Mataio

O Iesu i Luma o Pilato

¹‘Ua ao, ‘ona taupulepule ai lea o le ‘au ositaulaga sili uma ma toeaina o le nu‘u ‘iā Iesu ‘ina ‘ia fasioti ‘iā te ia. ²‘Ua latou noanoa ‘iā te ia, ‘ona latou ta‘ita‘i ai lea ‘iā te ia ma tu‘u atu ai ‘iā Pilato le ali‘i pule.

O le Oti o Iuta

³‘Ua iloa e Iuta le fa‘alata, ‘ua fa‘asalaina o Iesu, ‘ona salamō ai lea o ia, ‘ua toe ‘ave tupe e tolugafulu i le ‘au ositaulaga sili ma toeaina. ⁴‘Ua fa‘apea atu, “‘Ua ‘ou agasala, ‘ina ‘ua ‘ou fa‘alata i lē ‘ua lē sala.” A ‘ua latou fa‘apea mai,“Sa matou mea ‘ea lenā? Faitalia lava oe.” ⁵‘Ona lafo ai lea e ia o tupe i le malumalu, ‘ua alu ‘ese; ‘ona alu ai lea o ia ma sisi lona ua. ⁶‘Ona tago ai lea o le ‘au ositaulaga sili i tupe, ‘ua fa‘apea ane. “E sā ‘ona tu‘u ia mea i le tu‘ugā‘oloa o le malumalu auā o le tau o le toto.” ⁷‘Ua latou filifili, ‘ona fa‘atau ai lea o le fanua o le fai ipu ‘omea, e tatanu ai tagata ‘ese. ⁸O le mea lea ‘ua igoa ai lea fanua, o le Fanua o le Toto, ‘ua o‘o lava i nei ona po. ⁹‘Ona taunu‘u ai lea o le ‘upu a le perofeta o Ieremia, ‘ua fa‘apea mai, “‘Ua latou tago i tupe e tolugafulu, o le tau lea o lē na fa‘atatauina, ma fa‘atatauina e nisi o le fānauga a Isaraelu; ¹⁰‘ona latou fa‘atau ai lea o le fanua o le fai ipu ‘omea, e pei ‘ona fetalai mai ai ‘iā te a‘u o le Ali‘i.”

‘Ua Fesiligia e Pilato Iesu

¹¹‘Ua tu Iesu i luma o le ali‘i pule; ‘ona fesili mai ai lea o le ali‘i ‘iā te ia, ‘ua fa‘apea mai, “O oe ‘ea o le tupu o tagata Iutaia?”‘Ona fetalai atu ai lea o Iesu ‘iā te ia, “O lea lava.” ¹²‘Ua momoli ‘iā te ia e le ‘au ositaulaga sili ma toeaina, a ‘ua leai sana tali. ¹³‘Ona fai mai ai lea o Pilato ‘iā te ia, “‘Ua e lē fa‘alogo ‘ea i le tele o mea ‘ua latou molimau mai ai ‘iā te oe?” ¹⁴A ‘ua lē tali atu o Iesu ‘iā te ia i se ‘upu e tasi, ‘ona matuā ofo ai lea o le ali‘i pule.

