1 ‘Ona ulufafo lea o Iesu, ‘ua maliu ‘ese i le malumalu; ‘ona ō mai ai lea o ona so‘o ‘iā te ia e fa‘asino ‘iā te ia i fale o le malumalu.
2 A ‘ua fetalai atu Iesu ‘iā te i latou, “‘Ua ‘outou lē iloa ‘ea nei mea uma? E moni, ‘ou te fai atu ‘iā te ‘outou, e lē toe i ai se ma‘a i luga o le tasi ma‘a, ‘ae uma ‘ona sōloia i lalo.”
3 ‘Ua nofo o ia i le mauga o Olive, ‘ona ō mai ai lea o le ‘au so‘o ‘iā te ia ‘ua nā o i latou, ‘ua fa‘apea mai, “‘Ia e fetalai mai ‘iā te i matou pe o‘o afea ia mea? Pe se a fo‘i le fa‘ailoga o lou maliu mai ma le gata‘aga o le lalolagi?”
4 ‘Ona tali atu ai lea o Iesu, ‘ua fa‘apea atu ‘iā te i latou, “‘Ia ‘outou, ne‘i fa‘asesēina ‘outou e se tasi.
5 Auā e to‘atele e ō mai i lo‘u igoa, ‘ua fa‘apea ane, ‘O a‘u nei o le Keriso;’ latou te fa‘asesēina fo‘i tagata e to‘atele.
6 E fa‘alogo ‘outou i tau‘a ma tala o tau‘a; ‘ia ‘outou, ne‘i tou atuatuvale; auā e ao ‘ona taunu‘u o nei mea uma, ‘ae le‘i o‘o i le gata‘aga.
7 Auā e si‘i le tau‘a e le tasi nu‘u i le tasi nu‘u, ma le tasi mālō i le tasi mālō; ‘ona o‘o mai ai lea o oge ma fa‘ama‘i ma mafui‘e i lea mea ma lea mea.
8 O nā mea uma o le amataga ia o puapuagā.
9 “‘Ona latou tu‘uina atu ai lea o ‘outou i le puapuagā ma latou fasiotia ‘outou; e ‘inosia fo‘i ‘outou e nu‘u uma ‘ona o lo‘u igoa.
10 O ona po ia e tausuai ai tagata e to‘atele, e fa‘alata le tasi i le tasi, ma feitaga‘i i latou.
11 E tutū mai fo‘i perofeta pepelo e to‘atele, latou te fa‘asesē fo‘i i tagata e to‘atele.
12 E ma‘alili fo‘i le alofa o le to‘atele o tagata, ‘ona ‘ua tupu tele o le amio leaga.
13 A o lē tumau se‘ia o‘o i le gata‘aga, e fa‘aolaina lea.
14 E tala‘iina atu fo‘i lenei tala lelei o le mālō i le atu laulau uma, e fai ma molimau i nu‘u uma; ‘ona o‘o mai ai lea o le gata‘aga.
15 “O le a ‘outou va‘ai i le mea e ‘inosia e fa‘atafunaina ai, ‘ua tu i le mea pa‘ia, e pei ‘ona fai mai ai le perofeta o Tanielu, (o lē faitau i ai, ‘inā malamalama i le uiga o lenei mea)
16 o ē o i Iutaia i ia ona po, ‘ia latou sōsōla i mauga;
17 o lē ‘ua i luga o le fale, ‘aua ne‘i alu ifo, ‘ia e ‘ave se mea ai lona fale;
18 o lē ‘ua i le vao fo‘i, ‘aua ne‘i fo‘i atu e ‘ave ona ‘ofu.
19 ‘Oi talofa fo‘i i fafine totō ma ē failele i ia ona po.
20 A ‘ia ‘outou tatalo ‘ina ne‘i ‘outou sōsōla i le tau ma‘alili, po o le sapati.
21 Auā o ia ona po e o‘o ai le puapuagā tele, e leai sona tusa talu le amataga o le lalolagi, ‘ua o‘o lava i ona po nei; e lē toe fa‘apea fo‘i amulī.
22 A lē fa‘apu‘upu‘uina fo‘i ia aso, e lē fa‘aolaina se tasi; ‘ae fa‘apu‘upu‘uina ia aso ‘ona o ē ‘ua filifilia.
23 ‘Āfai e fai ane se tasi ‘iā te ‘outou ia ona po, ‘Fa‘auta, o ‘i‘inei le Keriso,’ po o ‘‘i‘ilā;’ ‘aua tou te fa‘alogo i ai.
24 Auā e tutū mai Keriso pepelo ma perofeta pepelo, latou te faia fo‘i fa‘ailoga tetele ma vāvega, ‘ina ‘ia fa‘asesē ai i ē ‘ua filifilia lava, pe ‘āfai e mafai ai.
25 Fa‘auta, ‘ua ‘ou mua‘i ta‘uina atu nei mea ‘iā te ‘outou.
26 “O lea, ‘āfai latou te fai mai ‘iā te ‘outou, ‘Fa‘auta, o i le vao o ia;’ ‘aua tou te ō atu i ai; ‘fa‘auta, o i le afeafe o ia;’ ‘aua tou te fa‘alogo i ai.
