1 A o meaalofa fa‘aleagaga, le ‘au uso e, ‘ou te lē loto ‘ina ‘ia pouliuli ai ‘outou.
2 ‘Ua ‘outou iloa i ona po sa fai ‘outou ma nu‘u ‘ese, sa tōsina fo‘i i tupua le gagana, pei ‘ona so‘ona tōsina o ‘outou.
3 O lenei, ‘ou te fa‘ailoa atu ‘iā te ‘outou, e leai lava se tagata e tautala i le Agaga o le Atua na te “ta‘uanatemaina o Iesu;” e leai fo‘i se tasi na te mafaia ‘ona ta‘ua “o Iesu o le Ali‘i,” a lē se anoa le Agaga Pa‘ia.
4 E matalasi mea alofa, ‘ae tasi lava le Agaga ia.
5 e matalasi fo‘i faiva, ‘ae tasi lava le Ali‘i ia;
6 e matalasi fo‘i mea mamana, ‘ae tasi lava le Atua o lē na te matuā galue i mea uma i tagata uma lava.
7 ‘Ua foa‘iina ta‘itasi i tagata le fa‘aaliga o le Agaga e aogā ai.
8 Auā ‘ua foa‘iina mai i le tasi i le ‘upu o le poto e le Agaga; e i le tasi le ‘upu o le malamalama, e tusa ma le Agaga e tasi.
9 E i le tasi le fa‘atuatua e le Agaga e tasi; e i le tasi o mea alofa e fa‘amālōlō a‘i ma‘i e le Agaga e tasi.
10 E i le tasi na te faia vāvega, e i le tasi o le perofeta; e i le tasi o su‘ega o agaga; e i le tasi o gagana ‘ese‘ese; e i le tasi o le fa‘amatalaga o gagana.
11 E matuā galue fo‘i na mea uma e lea lava Agaga e tasi, o lo‘o o tufatufa i tagata ‘ia ta‘itasi ma lana mea, pei ‘ona finagalo i ai o ia.
12 Auā pei o le tino ‘ua tasi ia, ma ona itū tino e tele, a o itū tino uma, e ui ‘ina tele, o le tino e tasi lava ia; e fa‘apea lava Keriso.
13 Auā fo‘i o le Agaga e to‘atasi na papatisoina ai i tatou uma i le tino e tasi, po o Iutaia, po o Eleni, po o pologa, po o sa‘oloto; ma ‘ua fa‘ainumia i tatou uma i le Agaga e to‘atasi.
14 Auā fo‘i o le tino e lē se itū tino e tasi lea, ‘ae peita‘i o itū tino e lasi.
15 ‘Āfai e fai mai le vae, “‘Ona ‘ua lē o le lima a‘u, ‘ou te lē so le tino;” e moni ‘ea e lē o lo le tino ia?
16 ‘Āfai e fai mai le taliga, “‘Ona ‘ua lē o le mata a‘u, ‘ou te lē so le tino;” e moni ‘ea, e lē o lo le tino ia?
17 ‘Āfai o mata uma le tino, pe fa‘apefea ‘ona fa‘alogo? ‘Āfai na o le fa‘alogo lava, pe fa‘apefea ‘ona sogi?
18 A o lenei, ‘ua tu‘uina e le Atua itū tino e ta‘itasi ma lana tu i le tino, pei ‘ona finagalo i ai o ia.
19 ‘Āfai fo‘i o mea uma o le itū tino e tasi ia pe fa‘apefea le tino?
20 A o lenei, e lasi itū tino, ‘ae tasi lava le tino ia.
21 E lē mafai fo‘i i le mata ‘ona fai ane i le lima, “E leai sou aogā ‘iā te a‘u;” e lē mafai fo‘i i le ulu ‘ona fai ifo i vae, “Lua te lē aogā ‘iā te a‘u.”
22 ‘Ae peita‘i e sili lava ‘ona aogā itū tino e ta‘ua e vaivai;
23 ma itū tino ‘ua ta‘ua e i tatou e matagā, ‘ua sili lo tatou ta‘ulelei i ai; ma ē ‘ua ta‘ufa‘atauva‘aina, ‘ua sili ‘ona ta‘uleleia ia;
24 a o tatou itū tino ‘ua ta‘uleleia, e leai se mea e mativa ai i latou; a ‘ua fa‘atatauina e le Atua le tino uma, ‘ua ia tu‘uina fo‘i le ‘ava i le itū tino ‘ua vaivai;
25 ‘ina ne‘i i ai i le tino se māseiga, a ‘ia fētausia‘i fa‘atasi uma itū tino.
26 Pe ‘āfai e tigā le tasi itū tino, ‘ia tigā fa‘atasi ai itū tino uma lava; pe vi‘ia le tasi itū tino, ‘ia ‘oli‘oli fa‘atasi ai itū tino uma lava.
27 A o ‘outou, o le tino o Keriso ‘outou, ma itū tino ta‘ito‘atasi.
28 ‘Ua fa‘atūina fo‘i e le Atua i le ekalesia muamua o ‘aposetolo, o lona lua o perofeta, o lona tolu o a‘oa‘o, pito ane i ai o ē fai vāvega, i le ma ē maua mea alofa e fa‘amālōlō a‘i ma‘i, o ē fesoasoani, o ta‘ita‘i, o ē tautala i gagana.
29 O ‘aposetolo uma ‘ea? O perofeta uma ‘ea? O a‘oa‘o uma ‘ea? o fai vāvega uma ‘ea?
30 ‘ua tofu uma ‘ea ma mea alofa e fa‘amālōlō a‘i ma‘i? E tautala uma lava ‘ea i gagana? E fa‘amatala uma ‘ea?
31 ‘Ia ‘outou naunau i mea alofa e sili; ‘ae peita‘i ‘ou te fa‘asino atu ‘iā te ‘outou le ala e silisili lava.#