1 O ia ona po ‘ua lagona ai e le tupu o Herota le tala ‘iā Iesu;
2 ‘ona fai atu lea o ia i ana ‘au‘auna, “O Ioane le papatiso lenā; ‘ua tu mai o ia i ē ‘ua oti; o le mea fo‘i lea ‘ua fai ai vāvega e ia.”
3 Auā na pu‘e e Herota ‘iā Ioane, ‘ua fusifusi fo‘i ‘iā te ia ma tu‘uina atu o ia i le fale puipui, ‘ona o Herotia le avā a Filipo lona uso.
4 Auā ma fai atu Ioane ‘iā te ia, “E sā ‘ona fai o ia mau avā.”
5 A o Herota ‘ua fia fasioti ‘iā te ia, a ‘ua mata‘u i le motu o tagata, auā o la latou tāofi o le perofeta o ia.
6 ‘Ua o‘o ‘ina fai le fa‘amanatuga o le aso na fānau mai ai Herota, na sa‘asa‘a i o latou luma le tama teine a Herotia, na ia fa‘afiafia fo‘i ‘iā Herota.
7 O le mea lea na ia matuā fai atu ai ‘iā te ia ma le augani na te avatu ‘iā te ia se mea na te ole mai ai.
8 A o ia, ‘ua fa‘aosoina e lona tinā, ‘ua fai atu, “‘Ia e ‘aumai ‘i‘inei ‘iā te a‘u le ulu o Ioane le papatiso i se tanoa.”
9 ‘Ona tigā ai lea o le tupu; a ‘ona o le augani ma ē ‘ua ta‘o‘oto e ‘a‘ai fa‘atasi ma ia, ‘ua ia poloa‘i atu e avatua.
10 ‘Ona ‘auina atu ai lea e ia se tasi, ‘ua vavae mai le ulu o Ioane i le fale puipui.
11 ‘Ona ‘aumai ai lea o lona ulu i le tanoa, ‘ua avane i le teine, ‘ua na ‘aveina atu fo‘i i lona tinā.
12 ‘Ona ō ane ai lea o ona so‘o, ‘ua ‘ave le tino, ‘ua tanu ai; ‘ua latou ō mai fo‘i ma ta‘u mai ‘iā Iesu.
13 ‘Ua fa‘afofoga i ai Iesu, ‘ona maliu ‘ese ai lea o ia i lea mea i le va‘a i le mea tu‘ufua ‘ua nā o ia. ‘Ua fa‘alogo ai le motu o tagata, ‘ona latou mulimuli atu ai lea ‘iā te ia ‘ua ui a uta mai ‘a‘ai.
14 ‘Ua maliu atu Iesu, ‘ua na silafia le motu o tagata e to‘atele, ‘ona mutimutivale ai lea o lona alofa ‘iā te i latou, ‘ua fa‘amālōlō fo‘i e ia o latou ma‘i.
15 ‘Ua o‘o i le afiafi, ‘ona ō mai ai lea o ona so‘o ‘iā te ia, ‘ua fa‘apea mai, “O le mea tu‘ufua lenei, ‘ua leva fo‘i le aso; ‘ia e tu‘uina atu le motu o tagata, ‘ina ‘ia latou ō i ‘a‘ai e fa‘atau ni mea e ‘ai mā latou.”
16 A ‘ua fetalai atu Iesu ‘iā te i latou, “E lē aogā ‘ona latou ō; ‘ia ‘outou avane ni mea latou te ‘a‘ai ai.”
17 ‘Ona latou fai mai lea ‘iā te ia, “E leai ni a tatou mea ‘i‘inei, ‘ua nā o areto e lima ma i‘a e lua.”
18 ‘Ua fetalai atu o ia, “‘Aumaia ‘i‘inei ‘iā te a‘u.”
