1 Le ‘au uso e, ‘ou te fa‘ailoa atu ‘iā te ‘outou le tala lelei na ‘ou folafolaina atu ‘iā te ‘outou, na ‘outou talia fo‘i, o lo‘o tumau i ai fo‘i ‘outou,
2 ‘ua fa‘aolaina ai fo‘i ‘outou; pe ‘āfai tou te tāofi mau i le matā‘upu na folafolaina e a‘u ‘iā te ‘outou; pe ‘āfai ‘ua ‘outou lē talia fua.
3 Auā na ‘ou tu‘uina atu ‘iā te ‘outou mea muamua o mea fo‘i ia na ‘ou maua fo‘i e a‘u; na maliu Keriso mo a tatou agasala, pei ‘ona tusia;
4 na tanu fo‘i o ia, ma toetū mai i le aso tolu, pei o ‘upu ‘ua i Tusi.
5 Na iloa fo‘i o ia e Kefa, ‘ona iloa lea e le to‘asefulu ma le to‘alua.
6 ‘Ona toe iloa lea o ia e le ‘au uso e lima selau ma ‘ona tupu ‘ina ‘ua fa‘atasi; o le to‘atele fo‘i o i latou o ola mai, ‘ua o‘o ona po nei; a o isi ‘ua momoe.
7 ‘Ona toe iloa lea o ia e Iakopo, ‘ona iloa lea e le ‘au ‘aposetolo uma.
8 E mulimuli lava ‘ona iloa o ia e a‘u nei, e peiseaī se tama fānau lē au.
9 Auā o a‘u o le aupito itiiti o le ‘au ‘aposetolo; e lē aogā ‘ona ta‘ua o a‘u o le ‘aposetolo, auā na ‘ou sauā atu i le ekalesia a le Atua.
10 A o le alofa tunoa o le Atua ‘ua ‘ou fa‘apenei ai a‘u; o lona alofa tunoa fo‘i o ‘iā te a‘u, e lē fa‘alēaogāina lea, a ‘ua sili la‘u galuega ‘iā latou uma; a o le alofa tunoa o le Atua ‘ua ‘iā te a‘u.
11 O lenei, po o a‘u, po o i latou, e fa‘apea ‘ona matou tala‘iina atu, sa fa‘apea fo‘i ‘ona ‘outou fa‘atuatua.
12 ‘Āfai fo‘i ‘ua tala‘iina Keriso ‘ua ia toetū mai nai ē ‘ua oti, pe fa‘apefea ‘ona fai mai o isi o ‘outou, e leai se toetū mai o ē ‘ua oti?
13 ‘Ae ‘āfai e leai se toetū mai o ē ‘ua oti, po ‘ua lē toe fa‘atūina mai Keriso;
14 ‘āfai fo‘i ‘ua lē toe fa‘atūina mai Keriso, po ‘ua fa‘alēaogā la matou tala‘i, ‘ua fa‘alēaogā fo‘i lo ‘outou fa‘atuatua.
15 ‘Ua ‘avea fo‘i i matou ma molimau pepelo ‘iā le Atua; auā ‘ua molimau i matou i le Atua na ia toe fa‘atūina mai Keriso, o lē na lē toe fa‘atūina e ia, pe ‘āfai e mo‘i e lē toe tutū mai ē ‘ua oti.
16 Auā ‘āfai e lē toe tutū mai ē ‘ua oti, po ‘ua lē toe fa‘atūina mai Keriso.
17 ‘Āfai fo‘i ‘ua lē toe fa‘atūina Keriso, ‘ua fa‘alēaogā lo ‘outou fa‘atuatua, ‘ua nofo sala pea ‘outou;
18 i le ma lea fo‘i, ‘ua fano ē ‘ua momoe ‘iā Keriso.
19 ‘Āfai e gata i lenei olaga mea tatou te fa‘amoemoe i ai ‘iā Keriso, ‘ua sili lo tatou malaia i tagata uma lava.
