dipolelo tsa mosebi di jwaloka dijo tse hlabosang, mme di kena ka mpeng kahare.
9 Ya tshwarang mosebetsi wa hae ka monyebe, ke ngwanabo lehlaswa.
10 Lebitso la Jehova ke qhobosheane e thata; ya lokileng o balehela ho yona, mme o dula phahameng.
11 Leruo la morui ho yena ke qhobosheane, mahlong a hae ke lerako la setshabelo.
12 Tshenyeho ha e tla hlaha, pelo ya motho e ye e ikgohomose, empa boikokobetso bo etella hlompho pele.
13 Ya arabang a eso ho utlwe, o bontsha bothoto ba hae, o ipakela dihlong.
14 Pelo e jarisa motho ho baba ha hae; empa pelo e robehileng e ka tsoswa ke mang?
15 Pelo ya motho ya nang le kelello e rua tsebo, tsebe tsa ba bohlale di sela yona.
16 Mpho ya motho e mo etsetsa sebaka, e mo atametsa pela ba baholo.
17 Ya buang pele ha ho tsekwa, taba tsa hae di lokile, empa e mong ha a hlaha, o a mo tsietsa.
18 Lotho e fedisa dikgang, e arola le tsa ba baholo.
19 Ngwanabo motho, ha a hlabehile, o thata ho feta motse o qhobosheane; diphapang tsa bona di ba jwaloka mekwallo e kwallang matlo a borena.
20 Mpa ya motho e kgora ditholwana tsa leleme la hae, motho o kgodiswa ke tse hlahiswang ke molomo wa hae.
21 Lefu le bophelo di matleng a leleme; ba le ratang ba tla ja tholwana tsa lona.
22 Ya fumaneng mosadi wa sebele o fumane lehlohonolo, o filwe mpho ya mohau ke Jehova.
23 Mofutsana o bua a rapela, empa morui o araba ka thata.
24 Motho ya nang le metswalle e mengata ho yena ke tshenyehelo, empa mohlomong motswalle e mong o a kgomarele motho ho fetisa ngwanabo motho.