1 ‘Ua fānau Iesu i Peteleema i Iutaia i ona po o Herota le tupu, fa‘auta, ‘ua o‘o mai ai makoi mai sasa‘e i Ierusalema,
2 ‘ua fa‘apea mai, “Po o fea o i ai lē ‘ua fānau mai o le tupu o tagata Iutaia? auā ‘ua matou va‘aia lona fetū i sasa‘e ‘ua matou ō mai ai e ifo atu ‘iā te ia.”
3 ‘Ua fa‘alogo i ai Herota le tupu, ‘ona atuatuvale ai lea o ia ‘atoa fo‘i ma Ierusalema uma.
4 ‘Ona ia fa‘apotopotoina ai lea o le ‘au ositaulaga sili uma ma le ‘au tusi‘upu o le nu‘u, ‘ua fesili atu ‘iā te i latou, “Po o fea o fānau ai le Keriso.”
5 ‘Ona latou fai mai ai lea ‘iā te ia, “O Peteleema i Iutaia; auā ‘ua fa‘apea ‘ona tusia e le perofeta,
6 ‘O oe fo‘i Peteleema i le nu‘u o Iuta‘e te lē topito ‘ona fa‘atauva‘a i ali‘i o Iuta;auā e tupu mai ‘iā te oe le faipule,o lē na te pule i lo‘u nu‘u o Isaraelu.’”
7 ‘Ua ‘a‘ami lemū ane e Herota o makoi, ‘ona matuā su‘esu‘e ai lea ‘iā te i latou i ona po na iloa ai le fetū.
8 ‘Ona ia ‘a‘auina atu ai lea o i latou i Peteleema ‘ua fa‘apea atu, “Ō atu ia ‘outou, ‘inā matuā sā‘ili ia i le tamaitiiti; pe a ‘outou iloa, ‘ia ‘outou fa‘ailoa mai ‘iā te a‘u, o a‘u fo‘i ‘ou te alu atu ai e ifo atu ‘iā te ia.”
9 ‘Ua latou fa‘alogo atu i le tupu, ‘ona latou ō ai lea, fa‘auta fo‘i, o le fetū na iloa e i latou i sasa‘e, ‘ua muamua atu ‘iā te i latou ‘ua o‘o ‘ina tu mai i luga o le mea ‘ua i ai le tamaitiiti.
10 ‘Ua latou iloa le fetū ‘ona matuā tele ai lea o lo latou fiafia.
11 ‘Ua latou ulufale atu i le fale, ‘ua latou iloa ai le tamaitiiti ma Maria lona tinā, ‘ona latou fa‘apa‘u‘ū ai lea, ma ifo atu ‘iā te ia; ‘ua talai fo‘i o latou ‘oloa ‘ona latou avatu ai lea ‘iā te ia o mea alofa o le auro, ma le pulu lipano, ma le pulu muro.
12 ‘Ua fa‘ailoa ‘iā te i latou i le miti, ‘aua ne‘i fo‘i atu ‘iā Herota, ‘ona latou ō atu ai lea i lo latou nu‘u i le tasi ala.
13 ‘Ua ō i latou fa‘auta o le agelu a le Ali‘i ‘ua fa‘aali mai ‘iā Iosefa i le miti ‘ua fa‘apea mai, “Tula‘i ia, ‘inā ‘ave le tamaitiiti ma lona tinā ma sōsōla i Aikupito, ma nonofo ai se‘ia ‘ou fai atu ‘iā te oe; auā o le a sā‘ili Herota i le tamaitiiti ‘ina ‘ia fasioti ‘iā te ia.”
14 ‘Ua tula‘i Iosefa, ‘ua ‘ave le tamaitiiti ma lona tinā i le po, ‘ona ō atu lea i Aikupito.
15 Sa i ai fo‘i o ia ‘ua o‘o ‘ina oti o Herota; ‘ina ‘ia taunu‘u ai le afioga a le Ali‘i i le perofeta, ‘ua fa‘apea mai, “Na ‘ou vala‘auina lo‘u atali‘i a‘i Aikupito.”
16 ‘Ua iloa e Herota ‘ua ‘olegia o ia e makoi, ‘ona tele ai lea o lona ita, ‘ua ‘a‘auina atu e ia nisi e fasioti i tama tane uma i Peteleema e o‘o i ona tuā‘oi uma, e āfua i ē ‘ua lua o latou tausaga ‘atoa ma ē ‘ua pito ane i ai, e fa‘atatau i ona po sa matuā su‘eina atu ai i makoi.
17 ‘Ona taunu‘u lea o le ‘upu a le perofeta o Ieremia, ‘ua fa‘apea mai,
18 “‘Ua lagona le leo i Rama,o le auega, o le fētāgisi ma le tagitu‘i tele;‘ua tagiauē Rasela i lana fānau,e lē mafai fo‘i ‘ona fa‘anāina o ia ‘ona o i latou ‘ua leai.”
19 ‘Ua oti Herota, fa‘auta, o le agelu a le Ali‘i ‘ua fa‘aali mai i Iosefa i le miti i Aikupito,
20 ‘ua fa‘apea mai, “Tula‘i ia, ‘inā ‘ave le tamaitiiti ma lona tinā, ‘inā ō atu ia i le nu‘u o Isaraelu; auā ‘ua oti ē na sā‘ilia le tamaitiiti e fasioti.”
21 ‘Ona tula‘i ai lea o Iosefa ‘ua ‘ave le tamaitiiti ma lona tinā, ‘ona ō ai lea i le nu‘u o Isaraelu.
22 A ‘ua fa‘alogo o ia ‘ua fai ma tupu i Iutaia o Arekilao o le sui o Herota lona tamā, ‘ona fefe ai lea i alu i ai. ‘Ae peita‘i ‘ua fa‘ailoa ‘iā te ia i le miti, ‘ona alu ai lea o ia i le nu‘u o Kalilaia.
23 ‘Ua o‘o fo‘i i le tasi ‘a‘ai e igoa o Nasareta, ‘ua nofo ai; ‘ina ‘ia taunu‘u ai le ‘upu a le ‘au perofeta, “E igoa o ia o le Nasareta.”#