27 Auā e pei ‘ona ‘emo mai o le uila i sasa‘e ma malamalama atu i sisifo; e fa‘apea fo‘i ‘ona sau o le Atali‘i o le tagata.
28 “Auā o le mea ‘ua i ai le tagata oti, e aofaga i ai aeto.
29 “A mavae atu le puapuagā o ia ona aso,‘ona fa‘apogisāina loa lea o le lā,e lē susulu mai fo‘i le masina,e pa‘u‘ū fo‘i fetū mai le lagi,e lūlūina fo‘i ‘au a le lagi.
30 ‘Ona iloa ai lea i le lagi o le fa‘ailoga o le Atali‘i o le tagata; ‘ona taufaitagitu‘i ai lea o itū‘āiga uma o le lalolagi; ‘latou te iloa atu fo‘i le Atali‘i o le tagata ‘ua sau i ao o le lagi’ ma le mana ma le mamalu tele.
31 E ‘a‘auina atu fo‘i e ia o ana agelu ma le leo tele o le pū, latou te fa‘apotopoto fo‘i i ē ‘ua filifilia e ia mai matāmatagi e fa, e amata i le tasi tulu‘iga, o le lagi e o‘o i le tasi tulu‘iga.
32 “‘Ia ‘outou mataulia le fa‘ata‘oto i le mati; pe a fa‘ato‘ā tutupu ona tātupu ma matala mai ona lau, tou te iloa ai ‘ua latalata le tau vevela.
33 E fa‘apea fo‘i ‘outou, pe a ‘outou iloa ia mea uma, tou te iloa ai, ‘ua latalata o ia, ‘ua i faitoto‘a lava.
34 E moni ‘ou te fai atu ‘iā te ‘outou, E lē mavae atu lava lenei tupulaga, se‘ia o‘o mai nei mea uma.
35 E mavae atu le lagi ma le lalolagi, a o a‘u ‘upu e lē mavae atu lava ia.
36 “A o lea aso ma lea itū aso e lē iloa e se tasi, e lē iloa lava e agelu i le lagi, ‘ua nā o lo‘u Tamā lava.
37 ‘Ae pei o ona po o Noa, e fa‘apea fo‘i pe a sau le Atali‘i o le tagata.
38 Auā e pei ‘ona faia i ona po a o le‘i o‘o le lolo, ‘ua latou ‘a‘ai ma inu, ‘ua latou fai avā fo‘i ma fa‘aavaga, ‘ua o‘o lava i le aso na ulu atu ai Noa i le va‘a,
39 na lē iloa fo‘i e i latou ‘ina se‘ia o‘o le lolo, ma ‘ave‘esea i latou uma; e fa‘apea fo‘i pe a sau le Atali‘i o le tagata.
40 O ia ona po e i ai i le vao o tagata e to‘alua, e ‘avea le tasi, ‘ae tu‘ua le tasi.
41 E olo fa‘atasi fafine e to‘alua i le mea e olo a‘i saito, e ‘avea le tasi, ‘ae tu‘ua le tasi.
42 “O lea, ‘ia ‘outou mataala ai; auā tou te lē iloa po‘o le fea le itū aso e sau ai lo ‘outou Ali‘i.
43 ‘Ia ‘outou iloa lenei mea, ‘ana iloa e le matai o le ‘āiga po‘o le fea le itū po e sau ai le gaoi, po ‘ua na leoleoina, ‘ae lē tu‘ua e ia lona fale ‘ia ‘elia.
44 O le mea lea ‘ia ‘outou nofo sauni ai; auā o le itū aso tou te lē mānatunatu ai e sau ai le Atali‘i o le tagata.
45 “O ai fo‘i le ‘au‘auna fa‘amaoni ma le mafaufau, ‘ua tofia e lona ali‘i e pule i ana ‘au‘auna, ‘ia avatu a latou mea e ‘ai i ona itū aso?
46 ‘Amu‘ia lea ‘au‘auna, pe a sau lona ali‘i e maua o ia o lo‘o fa‘apea ‘ona fai.
47 E moni, ‘ou te fai atu ‘iā te ‘outou, e tofia o ia e pule i ana mea uma.
48 ‘Ae ‘āfai e fai ifo lea ‘au‘auna leaga i lona loto, ‘E fa‘atuai mai lo‘u ali‘i;’
49 ‘ona fasi ai lea e ia i ona uso a ‘au‘auna, ‘ua ‘a‘ai fo‘i ma inu fa‘atasi ma ē ‘o‘onā;
50 e sau lava le ali‘i o lea ‘au‘auna i le aso e lē fa‘atalitali atu ai o ia, o le itū aso fo‘i e lē iloa ai e ia,
51 ‘ona matuā fa‘asala lea ‘iā te ia ma avatu ‘iā te ia lona tofi fa‘atasi ma tagata fa‘afiaamiotonu; e i ai le taufaitagiauē ma le lilivau o nifo.