‘Ua Fa‘asalaina Iesu i le Oti

¹⁵‘Ua masani le ali‘i pule e tatala atu i lea tausamiga ma lea tausamiga i le motu o tagata se tasi tagata ‘ua noanoatia, o lē ‘ua latou loto i ai. ¹⁶O ona po ia sa i ai ‘iā te i latou le tagata ‘ua noanoatia na logologoā, e igoa ‘iā Parapa. ¹⁷O lea na fai atu ai Pilato ‘iā te i latou, ‘ina ‘ua potopoto i latou, “Po o ai tou te loto i ai ‘ou te tatalaina atu ‘iā te ‘outou? O Parapa ‘ea? po o Iesu lē ‘ua igoa ‘iā Keriso?” ¹⁸Auā ‘ua nā iloa o le matau‘a ‘ua latou tu‘uina atu ai o ia. ¹⁹‘Ua ti‘eti‘e o ia i le nofoa fa‘amasino, ‘ona sau ai lea o le fe‘au mai lana avā, ‘ua fa‘apea mai, “Ne‘i e mao i lea tagata amiotonu; auā na ‘ou matuā tigāina analeilā i le miti ‘iā te ia.” ²⁰A ‘ua fa‘aoso e le ‘au ositaulaga sili ma toeaina i le motu o tagata ‘ia latou fai atu, o Parapa, a ‘ia fasiotia Iesu. ²¹‘Ona fai atu ai lea o le ali‘i pule, ‘ua fa‘apea atu ‘iā te i latou, “O ai so lā‘ua tou te loto i ai ‘ou te tatalaina atu ‘iā te ‘outou?”‘Ona latou fai mai ai lea, “O Parapa.” ²²‘Ona fai atu ai lea o Pilato ‘iā te i latou, “Se a fo‘i le mea ‘ou te faia ‘iā Iesu o lē ‘ua igoa ‘iā Keriso?”‘Ona fai mai ai lea o i latou uma ‘iā te ia, “‘Ia fa‘asatauroina o ia.” ²³A ‘ua fai atu le ali‘i, “Pe se a fo‘i se leaga ‘ua ia faia?”A ‘ua atili ai ‘ona ‘alalaga i latou, ‘ua fa‘apea mai, “‘Ia fa‘asatauroina o ia.” ²⁴‘Ua iloa e Pilato, ‘ua lē aogā lana ‘upu, ‘ae atili ai le vāvāō, ‘ona tago ai lea o ia i le vai, ‘ua fafano ai ona lima i luma o le motu o tagata, ‘ua fa‘apea atu, “‘Ou te mamā a‘u i le toto o lenei tagata amiotonu faitalia lava ‘outou.” ²⁵‘Ona tali mai ai lea o le nu‘u uma, ‘ua fa‘apea mai, “‘Ia i luga ‘iā i matou ma matou fānau lona toto.” ²⁶‘Ona tatalaina atu ai lea e ia o Parapa ‘iā te i latou, a ‘ua sasaina e ia o Iesu ma tu‘uina atu o ia ‘ia fa‘asatauroina.

O le Fa‘atauemu o le ‘au Fitafita ‘iā Iesu

²⁷‘Ua ta‘ita‘iina Iesu e le ‘au a le ali‘i pule i le maota o le ali‘i, ‘ona latou fa‘apotopotoina ai lea ‘iā te ia o le ‘au uma. ²⁸‘Ua latou tō‘eseina ona ‘ofu, ‘ona latou fa‘a‘ofuina ai lea o ia i le ‘ofu mūmū. ²⁹‘Ua latou ta‘ata‘ai fo‘i la‘au tuitui ‘ua fai a‘i le pale, ‘ona latou fa‘ae‘e ai lea i lona ao, ‘ua tu‘u fo‘i le ū i lona ‘a‘ao taumatau; ‘ona latou to‘otuli ai lea i ona luma ‘ua fa‘atauemu mai ‘iā te ia, ‘ua fa‘apea mai, “Talofa le tupu o tagata Iutaia!” ³⁰‘Ua feanu i latou ‘iā te ia, ‘ona latou tago ai lea i le ū, ma tā i lona ao. ³¹‘Ua uma ‘ona latou fa‘atauemu mai ‘iā te ia ‘ona latou tatala ‘ese lea o le ‘ofu ma fa‘a‘ofu ‘iā te ia i ona lava ‘ofu; ‘ona latou ta‘ita‘i atu ai lea ‘iā te ia ‘ia fa‘asatauroina.

