1 Veine ke mosomi, jwala bo lerata; bohle ba kgeloswang ke bona ha ba na bohlale.
2 Bohale ba morena bo tshabeha jwaloka tau ha e puruma; ya mo halefisang o itshitelwa moya wa hae.
3 Ke thoriso ho motho ho intsha tsekong; empa lehlanya le phehella ho yona.
4 Sekgoba ha se leme, hoba se hatsetse; mohla ho kotulwang, se a kopa, empa ha ho letho.
5 Morero pelong ya motho e ka koetsa, ya nang le kelello o ya kga teng.
6 Ba ipolelang molemo ba bangata, empa motho ya tshepehang a ka fumanwa ke mang?
7 Ha motho a lokile, mme a tsamaya ho lokeng, ho lehlohonolo bana ba hae ba mo latelang!
8 Morena ya dutseng tulo ya kahlolo o fedisa bobe bohle ka mahlo a hae.
9 Ke mang ya ka reng: Ke itlhwekisitse pelo, ke hlatswehile bobe ba ka?
10 Diponto tse pedi tsa ho lekanya tse fapaneng, le diefa tse pedi tse fapaneng, ke manyala ho Jehova.
11 Esita le moshanyana o itsebahatsa ka diketso tsa hae, ha metsamao ya hae e tla ba metle, e loke.
12 Tsebe e utlwang le leihlo le bonang, Jehova o di entse tse pedi.
13 Se rate boroko, esere mohlomong wa fumaneha; phaphama, o tutubolohe, mme o tla kgora bohobe.
14 E mpe! e mpe! ho bolela moreki; ebe o a ikela, a ntse a ithorisa.
15 Kgauta e teng, le diperela tse ngata, empa ntho e theko e thata ke melomo e rutehileng.
16 Mo amoheng kobo, etswe a itlamile ho lefela e mong; o mo tlame bakeng sa osele.
17 Bohobe ba thetso bo ye bo hlabosehe ho motho, empa hamorao molomo wa hae o ye o tlale lehlohlojane.
18 Merero e tiiswa ke keletsano; ka baka leo, o rere ntwa ka ho nahanisisa.
19 Mosebi ya tsamayang a seba, o phunya makunutu; ha ho le jwalo, tshaba ho tlwaelana le ya ntseng a ahlamisa melomo ya hae.
20 Ya rohakang ntatae le mmae, lebone la hae le tla tima lefifing.
21 Lefa ha le le manyala ho qaleng, le ke ke la hlohonolofatswa qetellong.
22 Se re: Ke tla busetsa bobe ka bobe. Tshepa Jehova, ke yena ya tla o boloka.
23 Ponto tsa ho lekanya tse pedi tse fapaneng ke manyala ho Jehova, le sekala sa thetso ha se setle.
24 Maoto a motho a laelwa ke Jehova; ha ho le jwalo, ke mang motho ya ka utlwisisang tsela ya hae?
25 Ke leraba ho motho ho kgethela Modimo ntho ka potlako, le ho belaela ha ho se ho annwe.
26 Morena ya bohlale o hlokola baetsadibe, mme o ba pola ka sepolo.
27 Moya wa motho ke lebone la Jehova, o batlisisa tse tebileng ka ho yena.
28 Mohau le nnete di tiisa morena, ka mohau wa hae o tiisa terone ya hae.
29 Kganya ya ba batjha ke matla a bona, mokgabo wa maqheku ke moriri o moputswa.
30 Maqeba a phekola moetsadibe, le tsona dikotlo tse mo kenang le maleng hare.