1 A o mea na ‘outou tusi mai ai: “E lelei ‘ona lē tago se tagata i se fafine.”
2 A ‘ona o le faita‘aga, ‘ia ta‘itasi le tane ma lana lava avā, ‘ia ta‘itasi fo‘i le fafine ma lana lava tane.
3 ‘Ia avatu e le tane i le avā le agalelei e tatau ai, ‘ia fa‘apea fo‘i le avā i le tane.
4 E lē pule le avā i lona lava tino, na o le tane; e fa‘apea fo‘i le tane, e le pule ia i lona lava tino, na o le avā.
5 ‘Aua ne‘i fa‘afiti le tasi i le tasi, se‘ia ‘iloga lava lua te loto gatasi ai i nai aso, ‘ina ‘ia ‘oulua fa‘asaga i le anapogi ma le tatalo; ma ‘ia toe fa‘atasi ane i le mea e tasi, ‘ina ne‘i fa‘aosooso mai Satani ‘iā te ‘oulua, ‘ona o lo ‘oulua lē lavā ‘onosa‘i.
6 O le mea tu‘ufaitalia ‘ou te fai atu ai, e lē se poloa‘iga.
7 A o lo‘u loto ‘ia fa‘apei o a‘u nei tagata uma; ‘ae peita‘i e ta‘ito‘atasi ma lana lava mea alofa e maua mai le Atua, e ta‘itasi ma lona uiga, o lea ma lea.
8 O la‘u lenei ‘upu i tagata nofo fua ma fafine ‘ua oti a latou tane, e lelei ‘ona latou nonofo pea pei o a‘u nei.
9 Peita‘i ‘āfai latou te lē lavā ‘o‘ono, ‘ia fa‘aipoipo i latou, auā e sili le fa‘aipoipo i lo le mū i le mana‘o.
10 ‘Ou te fai atu fo‘i i ē ‘ua fai avā ma nofotane, e lē o a‘u, a o le Ali‘i, ‘Aua le te‘a ‘ese le avā i lana tane,
11 ‘āfai fo‘i e te‘a, ia nofo fua pea ia, pe toe lelei ma lana tane; ‘aua fo‘i le fa‘ate‘a‘eseina e le tane o lana avā.
12 A o isi, o la‘u lenei ‘upu ‘iā te i latou, e lē a le Ali‘i; ‘ai se tasi o le ‘au uso ‘ua i ai le avā lē fa‘atuatua, ‘ua loto ‘ina lā nonofo ma ia, ‘aua le molia o ia;
13 o se fafine fo‘i o i ai le tane lē fa‘atuatua, ‘ua loto ‘ina lā nonofo ma ia, ‘aua le fa‘ate‘a ‘iā te ia.
14 Auā e fa‘apa‘iaina le tane lē fa‘atuatua i le avā; e fa‘apa‘iaina fo‘i le avā lē fa‘atuatua i le tane; ‘ana lē o lea po ‘ua leaga a ‘outou fānau; a o lenei, e pa‘ia i latou.
15 Peita‘i ‘āfai e fia te‘a ‘ese lē ‘ua lē fa‘atuatua, ‘ia fa‘apea ‘ona faia. E lē fa‘apologaina le tane po o le avā Kerisiano pe a fa‘apeaina; a ‘ua vala‘auina i tatou e le Atua i le filemū.
16 E lē mā iloa e oe le avā, pe fa‘aolaina lau tane ‘iā te oe; ma oe fo‘i le tane pe fa‘aolaina lau avā ‘iā te oe.
17 A ‘ia ta‘ito‘atasi ma savali pei ‘ona tufatufa mai e le Atua ‘iā te ia; ‘ia ta‘ito‘atasi pei ‘ona vala‘auina o ia e le Ali‘i. ‘Ua fa‘apea fo‘i ‘ona ‘ou fa‘atonuina i ekalesia uma lava.
18 A vala‘auina se tasi ‘ua peritomeina, ‘aua ne‘i taumafai o ia e ‘ave ‘ese fa‘ailoga o le peritomega. A vala‘auina se tasi ‘ua lē peritomeina, ‘aua ne‘i peritomeina o ia.
19 E lē aogā lava le peritome, e lē aogā fo‘i le lē peritome; ‘ua na o le tausi i poloa‘iga a le Atua.
20 ‘Ia ta‘itasi ma nofo pea i le mea ‘ua vala‘auina ai o ia.
21 ‘Ua vala‘auina ‘ea oe ‘ina o fai ma pologa? ‘aua ‘e te manatu i ai; peita‘i a mafai ‘ona e maua le sa‘olotoga, ‘inā fai ia o lea e lelei ai;
22 auā o lē ‘ua vala‘auina i le Ali‘i ‘ina o fai ma pologa, o le sa‘oloto ia a le Ali‘i; e fa‘apea fo‘i lē ‘ua vala‘auina ‘ina o sa‘oloto, o le pologa ia o Keriso.
