1 Yaba o nkenya tempeleng, mme a lekanya ditshiya, di le bophara bo ditswe tse tsheletseng ka kwano, le bophara bo ditswe tse tsheletseng ka kwana, ho lekana le bophara ba tabernakele;
2 bophara ba monyako e ne e le tswe tse leshome, mme mahlakore a monyako e ne e le ditswe tse hlano ka kwano, hape e le ditswe tse hlano ka kwana. A lekanya bolelele ba tempele bo le ditswe tse mashome a mane, le bophara bo le ditswe tse mashome a mabedi.
3 A kena kahare, a lekanya tshiya ya monyako, e le ditswe tse pedi; le monyako, e le tswe tse tsheletseng; le bophara ba monyako, bo le ditswe tse supileng.
4 A lekanya bolelele bo kahare, bo le tswe tse mashome a mabedi, le bophara bo le tswe tse mashome a mabedi, ka pele ho tempele; yaba o re ho nna: Hoo ke sehalaledisiso.
5 Yaba o lekanya lerako la ntlo, le ena le tswe tse tsheletseng, le bophara ba dikamore tse mahlakoreng bo etsa tswe tse nne ka nqa tsohle ho ntlo kaofela.
6 Dikamore tse mahlakoreng di ne di eme e nngwe hodima e nngwe, di le tharo jwalo, di phetwa jwalo ha mashome a mararo; di ne di dutse hodima lerako le neng le sika le ntlo, le etseditswe dikamore tse mahlakoreng, hore di tiye jwalo, leha di ne di sa itshehetse ka lerako la ntlo.
7 Mme tsela e pela dikamore e ne e le sephara hodimo, hobane dikamore tse mahlakoreng di ne di ena le tsela e sikang le ntlo, pela dikamore tsohle; jwale sebaka seo sa tsela se ne se le sephara hodimo, se le sesesane tlase, mme hare se lekane.
8 Mme ka bona hobane ntlo yohle e ne e eme phahameng; metheo ya dikamore tse mahlakoreng e ne e etsa thupa e tletseng, e le ditswe tse tsheletseng.
9 Bophara ba lerako la dikamore tse mahlakoreng, kantle, bo ne bo le tswe tse hlano, ho ntoo ba setupu sa dikamore tse mahlakoreng a ntlo.
10 Mme ho isa dikamoreng tse ding ho ne ho le sebaka se feela se tswe tse mashome a mabedi ho sika le ntlo yohle.
11 Monyako wa dikamore tse mahlakoreng o ne o bulehela setupung, o mong monyako e lebile ka nqa leboya, o mong monyako o lebile ka nqa borwa; bophara ba setupu bo ne bo le tswe tse hlano kahohle.
12 Mme moaho o neng o le pela sebaka se feela ka nqa bophirimela, o ne o le bophara bo tswe tse mashome a supileng; lerako la moaho oo le ne le le bophara bo tswe tse hlano kahohle, bolelele bo le tswe tse mashome a robileng mono o le mong.
13 A ntoo lekanya ntlo, bolelele ya eba tswe tse lekgolo; le sebaka se feela, le moaho, le marako a wona, ya eba bolelele bo tswe tse lekgolo;
14 a lekanya le bophara ba ntlo ka nqa ka pele, le ba sebaka se feela, ka nqa botjhabela, bo le tswe tse lekgolo.
15 Yaba o lekanya botopo ba moaho kapele ho sebaka se feela se kamora wona, le dikgorwana tsa wona, ka kwano le ka kwana, a fumana ditswe tse lekgolo.
16 Tempele e kahare, le mathule a pela lebala, le bohato ba menyako, le difensetere tse kwetsweng, le dikgorwana tse sikang le ntlo hlahlamanong ya tsona se tharo, mabapa le bohato ba menyako, di ne di manehilwe ka dipolanka ka nqa tsohle, le ho tloha fatshe ho isa difensetereng; difensetere tsona di ne di kwahetswe.
17 Baka se hodimo ho monyako, ho tlisa bohareng ba ntlo le kantle ho yona, leboteng lohle la ntlo, kahare le kantle, se ne se kgabisitswe.
18 Mme ho ne ho entswe dikerubime le dipalema; palema e le teng mahareng a dikerubime tse pedi; kerubime e ne e na le difahleho tse pedi;
19 se seng e le sefahleho sa motho, se lebile nqa palemeng e ka kwano, se seng e le sefahleho sa tau, se tadimile nqa palemeng e ka kwana; di entswe jwalo tlung yohle ka nqa tsohle.
20 Ho tloha fatshe ho isa hodimo ho monyako, ho ne ho entswe dikerubime le dipalema leboteng la tempele.
21 Tempele e ne e na le dikosene tse meetse e mene e lekaneng; mme ka pele ho sehalaledisiso ho ne ho na le ntho e kang aletare ya sefate,
22 e nang le bophahamo bo tswe tse tharo, le bolelele bo tswe tse pedi; e ne e na le dintlha tsa yona; boleleleng ba yona le mahlakoreng e ne e le ya sefate. Yaba o re ho nna: Ena ke tafole e pela Jehova.
23 Tempele yona le sehalaledisiso di ne di na le menyako e mmedi.
24 Menyako e ne e na le mamati a mabedi, mamati a bulelwang kahohle; monyako o mong o ne o na le mamati a mabedi, o mong monyako le wona o na le mamati a mabedi.
25 Mamating ao a tempele, ho ne ho entswe dikerubime le dipalema, jwalokaha di ne di entswe maboteng; mme marulelonyana a difate a ne a le kantle pela mathule.
26 Hape mahlakoreng a mathule, le dikamoreng tse mahlakoreng a ntlo, ho ne ho na le difensetere tse kwetsweng, tse nang le marulelonyana, le dipalema ka kwano le ka kwana.