1 O a‘u nei fo‘i, le ‘au uso e, ‘ou te le‘i alu atu ma le sili o le ‘upu ma le poto, ‘ina ‘ua ‘ou alu atu ‘iā te ‘outou i lo‘u tala‘i atu ‘iā te ‘outou i le mau a le Atua.
2 Auā na tonu lo‘u manatu, ‘ou te lē iloa se tasi mea ‘iā te ‘outou tau lava o Iesu Keriso, o ia lava na fa‘asatauroina.
3 Na ‘ou i ai fo‘i ‘iā te ‘outou ma le vaivai, ma le mata‘u, ma le gatete tele;
4 e le‘i sauni atu fo‘i la‘u ‘upu ma la‘u tala‘iga i ‘upu mālie o le poto o tagata, ‘ae peita‘i o le fa‘asino mai e le Agaga ma le mana;
5 ‘ina ‘ia lē i ai lo ‘outou fa‘atuatua i le poto o tagata a o le mana o le Atua.
6 ‘Ae matou te tautala atu i le poto i ē ‘ua uma ‘ona a‘oa‘oina; ‘ae lē o le poto o lenei lalolagi, po o le poto o ali‘i o lenei lalolagi ‘ua tauāu ‘ina mavae.
7 ‘Ae peita‘i matou te tautala atu i le poto o le Atua i le ‘upu lilo sa natia, na tofia e le Atua anamuā anamua lava, ‘ina ‘ia tatou manuia ai.
8 O le mea na lē iloa e se ali‘i e tasi o lenei lalolagi; auā ‘ana latou iloa, po ‘ua latou lē fa‘asatauroina le Ali‘i e ona le manuia.
9 ‘Ae pei ‘ona tusia,“O mea e le‘i va‘aia e mata, e le‘i lagona fo‘i e taliga,e le‘i o‘o fo‘i i le loto o se tagata,o mea ia ‘ua saunia e le Atua mo i latou o ē alofa ‘iā te ia.”
10 A ‘ua fa‘aalia mai ia mea e le Atua ‘iā te i matou e lona Agaga; auā e su‘esu‘e ifo le Agaga i mea uma, e o‘o i le uiga loloto o le Atua.
11 Po o ai fo‘i se tasi ‘ua iloa le uiga o se tagata, ‘ae vaganā lava le agaga o le tagata o lo‘o i totonu ‘iā te ia? E fa‘apea fo‘i ‘ona lē iloa e se tasi mea a le Atua, ‘ua nā o le Agaga o le Atua.
12 A ‘ua maua e i matou, e lē o le agaga o lenei lalolagi, a o le agaga mai le Atua, ‘ina ‘ia matou iloa mea ‘ua foa‘ifuaina mai e le Atua ‘iā te i matou.
13 O ia mea fo‘i matou te tautala atu ai i ‘upu e a‘oa‘oina mai e le Agaga Pa‘ia, ‘ae lē o ‘upu e a‘oa‘oina ai i le poto o tagata, o lo‘o fa‘amatalaina mea fa‘aleagaga i ē ‘ua maua le Agaga.
14 ‘Ae lē talia e le tagata fa‘aletino o mea a le Agaga o le Atua; auā o mea valea ia ‘iā te ia, na te lē mafai fo‘i ‘ona iloa, auā e fa‘amasinoina fa‘aleagaga.
15 A o le tagata fa‘aleagaga e fa‘amasino e ia i mea uma, ‘ae lē fa‘amasinoina o ia e se tasi.
16 “Auā po o ai ‘ua nā iloa le finagalo o le Ali‘i na te a‘oa‘oina atu o ia?”A ‘ua tatou maua le finagalo o Keriso.#