1 A fai ‘ou te tautala i gagana a tagata ‘atoa ma agelu, ‘ae leai so‘u alofa, ‘ua ‘avea a‘u ma ‘apamemea ta‘alili, po o se sumepalo tagitagi.
2 ‘Āfai fo‘i o ‘iā te a‘u ‘ona perofeta ane, ma le iloa o mea lilo uma, ma le malamalama uma lava; ‘āfai fo‘i o ‘iā te a‘u le fa‘atuatua uma e ‘ave ‘ese ai mauga, ‘ae leai so‘u alofa, ‘ou te lē aogā lava.
3 ‘Āfai fo‘i ‘ou te tufatufaina a‘u mea uma e fagaina a‘i ē matitiva; ‘āfai fo‘i ‘ou te tu‘uina atu lo‘u tino ‘ina ‘ia susunuina, ‘ae leai so‘u alofa, e leai lava sona aogā ‘iā te a‘u.
4 E ‘onosa‘i le alofa, e agamalū, e lē losilosi le alofa, e lē mitamita vale le alofa, e lē fa‘afefeteina,
5 e lē amio matagā, e lē sā‘ilia e ia ana lava mea, e lē fa‘aitaitagofie, e lē faitau leaga ‘ua tu‘uina mai e nisi.
6 e lē fiafia i le amio leaga, ‘ae fiafia i le fa‘amaoni.
7 O le alofa e lavātia mea uma, e leai se mea e gata mai ai lona fa‘atuatua, ma lona fa‘amoemoe ma lona ‘onosa‘i.
8 E lē uma le alofa; ‘ae pe ni perofetaga, o le a fa‘alēaogāina ia; pe ni gagana, o le a mavae ia; po o le iloa, o le a fa‘alēaogāina lea.
9 Auā ‘ua tatou iloa fa‘alē‘atoa, ma tatou perofeta fa‘alē‘atoa;
10 ‘ae peita‘i pe a o‘o mai le ‘ato‘atoa, ‘ona fa‘alēaogāina lea o le mea fa‘alē‘atoa.
11 Ona po na ‘ou itiiti ai, na ‘ou tautala ai fa‘atamaitiiti, na ‘ou mānatunatu fa‘atamaitiiti, na ‘ou filifili fa‘atamaitiiti; a ‘ua o‘o ‘ina o‘u tagata matua, ‘ona ‘ou tia‘i lea o mea a tamaiti.
12 Auā ona po nei tatou te va‘ava‘ai ai fa‘anenefu i le fa‘aata, a o ia ona po tatou te fesagai ai; o nei ona po ‘ou te iloa ai fa‘alē‘atoa, a o ia ona po ‘ou te iloa tino ai, pei ‘ona iloatinoina o a‘u.
13 A o lenei, o tumau le fa‘atuatua, ma le fa‘amoemoe, ma le alofa, o nā mea e tolu; a o le sili o nā mea o le alofa lea.#