1 Ka selemo sa leshome, ka kgwedi ya leshome, ka letsatsi la leshome le metso e mmedi la kgwedi, lentswe la Jehova la ntlela, la re:
2 Mora motho, o retelletse Faro, morena wa Egepeta, sefahleho sa hao, o porofetele yena le naha yohle ya Egepeta.
3 Bua, o re: Morena Jehova o re: Bona, Faro, morena wa Egepeta, ke tla o futuhela, wena kwena e kgolo e bothileng mahareng a dinoka tsa hao, o reng: Noka ya ka ke ya ka ruri, ke nna ke iketseditseng yona.
4 Ke se ke ya kenya leutlana mehlahareng ya hao, ke etse hore dihlapi tsa dinoka tsa hao di kgomarele makgapetla a hao, ke o honyolle dinokeng tsa hao, dihlapi tsohle tsa dinoka tsa hao di kgomaretse makgapetla a hao.
5 Ke tla o lahlela lefeelleng, wena le dihlapi tsohle tsa dinoka tsa hao; o tla wela masimong; ha o ka ke wa phuthwa, leha e le ho bokellwa, mme ke tla o neela dibatana tsa naha le dinonyana tsa lehodimo, ho ba dijo tsa tsona.
6 Baahi bohle ba Egepeta ba tla tseba hoba ke nna Jehova, hobane e ne e le tshiya ya lehlaka ho ntlo ya Iseraele;
7 enereha ba o tshwara ka letsoho, wa nna wa robeha, wa petsola lehetla lohle la bona; enereha ba itshetleha ka wena, wa nna wa robeha, wa sisinya letheka lohle la bona.
8 Ha ho le jwalo, Morena Jehova o re: Bona, ke tla o tlisetsa lerumo, ke kgaole batho le dikgomo ha hao.
9 Naha ya Egepeta e tla etswa lesupi le dithako, ba tle ba tsebe hoba ke nna Jehova. Erekaha a itse: Noka ke ya ka, ke nna ke e entseng;
10 ke ya tla ke hona ho wena le ho dinoka tsa hao, ke etse naha ya Egepeta dithako tse omeletseng, tse feela, ho tloha Migdole, ho tlisa Siene, le ho isa moeding wa Kushe.
11 Ha ho sa tla hata teng leoto la motho, ha ho tlhako ya kgomo e tla tsamaya teng, mme ha e ka ke ya ahuwa ka dilemo tse mashome a mane.
12 Ke tla etsa naha ya Egepeta lesupi hara naha tse lesupi, metse ya yona e be lesupi hara metse e dithako ka dilemo tse mashome a mane; ke tla qhalanyetsa Baegepeta hara ditjhaba, ke ba hasanyetse mafatsheng wohle.
13 Hobane Morena Jehova o re: Etlare hobane ho fele dilemo tseo tse mashome a mane, ke tla phutha Baegepeta ditjhabeng tseo ba qhalanyeditsweng hara tsona;
14 ke tla lata Baegepeta ba ileng kgolehong, ke tle ke ba busetse naheng ya Pathrose, naheng eo ba tswaletsweng ho yona, mme teng ba tla etsa mmuso o nyenyefetseng.
15 O tla nyenyefala ho feta mebuso e meng, mme ha o sa tla phahamela ditjhaba; ke tla ba qephisa, hore ba se hlole ba rena hodima ditjhaba.
16 Mmuso oo ha o sa tla tshepisa ba ntlo ya Iseraele letho; o tla ba hopotsa bokgopo ba bona, ba mohla ba neng ba retelehela ho wona; mme ho tla tsejwa hoba ke nna Morena Jehova.
17 Ka selemo sa mashome a mabedi a metso e supileng, ka kgwedi ya pele, ka la pele la kgwedi, lentswe la Jehova la ntlela, la re:
18 Mora motho, Nebukadresare, morena wa Babilona, o sebedisitse makgotla a hae mosebetsi o moholo Tire; dihlooho tsohle di phumuhile ke hona, mahetla wohle a phumuhile selota; mme hona teng Tire, yena le makgotla a hae ha ha ka ba bona moputso le o mong wa mosebetsi oo ba o sebeditseng teng.
19 Ha ho le jwalo, Morena Jehova o re: Bonang, ke tla nea Nebukadresare, morena wa Babilona, naha ya Egepeta; o tla tlosa bongata ba batho teng, a hape kgapo ya teng, a ye le seo a se tlatlapileng, mme hoo e tla ba moputso wa makgotla a hae.
20 Moputso wa hae oo a o sebeleditseng, ke tla mo nea Egepeta, ka baka la seo ba ntshebeleditseng ka sona: ho rialo Morena Jehova.
21 Mohlang oo, ke tla medisetsa ntlo ya Iseraele lenaka, mme wena, ke tla o nea molomo o ahlamileng hara bona, hore ba tle ba tsebe hoba ke nna Jehova.