‘Ua Fa‘asatauroina o Iesu

³²‘Ua latou ō atu, ‘ona iloa ai lea e i latou o le tagata Kurene, e igoa ‘iā Simona, ‘ua latou fa‘atauānau ‘iā te ia ‘ia ‘ave lona satauro. ³³‘Ua latou o‘o atu i le mea ‘ua igoa o Kolokota, o lona uiga, o le mea o i ai le ulupo‘o; ³⁴‘ona latou avatu lea ‘iā te ia le uaina ‘ua fefiloi ma le la‘au ‘o‘ona, ‘ia inu ai; ‘ua tofotofo e ia, a ‘ua lē mafai ‘ona inu ai. ³⁵‘Ua latou fa‘asatauro ‘iā te ia, ‘ona tufatufa ai lea e i latou o ona ‘ofu, ‘ua latou fai ai le vili. ³⁶‘Ua latou nonofo i lea mea ‘ua leoleo ‘iā te ia. ³⁷‘Ua latou tu‘u fo‘i i luga a‘e o lona ao le tusi i le mea na molia ai o ia, “O IESU LENEI, O LE TUPU O TAGATA IUTAIA.” ³⁸‘Ona latou fa‘asatauro lea fa‘atasi ma ia tagata fao mea e to‘alua, o le tasi i le itū taumatau, ma le tasi i le itū tauagavale. ³⁹‘Ua fāifai ‘iā te ia o ē na ui ane ma lialia‘i o latou ulu, ⁴⁰‘ua fa‘apea mai, “O oe nā, o lē lepeti i le malumalu, ma toe faia i aso e tolu, ‘inā fa‘aola ia oe ‘iā te oe. ‘Āfai o oe o le Alo o le Atua, ‘inā alu ifo ia i le satauro.” ⁴¹‘Ua fa‘apea fo‘i ‘ona fa‘atauemu o le ‘au ositaulaga sili, ma le ‘au tusi‘upu, ma toeaina, ‘ua fa‘apea ane, ⁴²“Na ia fa‘aolaina isi tagata, e lē mafaia e ia ‘ona fa‘aola ‘iā te ia. O le Tupu o Isaraelu o ia, ‘inā alu ifo nei lava o ia i le satauro, ‘ona tatou fa‘atuatua ai lea ‘iā te ia. ⁴³Na fa‘atuatua o ia i le Atua, ‘inā lavea‘i mai nei le Atua ‘iā te ia, ‘āfai e finagalo o ia ‘iā te ia; auā na ia fai mai, ‘O a‘u o le Atali‘i o le Atua.’” ⁴⁴‘Ua fa‘apea fo‘i ‘ona tauemu ‘iā te ia o tagata fao mea ‘ua fa‘asatauroina ma ia.

