1 Morena Jehova o re: Monyako wa lebala le kahare, o tadimileng ka nqa botjhabela, o tla kwalwa ka matsatsi a tsheletseng a ho sebetsa; empa ka tsatsi la Sabatha, o tla bulwa; o tla bulwa le ka letsatsi la kgwedi ha e thwasa.
2 Morena o tla tla ka tsela ya mathule a monyako, ka nqa kantle, a eme pela dikosene tsa monyako; baprista ba tla hlaba setjheso sa hae le mahlabelo a hae a teboho; o tla kgumama mohatong wa monyako, a ntoo tswela ntle; mme monyako o se ke wa kwalwa ho isa mantsiboya.
3 Setjhaba sa lefatshe se tla kgumama pela monyako oo ka Disabatha, leha e le ha kgwedi e thwasitse, pela Jehova.
4 Setjheso se tla hlahiswa ke morena pela Jehova ka tsatsi la Sabatha e tla ba dikonyana tse tsheletseng tse hlokang sekodi, le pheleu e se nang sekodi.
5 Nyehelo e be efa ka pheleu; haele bakeng sa dikonyana, nyehelo e tla ba seo letsoho la hae le ka se ntshang; haele ole, a ntshe hine ka efa.
6 Tsatsing la kgwedi ha e thwasa, e tla ba pohwana e se nang sekodi, le dikonyana tse tsheletseng le pheleu; e tla ba tse se nang sekodi.
7 Haele nyehelo ya hae, o tla hlahisa efa ka poho, le efa ka pheleu; haele ka dikonyana, o tla ntsha kamoo a ka ntshang kateng; haele ole, o tla ntsha hine ka efa.
8 Etlere ha morena a kena, a kene ka tsela ya mathule a monyako, mme a boele a tswe ka yona tsela eo.
9 Haele setjhaba, ha se etla pela Jehova ka diphutheho tse mahlonoko tsa sona, ya tla kena ka tsela ya monyako o ka nqa leboya ho tla kgumama, o tla tswa ka tsela ya monyako o ka nqa borwa; mme ya tla kena ka tsela ya monyako o ka nqa borwa, o tla tswa ka tsela ya monyako o ka nqa leboya; ba se ke ba kgutla ka tsela ya monyako oo ba keneng ka wona, ba mpe ba tswe ka monyako o leng maloka le bona;
10 ha ba kena, morena o tla kena le bona, ha ba etswa, ba tle ba tswe hammoho.
11 Meketeng le diphuthehong tse mnahlonoko, nyehelo e tla ba efa ka poho, le efa ka pheleu; haele dikonyana, a ntshe seo a se ratang; ole yona ho ntshuwe hine e le nngwe ka efa.
12 Etlere ha morena a etsa sehlabelo ka ho rata, kapa e leng setjheso, kapa e leng sehlabelo sa teboho, ho se etsetsa Jehova, e le sehlabelo sa ho rata, a ke a bulelwe monyako o tadimileng botjhabela, mme setjheso sa hae, kapa sehlabelo sa hae sa teboho, se etswe jwalokaha ho etswa ka letsatsi la Sabatha; a ntoo tswa, mme monyako o kwalwe, ha a tswile.
13 Ka letsatsi le leng le le leng, o tla hlabela Jehova sehlabelo sa setjheso sa konyana e se nang sekodi, e lemo se le seng; o tla se etsa ka hosasa ho hong le ho hong.
14 Hape, nyehelo eo o tla e hlahisa hammoho le konyana eo, ka hosasa ho hong le ho hong, e tla ba karolo ya botshelela ya efa; ole yona, o tla nka karolo ya boraro ya hine ya yona ho kolobisa phofo ya nyehelo ka yona. Ke nyehelo ya Jehova; ke taelo le komelo e sa feleng; e nne e be teng.
15 Konyana e tla hlajwa jwalo ka hosasa ho hong le ho hong; ho jwalo le nyehelo le ole. Ke setjheso se sa feleng.
16 Morena Jehova o re: Etlare ha morena a nea e mong wa bara ba hae mpho, ke lefa la hae leo a le neang bara ba hae; e tla ba leruo la bona ka mokgwa wa lefa.
17 Empa ha a etsa neo ka ntho e nngwe ya lefa la hae ho e mong wa bafo ba hae, e tla ba ya hae mofo ho isa selemong sa tokoloho, e ntoo kgutlela ho morena. Lefa la hae ke la bara ba hae ba nnotshi.
18 Morena a se ke a nka letho mafeng a setjhaba, ka ho ba leleka ho tseo ba di ruileng. O tla nka tseo a di ruileng ho etsa lefa la bara ba hae, hore bo se ke ha eba motho setjhabeng sa ka ya lelekwang ho tseo a di ruileng.
19 Yaba o nkenya ka tsela e kathoko ho monyako dikamoreng tsa sehalalelo tseo e leng tsa baprista, tse tadimileng ka nqa leboya; mme teng ka bona nqalo e nngwe ka motseo, ka nqa bophirimela.
20 A re ho nna: Ke ena nqalo moo baprista ba tla pheha nama ya mahlabelo a molato le a sebe; ba tla pheha dinyehelo, ba se ke ba di isa kantle lebaleng le kantle, hore ba se ke ba halaletsa setjhaba ka tsona.
21 Yaba o nntshetsa lebaleng le kantle, a nkisa dikoung tse nne tsa lebala, mme ka bona ho na la lebala koung e nngwe le e nngwe ya lebala.
22 Koung e nngwe le e nngwe ho na le mabala a haheleditsweng, a bolelele bo ditswe tse mashome a mane le bophara bo ditswe tse mashome a mararo; mabala a mane a entsweng dikoung a le tekanyo e le nngwe.
23 Mola wa meaho o ne o le teng o potang mabala ao, o sikang le wona a mane; dipitsa tsa ho pheha di ne di beilwe tlasa mela eo ka nqa tsohle.
24 Yaba o re ho nna: Ena ke ntlo ya dipitsa tseo ba sebetsang mesebetsi ya ntlo ba tla pheha mahlabelo a setjhaba ka tsona.