22 Ha o tsamaya, di tla o tsamaisa; leha o robetse, di tla o lebela; etlare ha o tsoha borokong, di o buise.
23 Hobane keletso ke lebone, thuto ke lesedi, mme dikgalemelo tsa tayo ke tsela ya bophelo;
24 ho o phemisa mosadi wa seotswa le leleme le lekang la mosadi ya lelerang.
25 O se ke wa lesa pelo ya hao ya duma bokgabane ba hae, o se ke wa hapuwa ke tjhadimo ya mahlo a hae.
26 Hobane mosadi wa seotswa o fumanehisa motho, a be a sallwe ke sengwathwana sa bohobe feela, mme letekatsi le tsoma ho phela ha motho ya qenehelwang.
27 Ana motho a ka ikokgella mollo sefubeng, diaparo tsa hae di sa tjhe na?
28 Hleka motho a ka hata mashala a hlenneng, maoto a hae a sa tlabohe na?