1 O a‘u o Paulo na vala‘auina i le finagalo o le Atua e fai ma ‘aposetolo a Iesu Keriso, ‘atoa ma Sosene lo tatou uso.
2 I le ekalesia a le Atua o lo‘o i Korinito, o ē ‘ua fa‘apa‘iaina ‘iā Keriso Iesu, ‘ua vala‘auina e fai ma tagata pa‘ia, ‘atoa uma ma ē vala‘au atu i le suafa o lo tatou Ali‘i o Iesu Keriso i mea uma, o lo latou Ali‘i ‘atoa ma lo tatou.
3 ‘Ia ‘iā te ‘outou le alofa tunoa ma le manuia mai le Atua lo tatou Tamā ma le Ali‘i o Iesu Keriso.
4 ‘Ou te fa‘afetai atu i lo‘u Atua e lē aunoa ‘ona o ‘outou, auā o le alofa tunoa o le Atua ‘ua foa‘iina mai ‘iā te ‘outou ‘iā Keriso Iesu;
5 ‘ina ‘ua fa‘atamao‘āigaina ‘outou e ia i mea uma, i le ‘upu ma le malamalama ‘atoa.
6 e fa‘apei ‘ona fa‘amaonia le molimau ‘iā Keriso ‘iā te ‘outou;
7 o lea ‘ua ‘outou lē matitiva ai i se mea alofa e tasi; a o fa‘atalitali ‘outou i le fa‘aaliga o lo tatou Ali‘i o Iesu Keriso.
8 O ia fo‘i na te fa‘atumauina ‘outou se‘ia o‘o atu i le i‘uga, ‘ina ‘ia leai se mea e fa‘asalaina ai ‘outou i le aso o lo tatou Ali‘i o Iesu Keriso.
9 E fa‘amaoni le Atua, o lē ‘ua vala‘auina ‘outou ‘ina ‘ia mafuta fa‘atasi ma lona Alo o Iesu Keriso lo tatou Ali‘i.
10 Le au uso e, ‘ou te ‘ai‘oi atu ‘iā te ‘outou i le suafa o lo tatou Ali‘i o Iesu Keriso, ‘ina ‘ia tasi la ‘outou ‘upu uma lava, ‘ina ne‘i i ai ni māseiga ‘iā te ‘outou; a ‘ia maopoopo lava i le loto e tasi ma le manatu e tasi.
11 Auā ‘ua ta‘ua mai ‘outou, o‘u uso e, ‘iā te a‘u e o sa Keloē, o ‘iā te ‘outou misa.
12 O lona uiga la, ‘ua ta‘ito‘atasi ‘outou ma fa‘apea ane, “O a‘u o lo sa Paulō,” “O a‘u o lo sa Apolō,” “O a‘u o lo sa Kefā,” “O a‘u o lo sa Kerisō.”
13 Po ‘ua vaevaeina ‘ea Keriso? Pe na fa‘asatauroina ‘ea Paulo mo ‘outou? Pe na papatisoina ‘ea ‘outou i le igoa o Paulo?
14 ‘Ou te fa‘afetai atu i le Atua ‘ou te le‘i papatisoina so ‘outou, na o Kiripo ma Kaio;
15 ‘ina ne‘i fai mai se tasi na ‘ou papatiso atu i lo‘u nei igoa.
16 Na ‘ou papatisoina fo‘i le ‘āiga o Setefana; a ‘ou te lē iloa pe i ai se tasi na ‘ou papatisoina.
17 Auā e le‘i ‘auina mai a‘u e Keriso e papatiso, a ‘ia folafola atu, le tala lelei, e lē o le poto i ‘upu, ‘ina ne‘i fa‘alēaogāina le satauro o Keriso.
18 Auā o le matā‘upu i le satauro, o le valea lea i ē o malaia, a o le mana o le Atua ‘iā te i tatou ‘ua fa‘aolaina.
19 Auā ‘ua tusia,“‘Ou te fa‘aumatia le poto o ē popoto,ma ‘ou fa‘alēaogāina le atamai o ē atamamai.”
20 Po o ifea le tagata poto? Po o ifea le tusi‘upu? Po o ifea le filifiliga o lenei lalolagi? E lē ‘ua ‘avea ‘ea e le Atua le poto o lenei lalolagi ma valea?
21 Auā o le poto o le Atua, ‘ina ‘ua lē iloa le Atua e le lalolagi i lo latou poto, ‘ua finagalo ai le Atua ‘ia fa‘aolaina i le valea o le tala‘iga ē ‘ua fa‘atuatua.
22 Auā o lo‘o fai mai Iutaia i se fa‘ailoga, ma Eleni o lo‘o sā‘ili i latou i le poto.
23 A o i matou, ‘ua matou tala‘i atu ia Keriso na fa‘asatauroina, o le mea e tausuai ai Iutaia ma le valea ‘iā Eleni.
24 ‘Ae peita‘i o ē ‘ua vala‘auina, o Iutaia ‘atoa ma Eleni, ‘ua fai Keriso ma mana o le Atua ma poto o le Atua ‘iā te i latou.
25 Auā o le valea o le Atua e sili lona poto i tagata; o le vaivai fo‘i o le Atua e sili lona malosi i tagata.
26 ‘Ia ‘outou mānatunatu i lo ‘outou vala‘auina, le ‘au uso e; e lē to‘atele o ē popoto e tusa ma le manatu o lenei lalolagi, e lē to‘atele faipule, e lē to‘atele ali‘i.
27 ‘Ae peita‘i ‘ua filifilia e le Atua mea vālea a le lalolagi, ‘ina ‘ia fa‘amāina ē popoto, ma mea vaivai a le lalolagi ‘ua filifilia ia e le Atua e fa‘amāina ai mea malolosi.
28 ‘Ua filifilia e le Atua mea maulalo ma le fa‘atauva‘a i le lalolagi e o‘o i mea e leai, ‘ina ‘ia lafotūina mea o i ai.
29 ‘Ina ne‘i mitamita se tagata e to‘atasi i luma o le Atua.
30 ‘Ua āfua mai ‘iā te ia lo ‘outou ola ‘iā Keriso Iesu, o lē ‘ua tu‘uina mai e le Atua e fai ma o tatou poto, o lo tatou amiotonu ia; o lē ‘ua fa‘apa‘iaina mai; o lo tatou togiola fo‘i ia.
31 ‘Ina ‘ia fa‘apei ‘ona tusia, “O lē mitamita, ‘ia mitamita o ia i le Ali‘i.”#