1 Eitse ka selemo sa leshome le motso o mong, ka kgwedi ya boraro, ka la pele ho kgwedi, lentswe la Jehova la ntlela, la re:
2 Mora motho, ere ho Faro, morena wa Egepeta, le ho bongata ba batho ba hae: O tshwana le mang boholong ba hao?
3 Bona, Assiria e ne e le kedare ya Lebanone, e ntle mahlomeleng a yona, e etsetsang moru moriti, e telele ho holeng ha yona, eo ntlha ya yona e neng e bonahala hara maru.
4 Ya nna ya mediswa ke metsi, dikgohola tsa nna tsa hodisa bophahamo ba yona, ka ho teela nqalo eo e hlomilweng ho yona hare ka diphororo tsa tsona, mme tsa nna tsa fihlisa dikeledi tsa tsona difateng tsohle tse naheng.
5 Ka baka leo, ya nna ya ikgohomosa kamoo e neng e feta difate tsohle tsa naha kateng, ka bolele; mahlomela a yona a nna a ata, makala a yona a nna a hola, hobane e ne e mediswa ke metsi a mangata.
6 Makaleng a yona, dinonyana tsohle tsa tla etsa matlo a tsona, diphoofolo tsohle tsa naha tsa tla tswalla tlasa makala a yona, ha ikahela ditjhaba tsohle moriting wa yona.
7 E ne e le ntle ka boholo ba yona le ka bolelele ba makala a yona, hobane metso ya yona e ne e le pela metsi a mangata.
8 Dikedare tse ding tsa tshimo ya Modimo di ne di sa e fete; dikiprese le tsona di ne di se na ho lekanngwa le makalana a yona, disikomora di ne di sa lekane le makala a yona; ho ne ho se sefate tshimong ya Modimo se neng se tshwana le yona botleng ba yona.
9 Ke ne ke e entse e ntle ka bongata ba makala a yona; difate tsohle tsa Edene, tse tshimong ya Modimo, di ne di le mona ho yona.
10 Ha ho le jwalo, Morena Jehova o itse: Erekaha e iphahamisitse ka boholo ba yona, e bonahaditse ntlha ya yona hara maru, mme pelo ya yona e iphahamisitse boikakasong ba yona,
11 ke tla e neela matsohong a eo e leng senatla hara ditjhaba, hore a etse ka yona kamoo a ratang kateng; ke e lelekisitse ka baka la bokgopo ba yona.
12 Baditjhaba, ba thata hare ditjhaba, ba e remile, ba e tlohetse hona teng; mahlomela a yona a wetse dithabeng le dikgutlong tsohle, makala a yona a robehileng a wetse melapong yohle ya lefatshe, ditjhaba tsohle tsa lefatshe di suthile moriting wa yona, di e tlohetse hona teng.
13 Kutung ya yona e weleng, ho ahile dinonyana tsohle tsa lehodimo, makaleng a yona ho dutse diphoofolo tsohle tsa naha;
14 e le hore difate tsohle tse hlomilweng pela metsi di se ke tsa ikgohomosa ka boholo ba tsona, di se ke tsa bonahatsa dintlha tsa tsona hara maru, mme difate tsohle tse nwang metsi di se ke tsa tiisetsa boikakasong ba tsona; etswe tsohle e le tse neetsweng lefu, hore di theohele lefatsheng le katlase, baneng ba batho, hammoho le ba theohelang sehokong.
15 Morena Jehova o re: Tsatsing la ho theohela ha yona nqalong ya bafu, ke ile ka apesa tsohle ka bofifi; ka kwahela bodiba ka baka la yona, ka thiba dinoka tsa bona, metsi a maholo a emiswa; ka fifatsa Lebanone ka baka la yona, difate tsohle tse naheng tsa fokola ka baka la yona.
16 Ka modumo wa ho wa ha yona ka thothometsa ditjhaba, mohla ke e dihelang nqalong ya bafu hammoho le ba theohelang sehokong; hoo ya eba tshediso lefatsheng le katlase, ho difate tsohle tsa Edene, le ho tse kgethilweng, tse ntle, tsa difate tsa Lebanone, e leng tsohle tse neng di enwa metsi.
17 Le tsona tsa theohela nqalong ya bafu hammoho le yona, ho ba bolailweng ke lerumo, le ho bao e neng e le letsoho la yona, ba neng ba ahile moriting wa yona hara ditjhaba.
18 Oho, o tshwana le mang, ha o le jwalo, ka kganya le ka boholo, hara difate tsa Edene? O tla dihelwa lefatsheng le katlase, hammoho le difate tsa Edene, o rapalatswe hara maqai hammoho le ba bolailweng ke lerumo. Faro o tla dula jwalo hammoho le bongata ba batho ba hae: ho bolela Morena Jehova.