1 Lentswe la Jehova la boela la ntlela, la re:
2 Mora motho, o ahile hara ntlo ya bahanyetsi, etswe ba ena le mahlo a ho bona, ba mpa ba sa bone, mme ba na le ditsebe tsa ho utlwa, ba mpa ba sa utlwe; efela ke ntlo ya bahanyetsi.
3 Haele wena, mora motho, o tle o iketsetse thoto e kang ya mofalli, o tlohe motshehare pela mahlo a bona, jwaloka hoja o falla: o fele o tlohe pela mahlo a bona, nqalong eo o leng ho yona, ho ya ho e nngwe nqalo; ekaba ba tla nahana hoba efela ke ntlo ya bahanyetsi.
4 O tle o ntshetse thoto ya hao ntle, motshehare, pela mahlo a bona, jwalokaha ho ntshwa thoto ya mofalli; mantsiboya, pela mahlo a bona, o tswele ntle, ka mokgwa oo bafalli ba tswang ka wona.
5 O tle o phunye lerako pela mahlo a bona, o ntshetse thoto ya hao ntle ka lesoba leo.
6 O tla inkela yona lehetleng pela mahlo a bona, o e ntshetse ntle ka shwalane; o ikgurumetse sefahleho, o tle o se ke wa bona lefatshe; hobane ke o beetse ntlo ya Iseraele ka mokgwa wa setshwantsho.
7 Ka etsa jwalo, kamoo a ntaetseng kateng. Motshehare, ka ntshetsa thoto ya ka kantle, jwalokaha ho ntshwa thoto ya mofalli; mantsiboya, ka phunya lerako ka matsoho a ka. Eitse ka shwalane, ka e ntshetsa ntle, mme ka e jara ka mahetla pela mahlo a bona.
8 Ka hosasa, lentswe la Jehova la ntlela, la re:
9 Mora motho, ha ke re, ba ntlo ya Iseraele, e leng ntlo ya bahanyetsi, ba itse ho wena: O etsang?
10 Ere ho bona: Morena Jehova o re: Boporofeta boo bo supa morena wa Jerusalema le bohle ba ntlo ya Iseraele ba leng hona teng.
11 Ere: Ke nna setshwantsho sa lona. Ba tla etsetswa jwalokaha ke entse; ba tla falla, ba ye kgolehong.
12 Esita le morena ya leng hara bona, o tla jara thoto lehetleng, ka shwalane, a tswele ntle a le jwalo. Lerako le tla phunngwa ho mo ntshetsa ntle; o tla ikgurumetsa sefahleho, hore a se ke a bona lefatshe ka mahlo.
13 Ke tla ala letlowa la ka hodima hae, a tshwaswe sefing sa ka, ke tle ke mo ise Babilona, naheng ya Bakalde; empa a ke ke a e bona, mme o tla shwela hona teng.
14 Haele bohle ba mo teetseng hare, le metlatsetsa ya hae, le makgotla a hae, ke tla ba qhalanyetsa meyeng yohle, ke ba phallele ke tsomotse lerumo.
15 Mme ba tla tseba hoba ke nna Jehova, mohla ke ba lelekelang ditjhabeng, ke ba qhalanyetsang dinaheng tsohle.
16 Ke mpa ke tla phonyosa batho ba seng bakae ba bona lerumong le tlaleng le lefung la sewa, hore ba tle ba qaqise manyala wohle a bona ditjhabeng tseo ba fihletseng ho tsona, mme ba tla tseba hoba ke nna Jehova.
17 Lentswe la Jehova la boela la ntlela, la re:
18 Mora motho, ja bohobe ba hao ka thothomelo, o nwe metsi a hao ka ho thekesela le ka tshabo;
19 mme o re ho setjhaba sa lefatshe lena: Haele ba ahileng Jerusalema, naheng ya Iseraele, Morena Jehova o ba bolela ka ho re: Ba tla ja bohobe ba bona ka tshabo, ba nwe metsi a bona ka ho makala, hobane naha e tla senngwa, e hloke tsohle tsa yona, ka baka la bothata ba ba ahileng ho yona.
20 Metse e hahilweng e tla timeletswa, naha e senngwe, le tle le tsebe hoba ke nna Jehova.
21 Lentswe la Jehova la boela la ntlela, la re:
22 Mora motho, polelo ke efe eo le nang le yona naheng ya Iseraele, ha le re: Matsatsi a ntse a eketseha, empa pono e nngwe le e nngwe ya mohlolo e a timela?
23 Ha ho le jwalo, ere ho bona: Morena Jehova o re: Ke tla kgaoletsa polelo eo, e tle e se ke ya nna ya phetwa Iseraeleng. O mpe o re ho bona: Matsatsi a ntse a atamela, le yona ketsahatso ya pono e nngwe le e nngwe ya mohlolo;
24 hobane ho ke ke ha eba pono e nngwe ya mohlolo e tlang ho ba lefeela, leha e le boporofeta ba leshano tlung ya Iseraele, hobane ke nna Jehova.
25 Ntswe lefe kapa lefe leo ke le buileng, ntswe leo le tla phethahala, ha le sa tla diehiswa. Hobane ke mehleng ya lona, lona ba ntlo ya bahanyetsi, ke tlang ho bua lentswe le itseng, mme ke tla le etsahatsa: ho rialo Morena Jehova.
26 Lentswe la Jehova la boela la ntlela, la re:
27 Mora motho, bona, ba ntlo ya Iseraele ba re: Pono eo a e bonang ke e tla hlaha kamora matsatsi a mangata; o porofeta tsa mehla e hole.
28 Ha ho le jwalo, ere ho bona: Morena Jehova o re: Ha ho sa tla ba lentswe leha le le leng la ka le sa tla diehiswa; lentswe leo ke le buang, le mpa le tla etsahala: ho rialo Morena Jehova.