1 “O ia ona po e tusa ai le mālō o le lagi ma taupou e to‘asefulu, o ē na ‘ave a latou lamepa ma latou ō atu e fa‘afetaia‘i i le fa‘ato‘āfaiavā.
2 ‘Ua popoto le to‘alima o i latou, ‘ae vālea le to‘alima.
3 O ē vālea ‘ua ‘ave a latou molī, ‘ae le‘i ‘avea ma ni suāu‘u.
4 A o ē popoto ‘ua ‘ave ni suāu‘u ‘iā latou fagu fa‘atasi ma a latou molī.
5 ‘Ua tuai mai le fa‘ato‘āfaiavā, ‘ona taufaitulemomoe ai lea o i latou uma, ‘ua momoe lava.
6 “A ‘ua o‘o i le tulua o po, ‘ona sau ai lea o le ‘alaga, ‘Fa‘auta, ‘ua sau le fa‘ato‘āfaiavā; ‘inā ō ia ‘outou e fa‘afetaia‘i ‘iā te ia.’
7 ‘Ona tutū ai lea o ia taupou uma lava, ma teuteu a latou molī.
8 ‘Ona fai atu ai lea o ē vālea i ē popoto, ‘‘Aumai ni a ‘outou suāu‘u mā matou; auā o le a mamate a matou molī.’
9 A ‘ua tali mai o ē popoto, ‘ua fa‘apea mai, ‘Ne‘i lē lava ‘iā i matou ma ‘outou; ‘ae lelei ‘ona ‘outou ō i ē fa‘atau ma fa‘atau mai ai ni a ‘outou.’
10 ‘Ua latou ō e fa‘atau, ‘ona sau ai lea o le fa‘ato‘āfaiavā; o ē ‘ua saunia fo‘i ‘ua latou ulufale atu fa‘atasi ma ia i le tausama‘aga, ‘ona pupuni ai lea o le faitoto‘a.
11 “E mulimuli ane, ‘ona ō mai ai lea o isi taupou, ‘ua fa‘apea mai, ‘Le ali‘i e, le ali‘i e, ‘ia e tatala mai le faitoto‘a mo i matou.’
12 A ‘ua tali atu o ia, ‘ua fa‘apea atu, ‘E moni, ‘ou te fai atu ‘iā te ‘outou ‘ou te lē iloa ‘outou.’
13 O lea, ‘ia ‘outou mataala ai, auā tou te lē iloa le aso po o le itū aso.
14 “E fa‘apei o le tagata fo‘i na alu malaga, ‘ua vala‘au i ana ‘au‘auna, ‘ona tu‘uina atu ai lea e ia o ana mea ‘iā te i latou.
15 ‘Ua avatu e ia taleni e lima i le tasi, ‘ae lua i le tasi, ‘ae tasi i le tasi; ‘ua fa‘atatau i le mea ‘ua mafai ai e le tagata; ‘ona alu loa lea o ia i lana malaga.
16 ‘Ona alu ai lea o lē na i ai taleni e lima ‘ua fa‘atau atu ai, ‘ua maua ai fo‘i isi taleni e lima.
17 ‘Ua fa‘apea fo‘i i lē na i ai taleni e lua, ‘ua maua ai fo‘i e ia le tasi lua.
18 A o lē na i ai le tasi, ‘ua alu ma ‘eli i le ‘ele‘ele, ‘ua nanā ai ario a lona ali‘i.
19 “‘Ua mavae po e tele, ‘ona sau ai lea o le ali‘i o ia ‘au‘auna, ‘ua fa‘amasino i ana mea ‘ua ‘iā te i latou.
20 ‘Ona sau ai lea o lē ‘ua i ai taleni e lima, ‘ua ‘aumai isi taleni e lima, ‘ua fa‘apea mai, ‘Le ali‘i e, na e tu‘uina mai ‘iā te a‘u taleni e lima; fa‘auta, ‘ua ‘ou maua ai isi taleni e lima.’
21 ‘Ona fai atu ai lea o lona ali‘i ‘iā te ia, ‘‘Ua lelei ia, le ‘au‘auna lelei e, ma le fa‘amaoni, ‘ua e fa‘amaoni i nai mea itiiti, ‘ou te tofia oe e pule i mea e tele; ‘inā ulufale mai ia i le fiafia o lou ali‘i.’
22 “‘Ua sau fo‘i lē ‘ua i ai taleni e lua, ‘ua fa‘apea mai, ‘Le ali‘i e, na e tu‘uina mai ‘iā te a‘u taleni e lua; fa‘auta, ‘ua ‘ou maua ai isi taleni e lua.’
23 ‘Ona fai atu ai lea o lona ali‘i ‘iā te ia, ‘‘Ua lelei ia, le ‘au‘auna lelei e, ma le fa‘amaoni, ‘ua e fa‘amaoni i mea itiiti, ‘ou te tofia oe e pule i mea e tele; ‘inā ulufale mai ia i le fiafia o lou ali‘i.’
24 “‘Ua sau fo‘i lē ‘ua i ai le taleni e tasi, ‘ua fa‘apea mai, ‘Le ali‘i e, ‘ua ‘ou iloa o oe o se tagata faigatā, ‘ua e selesele i mea ‘e te le‘i lūlūina ai saito, ‘ua e fa‘apotopoto fo‘i i le mea ‘e te le‘i fa‘ata‘ape‘apeina ai mea;
25 ‘ona ‘ou fefe ai lea, ‘ua ‘ou alu ma ‘ou nanā lau taleni i le ‘ele‘ele; fa‘auta o lau mea lea.’
