1 ‘Ona ō mai ai lea ‘iā Iesu o tusi‘upu ma faresaio mai Ierusalema, ‘ua fa‘apea mai,
2 “Se a le mea ‘ua soli ai e ou so‘o le ‘uputu‘u a ē anamua? Auā ‘ua lē fafano o latou lima pe a latou ‘a‘ai.”
3 A ‘ua tali atu o ia, ‘ua fa‘apea atu ‘iā te i latou, “Se a le mea ‘ua soli ai e ‘outou fo‘i le poloa‘iga a le Atua ‘iā ‘outou ‘uputu‘u?
4 Auā ‘ua poloa‘i mai le Atua, ‘ua fa‘apea mai, ‘‘Ia e āva i lou tamā ma lou tinā;’ i le ma lea, ‘O lē ‘upu leaga i le tamā po o le tinā, ‘ia fasiotia lava ia.’
5 A ‘ua ‘outou fai mai, ‘ai sē fai ane i le tamā po o le tinā, ‘‘Ai se mea ‘ua ‘iā te a‘u e aogā ‘iā te oe, o le taulaga lea;’
6 ‘ona lē toe āva ai lea o ia i lona tamā po o lona tinā. ‘Ua fa‘apea ‘ona ‘outou fa‘alēaogāina le poloa‘iga, a le Atua ‘iā ‘outou ‘uputu‘u.
7 O ‘outou tagata fa‘afiaamiotonu, e tatau lava ‘iā te ‘outou le valo‘aga a Isaia, ‘ua fa‘apea mai:
8 ‘‘Ua āva mai ‘iā te a‘u lenei nu‘u i o latou laugutu,a o latou loto ‘ua taumamao ‘iā te a‘u.
9 E tapua‘i fua mai i latou ‘iā te a‘u i lo latou fai ma matā‘upu o poloa‘iga a tagata.’”
10 ‘Ona vala‘au atu a lea o Iesu i le motu o tagata, ‘ua fetalai atu ‘iā te i latou, “Fa‘alogo mai ia ma ‘ia ‘outou lagona.
11 E lē o le mea ‘ua tu‘u i le gutu e leaga ai le tagata, a o le mea e sau mai le gutu, o lea ‘ua leaga ai le tagata.”
12 ‘Ona ō mai ai lea o ona so‘o ‘iā te ia, ‘ua fai mai ‘iā te ia, “‘Ua e silafia ‘ea ‘ua tigā le ‘au faresaio i lo latou fa‘alogo i lea ‘upu?”
13 A ‘ua tali atu o ia, ‘ua fa‘apea atu, “O la‘au uma e le‘i totōina e lo‘u Tamā o i le lagi, e lia‘iina ia.
14 Tu‘u pea ‘iā i latou, o tauaso i latou e ta‘ita‘i i ē ‘ua tauaso; ‘āfai fo‘i e ta‘ita‘iina le tauaso e le tauaso, ‘ona la pa‘u‘ū uma ai lea i le lua.”
15 ‘Ona tali mai ai lea o Peteru, ‘ua fa‘apea mai ‘iā te ia, “‘Ia e fa‘amatala mai ‘iā te i matou lenā fa‘ata‘oto.”
16 ‘Ona fetalai atu ai lea o Iesu, “Tou te lē āu lagona fo‘i ‘ea e ‘outou?
17 Tou te lē āu iloa ‘ea, o mea uma ‘ua tu‘u i le gutu, ‘ua o‘o ia i le manava, ‘ona lafoa‘iina lea i le maliuga?
18 A o mea e sau mai le gutu, ‘ua alu a‘e ia mai le loto, o mea ia e leaga ai le tagata.
19 Auā e alu a‘e mai le loto o le manatu leaga, o le fasioti tagata, o le mulilua, o le faita‘aga, o le gaoi, o le molimau pepelo ma le ‘upu leaga.
20 O mea ia e leaga ai le tagata; a o lē ‘ai ma lima e le‘i fafano, e lē o lea e leaga ai le tagata.”
21 ‘Ua maliu ‘ese Iesu i lea mea, ‘ona o‘o atu ai lea o ia i le lau‘ele‘ele o Turo ma Saitonu.
22 Fa‘auta fo‘i, o le fafine o Kanana ‘ua sau mai lea lava itū, ‘ua ‘alaga mai ‘iā te ia ‘ua fa‘apea mai, “Le Ali‘i e, le alo o Tavita, ‘ia e alofa mai ‘iā te a‘u; ‘ua leaga lava la‘u tama teine i le temoni ‘ua i ai.”
