1 Ho monate ho ja phate feela moo kgotso e leng teng, ho ena le ho dula tlung e tletseng dinama, moo dikomang di leng teng.
2 Mohlanka ya bohlale o tla busa mora e mobe wa monga hae, a je lefa hammoho le bara ba monga hae.
3 Silefera e qhibidiswa pitseng ya lesehla, kgauta e bediswa seboping; empa ya lekang dipelo ke Jehova.
4 Motho e mobe o theeletsa melomo e kgopo tsebe; leleme le sebang le mamelwa ke ya leshano.
5 Ya tshehang mofutsana o soma Ya mmopileng, ya tlakang ditlokotsi tsa ba bang a ke ke a phonyoha kotlong.
6 Ditloholo ke moqhaka wa maqheku, mme kganya ya bana ke batswadi ba bona.
7 Dipuo tsa maele ha di roneha ho motho ya mabela, tse mano tsona di roneha hakakang ho ba baholo!
8 Mpho ke lehakwe la bohlokwa ho ya e newang; hohle moo e kenang, e a hlola.
9 Ya apesang molato o batla lerato; empa ya phunyang makunutu o fapanya batho ba ratanang.
10 Motho ya kelello o utlwa kgalemelo, ho feta lehlanya ha le shapuwa ha lekgolo.
11 Ya lonya o pheheletse boikgantsho feela, empa o tla romelwa lenqosa le lonya.
12 Ho molemo ho kgahlana le tau e nketsweng bana, ho fetisa ho kgahlana le lehlanya bohlanyeng ba lona.
13 Ya busetsang botle ka bobe, bosoto bo ke ke ba tloha tlung ya hae.
14 Ho qala phapang ke ho phunya metsi; ka baka leo, kgang ha e eso ho hotele, o e tlohele.
15 Ya hlatswang motho ya melato, le ya tswang motho ya se nang molato, ba babedi ba manyala ho Jehova.
16 Tsa ho reka letsohong la sethoto di sebetsang na? Na ke ho reka bohlale na? Empa se hloka pelo.
17 Motswalle wa motho o mo rata kamehla; e ba ngwanabo tlokotsing ya hae.
18 Ya se nang kelello ke ya phathatsanang le e mong ka letsoho; o itlama ka molato wa wa habo.
19 Ya ratang komang o rata tshenyeho; ya hodisang monyako wa hae o batla dithako.
20 Ya pelo e kgopo a ke ke a fumana lehlohonolo, mme ya leleme le kgopameng o tla wela bobeng.
21 Ya tswalang lehlanya o rua maswabi; ntata lehlaswa a ke ke a thaba ka lona.
22 Pelo e thabileng ke sehlare se matlafatsang; athe moya o hlomohileng o omeletsa masapo.
23 E mobe o amohela mpho e patilweng dikobong, ho sokamisa tsela ya ho loka.
24 Ya kelello o qamakisisa bohlale pela hae, empa mahlo a lehlanya a tjhalakela pheletsong tsa lefatshe.
25 Ngwana ya se nang taba o tena ntatae, mme o babisa ya mmelehileng.
26 Ho lefisa motho ya se nang molato, ha ho a loka, leha e le ho otla ba baholo ka baka la ho loka ha bona.
27 Ya itshwarang dipuong o tseba hlalefo, mme ya pelo e ikgutseditseng o na le kutlwisiso.
28 Esita le lehlanya ha le kgutsa, le ka bitswa ya bohlale; ya itomang melomo ke motho ya kelello.