26 ‘Ona tali atu ai lea o lona ali‘i, ‘ua fa‘apea atu ‘iā te ia, ‘Le ‘au‘auna leaga e, ma le paiē, ‘ua e iloa ‘ou te selesele le mea na ‘ou lē lūlūina ai saito ‘ou te fa‘apotopoto fo‘i i le mea na ‘ou lē fa‘ata‘ape‘apeina ai mea;
27 o lea, e tatau ai pe ‘ana e tu‘uina atu la‘u ario i ē fa‘atau tupe, po ‘ua ‘ou sau, ‘ona ‘ou maua ai lea o la‘u mea ma lona taui.
28 O lenei, ‘ia ‘outou fao le taleni na ‘iā te ia, ma avatu i lē ‘ua i ai taleni e sefulu.
29 Auā o sē ‘ua i ai ni mea, e foa‘iina atu ‘iā te ia e atili tele ai ana mea; a o lē ‘ua lē i ai ni mea, e faoa le mea ‘ua i ai.
30 ‘Ia ‘outou tulia fo‘i le ‘au‘auna lē aogā i le pouliuli i fafo, e i ai le taufaitagiauē ma le lilivau o nifo.’
31 “Pe a sau le Atali‘i o le tagata i lona mamalu ma le ‘au agelu pa‘ia uma fa‘atasi ma ia, ‘ona ti‘eti‘e ai lea o ia i lona nofoāli‘i mamalu.
32 E fa‘apotopotoina fo‘i i ona luma o nu‘u uma lava; ‘ona tu‘u‘ese‘eseina lea o i latou e ia, e pei o le leoleo mamoe ‘ona tu‘u‘ese‘eseina o mamoe ma ‘oti.
33 ‘Ona tu‘u ai lea e ia o mamoe i lona itū taumatau, a o ‘oti i lona itū tauagavale.
34 ‘Ona fai atu ai lea o le Tupu i ē o i lona itū taumatau, ‘Ō mai ia, o ‘outou ‘ua fa‘amanuiaina e lo‘u Tamā, ‘ia fai mo ‘outou le tofi o le mālō ‘ua saunia mo ‘outou a o le‘i fa‘avaeina le lalolagi;
35 auā na ‘ou fia ‘ai, ‘ona ‘outou avane ai lea ni mea ‘ou te ‘ai ai; na ‘ou fia inu, ‘ona ‘outou avane ai lea ni vai ‘ou te inu ai; sā fai a‘u ma tagata ‘ese, ‘ona ‘outou talia lea o a‘u;
36 na ‘ou lē lavalavā, ‘ona ‘outou fa‘a‘ofuina lea o a‘u; na ‘ou ma‘i, ‘ona ‘outou asiasia mai lea o a‘u; na ‘ou i le fale puipui, ‘ona ‘outou ō ane ai lea ‘iā te a‘u.’
37 ‘Ona tali mai ai lea ‘iā te ia o ē amiotonu, ‘ua fa‘apea mai, ‘Le Ali‘i e, o anafea na matou iloa ai oe ‘ua fia ‘ai, ma matou fagaina oe? Po o fia inu, na matou avane ‘e te inu ai?
38 O anafea fo‘i na matou iloa ai oe o le tagata ‘ese, ma matou talia oe, po o le lē lavalavā, ma matou a fa‘a‘ofuina oe?
39 o anafea fo‘i na matou iloa ai oe ‘ua ma‘i, po o i le fale puipui, ma matou ō atu ai ‘iā te oe?’
40 ‘Ona tali atu ai lea o le Tupu, ‘ua fa‘apea atu ‘iā te i latou, ‘E moni, ‘ou te fai atu ‘iā te ‘outou, auā na faia e ‘outou i le tasi o ē aupito itiiti o o‘u uso nei, o a‘u lea na ‘outou faia i ai.’
41 “‘Ona fai atu fai lea o ia i ē o i lona itū tauagavale, ‘O ‘outou ‘ua fa‘afanoina, ō ‘ese atu ia ‘iā te a‘u i le afi e fa‘avavau, ‘ua saunia mo le tiapolo ma ana agelu.
42 Auā na ‘ou fia ‘ai, ‘ae tou te le‘i avane ni mea ‘ou te ‘ai ai; na ‘ou fia inu, ‘ae tou te le‘i avane ni vai ‘ou te inu ai;
43 sa fai a‘u ma tagata ‘ese, ‘ae le‘i talia a‘u e ‘outou; na ‘ou lē lavalavā, ‘ae tou te le‘i fa‘a‘ofuina a‘u; na ‘ou ma‘i, na a‘u i le fale puipui fo‘i, ‘ae tou te le‘i asiasia a‘u.’
44 “‘Ona tali mai ai lea o i latou fo‘i ‘iā te ia, ‘ua fa‘apea mai, ‘Le Ali‘i e, o anafea na matou iloa ai oe ‘ua e fia ‘ai, Pe fia inu, po o se tagata ‘ese, po o lē lavalavā, po o ma‘i, po o i le fale puipui, matou le‘i ‘au‘auna atu ‘iā te oe?’
45 ‘Ona tali atu ai lea o ia ‘iā te i latou, ‘ua fa‘apea atu, ‘E moni, ‘ou te fai atu ‘iā te ‘outou, auā na ‘outou lē faia i le tasi o ē aupito itiiti o i latou nei, o a‘u lea ‘ua ‘outou lē faia i ai.’
46 ‘Ona ō atu ai lea o i latou nā i le sala e fa‘avavau; a o ē amiotonu e ō atu i le ola e fa‘avavau.”#