23 ‘Ua fa‘atauina ‘outou i le tau, ‘aua ne‘i ‘avea ‘outou ma pologa o tagata.
24 Le ‘au uso e, ‘ia ta‘ito‘atasi ma nofo pea i luma o le Atua i le mea na vala‘auina ai o ia.
25 A o ē nofo taupou, ‘ua ‘ou lē maua se poloa‘iga a le Ali‘i ‘iā te i latou; a ‘ou te ta‘u atu lo‘u tāofi, o a‘u fo‘i ‘ua alofagia e le Ali‘i, ‘ou te fa‘amaoni ai.
26 O la‘u tāofi fo‘i, e lelei lenā mea ‘ona o le faigatā i ona po nei, e lelei fo‘i i le tagata pe a fa‘apea.
27 ‘Ua noatia ‘ea oe i le avā? ‘Aua ‘e te sā‘ili ‘ina ‘ia tatalaina; ‘ua tatalaina ‘ea oe i le avā? ‘Aua ‘e te sā‘ili i se avā.
28 ‘Ae ui lava ‘ina e fa‘aipoipo ‘e te lē agasala ai; ‘āfai fo‘i e fa‘aipoipo le teine e lē agasala ai o ia; ‘ae o‘o i ē ‘ua fa‘apea le puapuagā i le tino. ‘Ae ‘ou te fia fa‘asaoina ‘outou mai ia mea.
29 A o la‘u lenei e fai atu ai, le ‘au uso e, ‘ua itiiti ona aso ‘ua totoe; o lenei, o ē ‘ua fai avā, ‘ia peiseaī ‘ua lē fai avā.
30 O ē taufaitagi, ‘ia peiseaī ‘ua lē taufaitagi; o ē taufai‘oli‘oli, ‘ia peiseaī ‘ua lē taufai‘oli‘oli; o ē fa‘atau, ‘ia peiseaī ‘ua lē maua ni mea.
31 O ē fetāgofi i mea a le lalolagi nei, ‘ia peiseaī ‘ua lē fetāgofi i ai; auā o le a mavae atu le tu o le lalolagi nei.
32 ‘Ou te loto lava ‘ina ne‘i popole ‘outou. ‘Ua popole le nofo fua i mea a le Ali‘i i se mea e fiafia mai i ai le Ali‘i;
33 a o lē ‘ua fa‘aipoipo, e popole o ia i mea a le lalolagi i se mea e fa‘afiafia ai le avā,
34 e vaeluaina lona mafaufau. ‘Ua popole le tama‘ita‘i e le‘i fa‘aipoipo po o le teine i mea a le Ali‘i, ‘ina ‘ia pa‘ia o ia, o le tino, ‘atoa ma le agaga; a o le tama‘ita‘i fa‘aipoipo, e popole ia i mea a le lalolagi i se mea e fa‘afiafia ai le tane.
35 O la‘u lenei ‘upu e fai atu ‘iā te ‘outou e aogā ai ‘iā te ‘outou; e lē ‘ina ‘ia ‘ou lafo se matāsele ‘iā te ‘outou, ‘ae peita‘i ‘ina ‘ia matagofie ai; ‘ina ‘ia ‘au‘auna lelei fo‘i i le Ali‘i ma le loto lē fetosoa‘iina.
36 ‘Āfai fo‘i e manatu se tasi ‘ua fa‘aleono lana amio i lona afafine taupou, ‘āfai ‘ua matuā lava ia, ma ‘ona ‘ua tatau ‘ona ia fa‘apea, ‘inā fai ia e ia le mea e loto i ai, e lē agasala ia; ‘ia nofo o ia i lana tane.
37 A o lē ‘ua mau lona loto, e leai se mea e faigatā i ai, ‘ua ‘iā te ia fo‘i le pule i lona lava loto, ma ‘ua tonu lona loto i lenei mea ‘ona ia tāofi i lona afafine taupou, ‘ua lelei lana mea e fai.
38 O lenei, o le tagata ‘ua fa‘aipoipo ‘ua lelei lana mea e fai, a o lē ‘ua lē fa‘aipoipo ‘ua sili ‘ona lelei lana mea e fai.
39 ‘Ua noatia le fafine i le tulafono i aso uma e ola ai lana tane; ‘ae ‘āfai ‘ua oti lana tane, ‘ua sa‘oloto o ia e nofotane i lē ‘ua loto i ai, tau lava i le vā i le Ali‘i.
40 ‘Ae ‘āfai e nofo fua pea ia, e sili lona manuia, o la‘u tāofi lea; o lo‘u manatu fo‘i ‘ua ‘iā te a‘u le Agaga o le Atua.