1 Merero ya pelo ke ya motho; haele ho bua he leleme, ho taelong ya Jehova.
2 Mekgwa yohle ya motho e lokile mahlong a hae; empa Jehova o lekanya meya.
3 O rolele ditaba tsa hao tsohle ho Jehova, mme merero ya hao e tla tiya.
4 Jehova o etseditse dintho tsohle merero ya tsona; e, esita le e mobe, o etseditswe letsatsi la tlokotsi.
5 Motho ka mong ya ikgohomosang ka pelong, ke manyala ho Jehova, ruri o tla otlwa, a ke ke a phonyoha.
6 Makgopo a phekolwa ke mohau le nnete, mme ke ka ho tshaba Jehova batho ba phemang bobe.
7 Jehova ha a kgahlwa ke ho tsamaya ha motho, o boelantsha dira tsa hae le yena.
8 Leruo le lenyenyane le nang le ho loka, le molemo ho feta menono e mengata e nang le bokgopo.
9 Pelo ya motho e itherela tsela, empa ke Jehova ya tsamaisang maoto.
10 Molomo wa morena o bolela ditaba tsa nnete, ha a ahlola a ke ke a fosa.
11 Ditekanyo le sekala se lokileng ke tsa Jehova, tsohle tse lekanyang tse mokotleng ke mosebetsi wa hae.
12 Ho marena ho etsa ho sa lokang ho manyala, hobane setulo sa borena se tiiswa ke ho loka.
13 Marena a kgahliswa ke melomo e metle, a rata ba buang ka ho loka.
14 Kgalefo ya morena e jwaloka lenqosa la lefu, empa motho ya bohlale o tla e thoba.
15 Ho ela ha sefahleho sa morena ke bophelo, lerato la hae ke leru le nesang pula ya hwetla.
16 Ho rua bohlale ho fetisa ho rua kgauta e hlwekileng hakakang! le ho rua masene ho feta ho rua silefera hakakang!
17 Mmila wa ba lokileng ke ho nena bobe, ya elang metsamao ya hae hloko o boloka moya wa hae.
18 Boikgohomoso bo etella timelo pele, boikgantsho bo isa ho weng.
19 Ho kokobetswa le ba banyenyane ho molemo ho ena le ho ja kgapo le baikgohomosi.
20 Ya hloko ditabeng o tla bona molemo, ho lehlohonolo ya tshepang Jehova.
21 Ya pelo e hlalefileng o bitswa ya maele, mme molomo wa hae o monate o atisa tsebo.
22 Masene ke sediba sa bophelo ho ba a ruileng, empa kotlo ya dithoto ke bowatla.
23 Pelo ya motho ya bohlale e nepisa molomo wa hae hlalefong, e hlophisa dipuo tsa hae ka thuto.
24 Puo tse ntle ke lekgeha la dinotshi, di monate moyeng wa motho, di matlafatsa masapo a hae.
25 Mohlomong ho motho tsela e nngwe eka e sasametse, athe phello ya yona ke lefu.
26 Ho lapa ha motho ya sebetsang ho a mo thusa; ke molomo wa hae o mo kgannang.
27 Motho wa lefeela o tjheka lemena la bobe, melomo ya hae e na le kgabo e tjhesang.
28 Motho ya diteme o jala diphapang, mosebi o hlobohanya metswalle.
29 Motho ya soro o hoka eo a tsamaisanang le yena, o mo hulela tseleng e sa lokang.
30 Ya tutubalang mahlo o rera tshenyo, ya fupang melomo o sebetsa bobe.
31 Moriri o moputswa, ha o fumanwa tseleng ya ho loka, ke mokgabo wa hlompho.
32 Ya diehang ho halefa o fetisa mohale; ya hlolang pelo ya hae o fetisa ya hapang metse.
33 Lotho e pjatlanngwa kobong; empa se bolelwang ke yona se tsejwa ke Jehova feela.