1 Mora wa ka, etlere ha o amohela ditaba tsa ka, mme o ipolokela melao ya me ka ho wena,
2 o e sekehela tsebe, mme o lebisa pelo ya hao kutlwisisong,
3 ke re, ha o ka bitsa masene, wa howeletsa kutlwisiso,
4 wa e batla jwaloka silefera, wa e rafa jwaloka matlotlo a patilweng mobung;
5 ke moo o tla tseba ho tshaba Jehova, o fihlele tsebo ya Modimo;
6 hobane Jehova ke yena ya fanang ka bohlale; tsebo le kutlwisiso di tswa molomong wa hae.
7 O bolokela ba lokileng poloko, ke thebe ho ba tsamayang ka ho loka.
8 O lebela mmila wa ho loka, o disa tsela ya bakgehtwa ba hae.
9 Jwale, o tla tseba ho loka le tshwanelo le bokgabane le mekgwa yohle e molemo.
10 Hobane bohlale bo tla kena pelong ya hao, tsebo e kgahlise moya wa hao;
11 masene a o lebele, kutlwisiso e o boloke;
12 ho o phemisa tsela ya bobe, ho o kelosa ho bao ba buang tse kgopo,
13 ba furaletseng tsela ya ho loka, ba tsamayang ka tsela ya lefifi,
14 ba thabelang bolotsana, ba iketekang ka diketso tse mpe;
15 bao ditsela tsa bona di kgelohileng, le metsamao ya bona e kgopameng;
16 o tle o namolelwe mosading wa letekatsi, mosading wa letekatsi, mosading wa seotswa ya qekisang ka dipolelo tsa hae,
17 ya furaletseng motswalle wa botjha ba hae, mme a lebetse selekane sa Modimo wa hae.
18 Ruri, ntlo ya hae e sekametse lefung, tsela tsa hae di isa bafung.
19 Ho ba yang ho yena, ha a yo ya kgutlang le ho boela a nka tsela ya bophelo.
20 Ka baka leo, tsamaya ka mehlala ya batho ba molemo, u tiisetse tseleng ya ba lokileng;
21 hobane ba lokileng ba tla aha lefatsheng; ba hlwekileng ba tla le rua.
22 Empa ba babe ba tla kgaolwa hodima lefatshe, ba lonya ba fotholwe ho lona.