20 A o lenei, ‘ua toe fa‘atūina mai Keriso i ē ‘ua oti, ‘ua ‘avea ma fa‘apolopolo o ē ‘ua momoe.
21 Auā ‘ua o‘o mai le oti ‘ona o le tagata, ‘ua o‘o mai fo‘i le toe tutū o ē ‘ua oti ‘ona o le tagata.
22 Auā fa‘apei ‘ona oti uma ‘iā Atamu, e fa‘apea fo‘i ‘ona fa‘aolaina uma ‘iā Keriso.
23 ‘Ae peita‘i e ta‘ito‘atasi ma lona lava tofi; o le ulua‘i fua o Keriso ia, mulimuli ane o ē ‘ua fai mōna i lona toe afio mai.
24 ‘Ona o‘o ai lea i le gata‘aga, e tu‘uina atu ai e ia le mālō i le Atua, o le Tama lea, pe a uma ‘ona fa‘aumatia e ia o ali‘i sili uma, ma faipule uma, ma ē malolosi.
25 Auā e tatau ‘ona pule o ia, se‘ia tu‘uina e ia ona fili uma lava i lalo o ona vae.
26 O le toe fili e fa‘aumatia, o le oti lea;
27 auā, “‘Ua tu‘uina e ia o mea uma i lalo o ona vae;” ‘ae peita‘i ‘ina ‘ua fai mai, “‘Ua tu‘uina i lalo mea uma ‘iā te ia,” ‘ua iloa tino ai, ‘ua vavae atu lē na ia tu‘uina i lalo o mea uma ‘iā te ia.
28 Pe a uma fo‘i ‘ona tu‘uina i lalo ‘iā te ia o mea uma, ‘ona tu‘uina i lalo fo‘i lea o le Alo lava i lē na tu‘uina i lalo ‘iā te ia o mea uma, ‘ina ‘ia pule aoao le Atua i le aoao o mea.
29 A fa‘apea, pe fa‘apefea ē ‘ua papatisoina ma sui o ē ‘ua oti? ‘Āfai e moni, e lē toe tutū ē ‘ua oti, ‘ona o le a ‘ea ‘ua papatisoina ai i latou ma sui o ē ‘ua oti?
30 Se a fo‘i e pagātia ai i matou i itū aso uma lava?
31 ‘Ou te augani i le mitamita ‘ua ‘iā te a‘u ‘ona o ‘outou ‘iā Keriso Iesu lo tatou Ali‘i, ‘ou te oti i aso fai so‘o.
32 Se a ‘ea se aogā ‘iā te a‘u ‘ona ‘ua ‘ou tau ma manu fe‘ai i Efeso, pei o le tu a tagata. Pe ‘āfai e lē toe tutū ē ‘ua oti? “‘Inā tatou ‘a‘ai ma inu, auā o a taeao tatou te oti ai.”
33 ‘Aua ne‘i fa‘asesēina ‘outou, “O lē feoa‘i ma ē amio leaga e leaga ai amio lelei.”
34 ‘Inā ala mai ia i le amiotonu, ‘ae ‘aua ne‘i agasala; auā ‘ua pouliuli nisi i la le Atua; ‘ou te fa‘apea atu ‘iā te ‘outou ē fa‘amā ‘iā te ‘outou.
35 ‘Ae fai mai se tasi, “Pe fa‘apefea ‘ona toe tutū mai o ē ‘ua oti? Se a fo‘i le uiga o le tino latou te ō mai ai?”
36 O oe nā le valea: o le mea e lūlūina e oe e lē ola lea pe ‘āfai e lē pala.
37 O le mea fo‘i ‘e te lūlū, ‘ua e lē lūlūina le tino e tupu ia; a o le fua lava, atonu o se saito, po o se tasi o ia mea.
38 ‘Ae avane i ai le tino e le Atua, pei ‘ona finagalo i ai o ia; o fua fo‘i ta‘itasi ma lona lava tino.
39 ‘Ua lē tino e tasi tino uma lava; ‘ae ‘ese le tino o tagata, ‘ese le tino o manu, ‘ese le tino o i‘a, ‘ese le tino o manu felelei.