19 ‘Ona fetalai atu ai lea o ia i le motu o tagata ‘ia latou ta‘o‘oto i le mutia. ‘Ona tago lea o ia i areto e lima ma i‘a e lua, ‘ua tepa a‘e i le lagi, ‘ua fa‘afetai; ‘ua ia tofitofi fo‘i i areto, ma avatu i le ‘au so‘o, ‘ona avatu ai lea e le ‘au so‘o i le motu o tagata.
20 ‘Ona ‘a‘ai ai lea o i latou uma lava, ‘ua mā‘o‘ona; ‘ua latou fu‘e fo‘i toe ‘aiga, ‘ua tūtūmu ai ‘ato e sefulu ma le lua.
21 O i latou fo‘i na ‘a‘ai pe limaafe o tane, ‘ae le‘i faitaulia fafine ma tamaiti.
22 ‘Ona u‘una‘i loa lea o Iesu ona so‘o e ō a‘e i le va‘a, e muamua atu ‘iā te ia i le tasi itū, se‘ia tu‘uina atu e ia le motu o tagata ‘ia ō.
23 ‘Ua tu‘uina atu e ia le motu o tagata ‘ia ō, ‘ona maliu a‘e lea ‘ua nā o ia i le mauga e tatalo. ‘Ua o‘o i le afiafi, ‘ua nā o ia sa i ai.
24 A o le va‘a ‘ua i totonu o le vasa ‘ua felafoa‘iina i le sou; auā ‘ua agi mai i luma le matagi.
25 ‘Ua maliu atu Iesu ‘iā te i latou i le leoleoga e fa o le po, ‘ua savali i luga o le vai.
26 ‘Ua iloa mai e le ‘au so‘o o ia ‘ua savali i luga o le vai, ‘ona latou atuatuvale ai lea, ‘ua fa‘apea ane, “O le aitu;” ‘ona latou uiō lea i le matata‘u.
27 ‘Ona fetalai atu loa lea o Iesu ‘iā te i latou ‘ua fa‘apea atu, “‘Ia ‘outou loto tetele; o a‘u lava, ‘aua tou te matata‘u.”
28 ‘Ua tali mai Peteru ‘iā te ia, ‘ua fa‘apea mai, “Le Ali‘i e, ‘āfai o oe, ‘ia e fetalai mai ‘iā te a‘u, ‘ou te alu atu ‘iā te oe i luga o le vai.”
29 ‘Ona fetalai atu lea o ia, “‘Inā sau ia.” ‘Ona alu ifo ai lea o Peteru mai le va‘a, ‘ua savali i luga o le vai e alu ‘iā Iesu.
30 ‘Ua va‘ai o ia i le matagi ‘ua tetele, ‘ona fefe ai lea; ‘ona āfua ai lea ‘ona goto, ‘ua ‘alaga mai, ‘ua fa‘apea mai, “Le Ali‘i e, ‘ia e fa‘aola mai ‘iā te a‘u.”
31 ‘Ona ‘a‘apa atu loa lea o Iesu o lona ‘a‘ao, ‘ua tago ‘iā te ia, ‘ua fa‘apea atu ‘iā te ia, “O oe na, lē fa‘atuatua itiiti, se ā le mea ‘ua e māsalosalo vale ai?”
32 ‘Ona la ō a‘e lea i le va‘a ‘ona malū ai lea o le matagi.
33 ‘Ona ō mai ai lea o ē na i le va‘a ‘ua ifo mai ‘iā te ia, ‘ua fa‘apea mai, “E moni, o oe lava o le Alo o le Atua.”
34 ‘Ua ō atu i latou i le tasi itū, ‘ua o‘o i le nu‘u, o Kenesareta.
35 ‘Ua iloa mai o ia e tagata o lea nu‘u, ‘ona latou fe‘au atu ai i lea itū uma lava, ‘ua latou ‘aumai ai ‘iā te ia o ē mama‘i uma lava;
36 ma ‘ua latou ‘ai‘oi ‘iā te ia, tau lava ‘ina latou papa‘i i le tu‘upao o lona ‘ofu; ‘ua fa‘amālōlōina fo‘i o i latou uma o ē na papa‘i mai i ai.#