23 A ‘ua leai se ‘upu na tali atu ai Iesu ‘iā te ia. ‘Ona ō mai ai lea o ona so‘o, ‘ua ‘ai‘oi mai ‘iā te ia, ‘ua fa‘apea mai, “‘Ia e tu‘uina atu ‘iā te ia e alu, auā ‘ua mulimuli mai o ia ma ‘alaga mai ‘iā te i tatou.”
24 A ‘ua tali atu o Iesu, ‘ua fa‘apea atu, “E le‘i ‘auina mai a‘u i nisi, ‘ae tau lava o mamoe o le ‘āiga o Isaraelu ‘ua lē iloa.”
25 ‘Ona sau ai lea o le fafine, ‘ua ifo ‘iā te ia, ‘ua fa‘apea mai, “Le Ali‘i e, ‘ia e fesoasoani mai ‘iā te a‘u.”
26 ‘Ona tali atu ai lea o Iesu, ‘ua fa‘apea atu, “E lē tatau ‘ona ‘ave le mea e ‘ai a le fānau ma lafo i ulī.”
27 ‘Ona fai mai ai lea o le fafine, “Le Ali‘i e, e moni a oe; ‘ae ui i lea ‘ua ‘a‘ai e ulī o momoi mea ‘ai ‘ua pa‘u‘ū i laulau a o latou matai.”
28 ‘Ona tali atu ai lea o Iesu, ‘ua fa‘apea atu ‘iā te ia, “Funa e, ‘ua tele lou fa‘atuatua; e pei o lou mana‘o, ‘ia fa‘apea lava ‘ona faia ‘ia te oe.” ‘Ona mālōlō ai lea o lana tama teine i lea lava itū aso.
29 ‘Ua maliu ‘ese Iesu i lea mea, ‘ona o‘o atu ai lea o ia e lata ane i le vai o Kalilaia; ‘ua maliu a‘e i le mauga, ‘ua nofo ai i lalo.
30 ‘Ona ō mai ai lea ‘iā te ia o le motu o tagata e to‘atele, ‘ua ‘iā te i latou o ē pipili, o ē tauaso, o ē gūgū, o ē mumutu, ‘atoa ma nisi e to‘atele, ‘ua latou tu‘u atu ‘iā i latou i vae o Iesu; ‘ona fa‘amālōlō ai lea e ia o i latou.
31 ‘Ona taufaiofo ai lea o le motu o tagata ‘ina ‘ua latou iloa atu o ē sa gūgū ‘ua tautala, o ē sa mumutu ‘ua ‘ato‘atoa, o ē sa pipili ‘ua sāvavali, o ē sa tauaso fo‘i ‘ua va‘ai; ‘ona latou vivi‘i atu ai lea i le Atua o Isaraelu.
32 ‘Ona vala‘au atu ai lea o Iesu i ona so‘o, ‘ua fa‘apea atu, “‘Ou te alofa atu i le motu o tagata, auā o le aso tolu lenei o tatou nonofo ma i latou, e leai fo‘i ni a latou mea e ‘ai. ‘Ou te lē mafai ‘ona tu‘uina atu ‘iā te i latou, e ō matelaina, ne‘i latou lailoa i le ala.”
33 ‘Ona fai mai ai lea o ona so‘o ‘iā te ia, “Tatou te maua ifea ‘ea i le vao ni areto e tele, ‘ina ‘ia mā‘o‘ona ai le motu o tagata ‘ua to‘atele na‘uā?”
34 ‘Ona fetalai atu ai lea o Iesu ‘iā te i latou, “E fia ‘ea ni a ‘outou areto?”‘Ona latou fai mai ai lea, “E fitu ma nai i‘a lāuiti.”
35 ‘Ona fetalai atu ai lea o ia i le motu o tagata ‘ia latou nonofo i lalo.
36 ‘Ona tago ai lea o ia i areto e fitu ma i‘a, ‘ua fa‘afetai, ma tofitofi, ‘ona avatu ai lea e ia i ona so‘o, ‘ona avatu ai lea e le ‘au so‘o i le motu o tagata.
37 ‘Ona ‘a‘ai ai lea o i latou uma lava, ‘ua mā‘o‘ona; ‘ua latou fu‘e fo‘i i toe ‘aiga, ‘ua tūtūmu ai ‘ato e fitu.
38 O i latou fo‘i na ‘a‘ai e to‘afa afe o tane, ‘ae le‘i faitaulia fafine ma tamaiti.
39 ‘Ua tu‘uina atu e Iesu le motu o tagata e ō, ‘ona maliu a‘e ai lea o ia i le va‘a, ‘ua alu atu i le nu‘u o Makatala.