1 Jwale, wena mora motho, o tle o inkele tshepe e bohale, o nke lehare la mmeodi, o ipeole hlooho le ditedu; o ntoo nka sekala sa ho lekanya, o arole moriri.
2 O tle o tjhese boraro ba wona mollong, hara motse, ha ho se ho phethehile ditshiu tsa thibello; o boele o nke boraro ba wona, o bo hlabe ka lerumo, o ntse o pota motse; boraro bo bong ba wona o bo akgele moyeng, ke tle ke bo phallele ke tsomotse lerumo.
3 Moriring oo, o tla nka qoba di se kae, o tla di tlamella melekeng ya kobo ya hao;
4 o boele o nke qoba tse ding tsa tseo, o di lahlele mollong, o be o di tjhese mollong. Moo ho tla tswa mollo o tla tjhesa ntlo yohle ya Iseraele.
5 Morena Jehova o re: Suna Jerusalema! Ke ne ke mmeile hara ditjhaba, ke beile mafatshe a mang ho mo teela hare;
6 empa o entse bokgopo, o ikgantsheditse ditaelo tsa ka ho feta ditjhaba tsa bahedene, o ikgantsheditse le dikomelo tsa ka ho feta dinaha tse mo teetseng hare, hobane ba lahlile ditaelo tsa ka, mme ha ba ka ba tsamaya ka dikomelo tsa ka.
7 Ke kahoo Morena Jehova a reng: Erekaha le sentse ho feta ditjhaba tsa bahedene tse le teetseng hare, le sa ka la tsamaya ka dikomelo tsa ka, le ho etsa ka ditaelo tsa ka, le ho etsa le ka ditaelo tsa ditjhaba tse le teetseng hare,
8 ka baka leo, Jehova o re: Bona, le nna ke se ke ya tla ho o lwantsha, ke hlahise dikahlolo tsa ka ha hao pontsheng ya ditjhaba.
9 Ke tla etsa ha hao seo ke esong ho se etse kae le kae, le seo nke keng ka hlola ke etsa se sekalo kae le kae, ka baka la manyala wohle a hao.
10 Ha ho le jwalo, hona ha hao ba nang le bana ba tla ja bara ba bona, bara ba je bontata bona, mme ke tla o hlahisetsa dikahlolo, ke qhalanyetse masala wohle a hao ka nqa tsohle.
11 Ke hona Morena Jehova a reng: Ka nna ya phelang, erekaha o silafaditse sehalalelo sa ka ka tsohle tsa hao tseo ke di ilang le ka manyala wohle a hao, le nna ke tla o kgaola, leihlo la ka le sa o qenehele, ke sa o hauhele le hanyenyane.
12 Boraro ba lona bo tla shwa ke lefu la sewa, kapa bo timele ke tlala hona ha eno; boraro bo bong bo tla dihuwa ke lerumo mathokong a hao; mme boraro bo bong ke tla bo qhalanyetsa ka nqa tsohle, ke bo phallele ke tsomotse lerumo.
13 Bohale ba ka bo tla phethahala, ke tla ba imetsa ka kgalefo ya ka, ke tle ke iphetetse; ba tle ba tsebe hoba ke nna Jehova ke buileng poulelong ya ka, mohla ke phethang kgalefo ya ka ho bona.
14 Ke tla o etsa dithako, ke o etse le sekgobo hara ditjhaba tse o teetseng hare, pontsheng ya bohle ba fetang ka tsela.
15 Hoo e tla ba sekgobo le nyediso, thuto le makatso pontsheng ya ditjhaba tse o teetseng hare, mohla ke o hlahisetsang dikahlolo ka bohale, le ka kgalefo, le ka dikgalemelo tse bohloko. Ke nna Jehova ke buang taba tsena.
16 Ke mohla ke tla ba romela metsu e mebe ya tlala e timetsang, eo ke tla e romela ho le timetsa ka yona; le mohla ke tla le bokellela tlala, ke robe le kotlo ya bohobe,
17 ke le romele le tlala le dilalome tse mpe tse tla le hlokisa bana; le mohla lefu la sewa le madi di tla tsamaya ha hao, ke o tlisetse lerumo. Ke nna Jehova ke buang jwalo!