1 ‘Ua salalau le tala o ‘iā te ‘outou le faita‘aga, o le faita‘aga fa‘apea fo‘i e lē o ta‘ua i nu‘u ‘ese, ‘ina ‘ua fai avā le tasi i le avā a lona tamā.
2 O ‘outou fo‘i, ‘ua ‘outou loto fefete ‘ea? ‘Ae tou te lē fa‘anoanoa ‘ea, ‘ina ‘ia tu‘u‘eseina ‘iā te ‘outou lē ‘ua faia lenā mea?
3 O a‘u fo‘i, o lo‘o lē i ai lo‘u tino ‘iā te ‘outou, a ‘ua ‘iā te ‘outou lo‘u loto, ‘ua uma ‘ona ‘ou fa‘amasino i lē ‘ua faia fa‘apea lenā mea, peiseaī ‘ua ‘ou i ai lava,
4 pe a fa‘apotopotoina ‘outou fa‘atasi ma lo‘u agaga, ma le mana o le tatou Ali‘i o Iesu Keriso, o le suafa o lo tatou Ali‘i o Iesu Keriso,
5 tou te tu‘uina atu ai lē ‘ua fa‘apea ‘iā Satani e fano ai le tino, ‘ina ‘ia sao le agaga i le aso o le Ali‘i o Iesu.
6 E lē tusa lo ‘outou mitamita. Tou te lē iloa ‘ea o se mea fa‘afefete itiiti, e fa‘afefeteina ai le paluga falaoa uma lava?
7 O le mea lea ‘ia ‘outou fa‘ate‘a ‘ese ai le mea fa‘afefete tuai, ‘ina ‘ia ‘avea ‘outou ma paluga fou ‘ona ‘ua leai o se mea fa‘afefete ‘iā te ‘outou; auā fo‘i o Keriso la tatou paseka ‘ua fasia mo i tatou.
8 o lenei, ‘aua tatou te faia le tausamiga ma le mea fa‘afefete tuai, o le loto leaga ma le amio leaga; a ‘ia faia ma le mea e lē fa‘afefeteina, o le loto lelei ma le fa‘amaoni.
9 ‘Ua ‘ou tusi atu ‘iā te ‘outou i la‘u tusi, ‘aua tou te feoa‘i ma ē faita‘aga.
10 E lē fa‘asino lea i ē faita‘aga i lenei lalolagi, ‘atoa ma ē matape‘ape‘a, ma ē fao mea ma ē ifo i tupua; ‘ana fa‘apea, e ao ‘ina ‘outou ō ‘ese atu i le lalolagi.
11 A o lenei, ‘ua ‘ou tusi atu ‘iā te ‘outou, ‘ai se tasi ‘ua ta‘uusoina ‘ae faita‘aga, pe matape‘ape‘a, pe ifo i tupua, pe agatele, pe ‘onā, pe fao mea; ‘aua lava ne‘i tou feoa‘i, ‘aua fo‘i tou te ‘a‘ai fa‘atasi ma lē o fa‘apea.
12 Auā o ‘iā te a‘u ‘ea ‘ona fa‘amasino i ē ‘ua i tua? O ‘outou e fa‘amasino i ē ‘ua i totonu;
13 a o ē i tua, e fa‘amasinoina i latou e le Atua. “O lenei, ‘ia fa‘ate‘a‘eseina e ‘outou lenā tagata amio leaga ‘iā te ‘outou.”#