1 ‘Ia ‘outou tausisi i le alofa; ‘ia naunau fo‘i i nisi meaalofa fa‘aleagaga ‘ae maise lava ‘ia mafai e ‘outou ‘ona perofeta ane.
2 Auā o lē tautala i le gagana uiga ‘ese, e lē tautala ia i tagata, a o le Atua; auā e leai se lagona, ‘ae tautala ia i le Agaga i mea lilo;
3 a o lē perofeta ane, e tautala ia i tagata, ‘ina ‘ia fa‘amafanafana ai, ma apoapoa‘i ai ma fetōma‘i ai.
4 O lē tautala i le gagana uiga ‘ese e fa‘amafanafana e ia ‘iā te ia lava; a o lē perofeta ane, e fa‘amafanafana ia i le ekalesia.
5 ‘Ou te loto ‘ina ‘ia ‘outou tautala uma i gagana uiga ‘ese, ‘ae sili lo‘u loto ‘ina ‘ia ‘outou perofeta ane; auā e sili lē perofeta ane i lē tautala i gagana uiga ‘ese, vaganā ‘ua fa‘amatalaina ‘ina ‘ia fa‘amafanafanaina le ekalesia.
6 A o lenei, le ‘au uso e, ‘āfai ‘ou te alu atu ‘iā te ‘outou ma tautala i gagana ‘ese, se a ‘ea so‘u aogā ‘iā te ‘outou, pe ‘āfai ‘ou te lē tautala atu ‘iā te ‘outou i le fa‘aaliga, po o le malamalama, po o le perofeta ane, po o le a‘oa‘o atu?
7 O mea fo‘i e lē ola ‘ua ta‘alili mai leo, po o le fagufagu, po o le kitara, a lē fēfatifatia‘i leo, e iloa ‘ea fa‘apefea le mea ‘ua ilia mai, po o le mea ‘ua taia mai?
8 Auā fo‘i a fa‘alētonu le leo o le pū, o ai ‘ea sē na te sauni e tau!
9 E fa‘apea fo‘i ‘outou, ‘āfai tou te lē sauniuni atu i o ‘outou laulaufaiva ni ‘upu matala, e iloa ‘ea fa‘apefea le ‘upu ‘ua tautala a‘i? Auā e tautala atu ‘outou i le gaogao.
10 Atonu e tele lava leo i le lalolagi, ‘ae tofu ma lona uiga.
11 O lenei, ‘āfai ‘ou te lē iloa le uiga o le leo, ‘ua ‘avea a‘u ma tagata o le nu‘u ‘ese i lē tautala mai; o lē tautala mai fo‘i, o le tagata o le nu‘u ‘ese o ia ‘iā te a‘u.
12 ‘Ia fa‘apea fo‘i ‘outou, ‘ina ‘ua ‘outou naunau i mea fa‘aleagaga, sā‘ili‘ili ia ‘ina ‘ia sili ‘outou i le fa‘amafanafanaina o le ekalesia.
13 O lenei, o lē tautala i le gagana uiga ‘ese, ‘inā tatalo ia o ia, ‘ina ‘ia mafai ‘ona fa‘amatalaina e ia.
14 Auā ‘āfai ‘ou te tatalo i le gagana uiga ‘ese, ‘ua tatalo ai lo‘u agaga, a ‘ua lē fua mai ni fua e lo‘u mafaufau.
15 ‘Ia, a fa‘apefea? ‘Ou te tatalo i le agaga, ‘ou te tatalo fo‘i i le mafaufau; ‘ou te pese i le agaga, ‘ou te pese fo‘i i le mafaufau.
16 A lē fa‘apea, pe a e fa‘afetai i le agaga, pe fa‘apefea ‘ona “Amene” mai i lau fa‘amanū o lē nofo i le mea e nofo ai le tagata le a‘oa‘oina, ‘ina ‘ua lē lagona e ia lau ‘upu?
17 Auā ‘ua mālie lava lau fa‘amanū, a ‘ua lē fa‘amafanafanaina le tasi.
18 ‘Ou te fa‘afetai i lo‘u Atua, ‘ina ‘ua tele la‘u tautala i gagana ‘ese‘ese, ‘ae itiiti a ‘outou uma lava;
19 ‘ae peita‘i ‘ou te loto ‘ina ‘ia ‘ou tautala i le ekalesia i ni ‘upu se lima ma lo‘u mafaufau, ‘ina ‘ia ‘ou a‘oa‘o atu i nisi, ‘ae ‘ou te lē loto i ni ‘upu se mano i se gagana ‘ese.
