1 Eitse ka selemo sa leshome le metso e mmedi, ka letsatsi la pele la kgwedi, lentswe la Jehova la ntlela, la re:
2 Mora motho, etsa pina ya kodiyamalla ka Faro, morena wa Egepeta, o re ho yena: O ne o tshwana le tau hara ditjhaba; o ne o le jwaloka kwena mawatleng, o thala dinokeng tsa hao, o duka metsi ka maoto a hao, o etsa dinoka tsa heno dikgotlela.
3 Morena Jehova o re: Ke se ke tla ala matlowa a ka hodima hao, phuthehong ya ditjhaba tse ngata, mme di tla o ntsha metsing ke letlowa la ka.
4 Ke tla o tlohela hona teng, fatshe, ke o akgele naheng, ke ahise dinonyana tsohle tsa lehodimo hodima hao, ke kgorise ka wena dibatana tsa lefatshe lohle.
5 Ke tla aneha nama ya hao dithabeng, ke tlatse dikgutlo ka metholo ya hao.
6 Ke tla nosa lefatshe madi a hao, mme a tla le aparela ho fihla dithabeng; dikgutlo di tla tlala wena.
7 Mohla ke o timang, ke tla kwahela mahodimo, ke fifatse dinaledi tsa wona; letsatsi ke tla le kwahela ka leru, mme kgwedi ha e sa tla hlahisa ngwedi ya yona.
8 Masedi wohle a bonesang mahodimong ke tla a fifatsa ka baka la hao, ke bee lefifi naheng ya hao: ho bolela Morena Jehova.
9 Ke tla sisinya dipelo tsa ditjhaba tse ngata, mohla ke fihlisang pehi ya hao ditjhabeng, mafatsheng a sa tsejweng ke wena.
10 Hape, ke tla makatsa matjhaba a mangata ka wena, marena a wona a qhaqhasele ka baka la hao mohla ke nonyang lerumo la ka pontsheng ya wona; a tla thothomela ka dinako tsohle, e mong le e mong bakeng sa bophelo ba hae, mohla letsatsi la ho wa ha hao.
11 Hobane Morena Jehova o re: Lerumo la morena wa Babilona le a o futuhela.
12 Ka marumo a dinatla ke tla diha bongata ba batho ba hao. Ke bona ba leng thata hara ditjhaba; ba tla etsa bokgabane ba Egepeta lesupi, bongata bohle ba batho ba teng bo timetswe.
13 Ke tla fedisa dikgomo tsohle tsa teng pela metsi a maholo; ha a sa tla dukwa ke leoto la motho, ha ho sa tla ba kgomo e a dukang ka tlhako ya yona.
14 Mohlang oo ke tla sekisa metsi a bona, ke mathise dinoka tsa bona jwaloka hoja e le tsa ole, ho bolela Morena Jehova,
15 mohla ke etsang naha ya Egepeta lesupi le lefeella, lefatshe le hlokang tsohle, le mohla ke otlang bohle ba ahileng ho yona, ba tle ba tsebe hoba ke nna Jehova.
16 Ke yona kodiyamalla, mme e tla binwa. Barwetsana ba baditjhaba ba tla bina kodiyamalla eo; ba tla bina kodiyamalla eo ka Egepeta le ka bongata ba batho ba teng: ho bolela Morena Jehova.
17 Eitse ka selemo sa leshome le metso e mmedi, ka la leshome le metso e mehlano la kgwedi, lentswe la Jehova la ntlela, la re:
18 Mora motho, bobola ka bongata ba batho ba Egepeta, o theolele Egepeta le baradi ba ditjhaba tse tumileng lefatsheng le katlase, hammoho le ba theohelang sehokong.
19 Na o feta mang ka botle? Theoha, a robale ho maqai.
20 Ba tla wela hara ba bolawang ke lerumo; ba neilwe lerumo; hulanyang Egepeta le matshwele wohle a teng.
21 Bahale ba hara dinatla ba bua le Egepeta le ba mo tlatsang, ba le nqalong ya bafu; maqai ao a dihilwe; a rapaletse, a bolailwe ke lerumo.
22 Assiria le yena o teng le setjhaba sohle sa hae; o teetswe hare ke mabitla a bona; ba bolailwe kaofela, bohle ba dihilwe ke lerumo.
23 Mabitla a bona a beilwe bodibeng ba sehoko, setjhaba sa hae se teetse lebitla la hae hare; ba bolailwe kaofela, ba dihilwe ke lerumo, e le ba neng ba hasa letsoso lefatsheng la ba utlwang.
24 Elame le yena o teng le bongata bohle ba batho ba hae; ba teetse lebitla la hae hare. Ba bolailwe kaofela, ba dihilwe ke lerumo; ke maqai a theohetseng lefatsheng le katlase, e le ba neng ba hasa letsoso lefatsheng la ba utlwang; jwale, ba jere dihlong tsa bona hammoho le ba theohelang sehokong.
25 O beetswe malao mahareng a ba bolailweng hammoho le bongata bohle ba hae; o teetswe hare ke mabitla a batho ba hae. Kaofela ha bona ke maqai, ba bolailwe ke lerumo, hobane letsoso la bona le ne le hasane lefatsheng la ba utlwang, mme ba jere dihlong tsa bona hammoho le ba theohetseng sehokong; ba beilwe hara ba bolailweng.
26 Mesheke o teng, le yena Tubale, le bongata bohle ba batho ba hae; ba teetswe hare ke mabitla a bona. Bohle ke maqai, ba bolailwe ke lerumo; hobane ba ne ba hasanya letsoso la bona lefatsheng la ba utlwang.
27 Ha ba robale ho bahale ba maqai ba weleng, ba theohetseng nqalong ya bafu ba hlomeletse ntwa, bao marumo a bona a neng a bewe tlasa dihlooho tsa bona; empa makgopo a bona a masapong a bona, hobane e ne e le bona letsoso la bahale lefatsheng la ba utlwang.
28 Le wena, o robilwe mahareng a maqai, o robetse ho ba bolailweng ke lerumo.
29 Edomo o teng, le marena le marenana wohle a hae, a beilweng le ba bolailweng ke lerumo, leha e ne e le bahale. Le bona ba robetse ho maqai le ho ba theohetseng sehokong.
30 Marena wohle a Leboya a teng le wona, le Basidone bohle; ba theohetse sehokong hammoho le ba bolailweng, ba le dihlong, leha e ne e le bao bohale ba bona bo neng bo hasa letsoso la bona; ke maqai a tla robala ho ba bolailweng ke lerumo, ba tla jara dihlong tsa bona hammoho le ba theohetseng sehokong.
31 Mohla Faro a ba bonang, o tla tshediseha bakeng sa bongata bohle ba batho ba hae. Faro le makgotla wohle a hae ba tla bolawa ke lerumo: ho bolela Morena Jehova.
32 Hobane ke hasitse letsoso la hae lefatsheng la ba utlwang; ha ho le jwalo, Faro le bongata bohle ba batho ba hae ba tla robala ho maqai, hammoho le ba bolailweng ke lerumo: ho bolela Morena Jehova.