40 E i ai fo‘i tino fa‘alelagi ma tino fa‘alelalolagi; ‘ae ‘ese le matagofie o le fa‘alelagi, ‘ese lo le fa‘alelalolagi.
41 E ‘ese le pupula o le lā, ‘ese fo‘i le pupula o le masina, ‘ese fo‘i le pupula o fetū; auā ‘ua ‘ese le pupula o le tasi fetū i lo le tasi fetū.
42 E fa‘apea fo‘i le toe tutū mai o ē ‘ua oti; e lūlūina ma le pala, e toe fa‘atūina mai ma le lē pala.
43 E lūlūina ma le matagā, e toe fa‘atūina mai ma le matagofie; e lūlūina ma le vaivai, e toe fa‘atūina mai ma le malosi.
44 E lūlūina le tino fa‘aletino, e toe fa‘atūina mai o le tino fa‘aleagaga; e i ai le tino fa‘aletino, e i ai fo‘i le tino fa‘aleagaga.
45 E fa‘apea fo‘i ‘ona tusia, “Na faia Atamu le ulua‘i tagata ma tagata ola;” a o le Atamu mulimuli, o le Agaga fa‘aola o ia.
46 ‘Ae peita‘i e lē muamua le fa‘aleagaga, a o le fa‘aletino; ‘ona mulimuli ai lea o le fa‘aleagaga.
47 E fa‘ale‘ele‘ele le ulua‘i tagata, na fua mai le ‘ele‘ele; a o le tagata mulimuli o le Ali‘i lea mai le lagi.
48 Pei o lē fa‘ale‘ele‘ele, e fa‘apea lava o ē fa‘ale‘ele‘ele; pei o lē fa‘alelagi, e fa‘apea lava o ē fa‘alelagi.
49 Fa‘apei ‘ona foliga o i tatou i le fa‘ale‘ele‘ele, e fa‘apea lava ‘ona foliga o i tatou i le fa‘alelagi.
50 Le ‘au uso e, o la‘u ‘upu lenei, e lē mafaia ‘ona ‘avea o le mālō o le Atua ma tofi o i latou ‘ua i ai tino ‘a‘ano ma toto; e lē fai fo‘i le ola pea ma tofi o le i‘u vale.
51 Fa‘auta mai, ‘ou te ta‘u atu ‘iā te ‘outou le mea lilo; e lē momoe i tatou uma, ‘ae liua i tatou uma,
52 e fa‘afuase‘i lava, o le ‘emo o le mata, pe a ilia le pū fa‘auma; auā e ilia lava, e toe tutū mai ai ē ‘ua oti ma le ola pea, e liua fo‘i i tatou.
53 Auā e tatau ‘ona ‘ofu o lenei tino i‘u vale i le tino ola pea, ‘ia ‘ofu fo‘i lenei tino oti i le tino lē oti lava.
54 Pe a ‘ofu fo‘i lenei tino i‘u vale i le tino ola pea, a ‘ofu fo‘i lenei tino oti i le tino lē oti lava, ‘ona taunu‘u ai lea o le ‘upu ‘ua tusia, “‘Ua fa‘aumatia le oti i le manumālō.”
55 “Le oti e, o fea o i ai lou manumālō?Le oti e, o fea o i ai lou tui?”
56 O le tui o le oti, o le agasala lea o le malosi fo‘i o le agasala o le tulafono lea;
57 ‘ae fa‘afetai i le Atua, o lē na te foa‘iina mai le manumālō ‘iā te i tatou e ala mai i lo tatou Ali‘i o Iesu Keriso.
58 O lenei, o‘u uso pele e, ‘ia ‘outou tumau ma le lē fa‘agae‘etia, ‘ia alualu lo ‘outou fa‘amalosi i le galuega a le Ali‘i ma le lē aunoa ‘ina ‘ua ‘outou iloa e lē se mea fa‘alēaogā lo ‘outou tautigā i le Ali‘i.#