20 Le ‘au uso e, ‘aua tou te fa‘atamaiti i le mafaufau; peita‘i ane ia ‘outou fa‘atamameamea i le leaga, a ‘ia ‘outou tagata matutua i le mafaufau.
21 ‘Ua tusia i le tulafono,“‘Ua fetalai mai le Ali‘i,‘Ou te tautala atu i lenei nu‘u, i gagana ‘ese‘ese ma laugutu ‘ese;‘ae ui lava ‘ina fa‘apea,latou te lē fa‘alogo mai lava ‘iā te a‘u.”
22 O lenei, o gagana ‘ese‘ese, e lē fai ma fa‘ailoga ia i ē fa‘atuatua, a o ē lē fa‘atuatua; a o lē perofeta ane, e lē se fa‘ailoga lea mo ē lē fa‘atuatua a o ē fa‘atuatua.
23 ‘Āfai fo‘i e fa‘apotopoto le ekalesia uma ma latou tautala uma i gagana uiga ‘ese, a ulufale atu ni tagata lē a‘oa‘oina, po o ē lē fa‘atuatua, e lē ta‘uvaleleaina ‘ea ‘outou e i latou?
24 ‘Ae ‘āfai e perofeta ane uma, ‘ae ulufale atu se tasi, o sē lē fa‘atuatua, po o se tagata lē a‘oa‘oina, ‘ua a‘oa‘iina o ia e i latou uma, ‘ua fa‘amasinoina e i latou uma.
25 ‘Ua aliali mai ai fo‘i mea lilo o i lona loto, ‘ona fa‘apa‘ū faō ai lea o ia, ma ifo atu i le Atua, ma talatala, “E moni, o ‘iā te ‘outou le Atua.”
26 O lenei, le ‘au uso e, pe fa‘apefea? Pe a ‘outou potopoto, ‘ua tofu ‘outou ma le pese, ‘ua i ai le matā‘upu, ‘ua i ai le gagana, ‘ua i ai le fa‘aaliga, ‘ua i ai lē fa‘amatalaga; ‘ia faia mea uma e i‘u ai i le fa‘amafanafanaina.
27 ‘Āfai e tautala se tasi i le gagana ‘ese, ‘ia tautala se to‘alua, po o se to‘atolu e gata ai, ma ‘ia feaua‘i; ma ia fa‘amatala e se tasi.
28 ‘Ae ‘āfai e leai sē na te fa‘amatalaina, ‘aua le tautala o ia i le ekalesia; a ‘ia tautala o ia ‘iā te ia lava ma le Atua.
29 ‘Ia tautala perofeta e to‘alua, pe to‘atolu ma ‘ia fa‘amasinoina e nisi.
30 ‘Ae ‘āfai ‘ua fa‘aalia se mea i se tasi o lo‘o nofo mai, ‘ia fa‘alologo lē na muamua.
31 Auā tou te mafaia ‘ona perofeta uma ta‘ito‘atasi, ‘ina ‘ia a‘oa‘oina uma, ma ia fa‘amafanafanaina uma.
32 E usiusita‘i fo‘i agaga o perofeta i perofeta.
33 Auā o le Atua, e lē o le Atua ia o le fa‘asoesā, a o le filemū; fa‘apei o i ekalesia uma o le ‘au pa‘ia.
34 ‘Aua ne‘i tautala fafine i ekalesia; auā e lē tu‘uina ‘iā te i latou e tautala; a ‘ia latou usiusita‘i, pei ‘ona fai mai ai fo‘i o le tulafono.
35 ‘Āfai fo‘i ‘ua latou fia iloa se tasi mea, ‘ia latou fesili atu ai ‘iā latou lava tane i o latou fale; auā o le mea matagā ‘ona tautala o le fafine i le ekalesia.
36 Na alu atu ‘ea le ‘upu a le Atua nai ‘iā te ‘outou? Po ‘ua na o ‘outou ‘ea na o‘o atu i ai?
37 ‘Ai sē tasi ‘ua ta‘ua o le perofeta, po o lē ‘ua i ai le Agaga, ‘ia iloa lelei e ia, o mea ‘ou te tusi atu nei ‘iā te ‘outou, o poloa‘iga ia a le Ali‘i.
38 ‘Ae ‘āfai e tete‘e lenei mea e se tasi, e te‘ena fo‘i o ia.
39 O lenei, le ‘au uso e, ‘ia ‘outou naunau ‘ina ‘ia perofeta; ‘aua fo‘i ne‘i vavao le tautala i gagana uiga ‘ese.
40 ‘Ia faia mea uma lava ma le matagofie ma le sauni lelei.#