O le Maliu o Iesu

⁴⁵‘Ua āfua mai i le tutonu o le lā, ‘ua pogisā uma ai le nu‘u, ‘ua o‘o lava i le itūlā e tolu. ⁴⁶‘Ua lata i le itūlā e tolu, ‘ona ‘alaga ai lea o Iesu ma le leo tele, ‘ua fa‘apea atu, “Eli, Eli, lama sapatani?” O lona uiga lenei, “Lo‘u Atua e, lo‘u Atua e, se a le mea ‘ua e tu‘ulafoa‘i mai ai a‘u?” ⁴⁷‘Ua fa‘alogo ai nisi o ē nā tutū mai, ‘ona latou fa‘apea atu ai lea, “‘Ua vala‘au atu lenei tagata ‘iā Elia.” ⁴⁸‘Ona momo‘e mai ai lea o le tasi o i latou ‘ua tago i le omomi, ‘ua fufui ai i le vineka, ma tu‘u i luga i le pito la‘au, ‘ua fa‘ainu ‘iā te ia. ⁴⁹A ‘ua fa‘apea ane i latou uma, “Tu‘u ai pea o ia, se‘i tatou iloa pe sau Elia na te fa‘aolaina o ia.” ⁵⁰‘Ua toe ‘alaga Iesu ma le leo tele, ‘ona tu‘uina atu ai lea e ia o lona agaga. ⁵¹Fa‘auta fo‘i, ‘ua saeluaina le ‘ie puipui o le malumalu, ‘ua amata ifo i luga ‘ua o‘o i lalo; ‘ua lūlūina fo‘i le ‘ele‘ele, ‘ua māvaevae fo‘i papa; ⁵²‘ua avanoa fo‘i tu‘ugamau, ‘ua toe tutū mai fo‘i tino o tagata pa‘ia e to‘atele na momoe, ⁵³na mavae fo‘i lona toetū mai, ‘ona latou ō mai ai lea mai tu‘ugamau, ma latou ō atu i le ‘a‘ai pa‘ia, ‘ua iloa i latou e tagata e to‘atele. ⁵⁴O le ta‘ita‘i fo‘i o le to‘aselau ma ē na leoleo ‘iā Iesu fa‘atasi ma ia, na latou iloa le mafui‘e ma mea na faia, ‘ona latou matuā matata‘u ai lea, ‘ua fa‘apea ane, “E moni, o le Alo lava lenei o le Atua.” ⁵⁵Sa i ai fo‘i fafine e to‘atele na va‘ava‘ai mamao mai, o i latou ia na mulimuli mai ‘iā Iesu mai Kalilaia ma ‘au‘auna mai ‘iā te ia; ⁵⁶sa i ai ‘iā te i latou o Maria le Makatala, ma Maria le tinā o Iakopo ma Iosefa, o le tinā fo‘i o atali‘i o Sepetaio.

O le Falelauasiga o Iesu

⁵⁷‘Ua o‘o i le afiafi, ‘ona sau ai lea o le tasi tagata mau‘oa, o le Arimataia, e igoa ‘iā Iosefa, o ia fo‘i o le so‘o o Iesu; ⁵⁸‘ua alu atu o ia ‘iā Pilato, ‘ua fa‘anoi atu ai i le tino o Iesu. ‘Ona fai atu ai lea o Pilato ‘ia tu‘u ane le tino. ⁵⁹‘Ua ‘ave e Iosefa le tino, ‘ona aui ai lea i le ‘ie lino e mamā. ⁶⁰‘Ua tu‘u ai i lona tu‘ugamau fou na foa i le papa; ‘ua fuli atu e ia le ma‘a tele i le gutu o le tu‘ugamau, ‘ona alu ai lea o ia. ⁶¹Sa i ai Maria le Makatala ma le isi Maria, sa la nonofo feagai ma le tu‘ugamau.

O le ‘au Leoleo i le Tu‘ugamau

⁶²O le taeao, o le aso lea e tuā‘oi ma le aso o le sauniga, ‘ua fa‘apotopoto atu ai ‘iā Pilato le ‘au ositaulaga sili ma le ‘au faresaio, ⁶³‘ua fa‘apea atu, “Le ali‘i e, ‘ua matou manatua, na fai mai lenā tagata pepelo, ‘ina o ola mai o ia, ‘A mavae aso e tolu ‘ou te toetū mai ai lea.’ ⁶⁴O lenei, ‘ia e fetalai ane, ‘ia fa‘amauina le tu‘ugamau se‘ia o‘o i le aso tolu, ‘ina ne‘i ō atu ona so‘o i le po ma gaoi ‘iā te ia, ma latou fai atu i le nu‘u, ‘‘Ua toetū mai o ia nai ē ‘ua oti;’ ‘ona sili ai lea o le pepelo e mulimuli i le na muamua.” ⁶⁵‘Ona fai ane ai lea o Pilato ‘iā te i latou, “‘Ua ‘iā te ‘outou leoleo, ‘inā ō ia, faitalia lava ‘outou ‘ona fa‘amau ai.” ⁶⁶‘Ona latou ō ai lea, ‘ua fa‘amauina le tu‘ugamau, ‘ua fa‘amaufa‘ailoga i le ma‘a ma tu‘u ai tagata e leoleo.#