1 “Auā e tusa le mālō o le lagi ma le tasi matai na alausu atu e tautala ma nisi e faigaluega i lona tōvine ‘ae taui atu.
2 ‘Ua tautala o ia ma ē faigaluega, o le aso ma le tenari; ‘ona ‘a‘auina atu ai lea e ia o i latou i lana tōvine.
3 O le itū aso fo‘i e tolu ‘ua alu atu ai o ia, ‘ona iloa atu ai lea e ia o isi ‘ua tutū i le malae e leai se galuega;
4 ‘ona fai atu ai lea o ia ‘iā te i latou, ‘‘Inā ō atu ia ‘outou fo‘i i le tōvine, ‘ae ‘ou te avatu ‘iā te ‘outou se mea e tusa.’ ‘Ona latou ō atu ai lea.
5 ‘Ua toe alu atu o ia i le tutonu o le lā, ma le itūlā e tolu, ‘ua fa‘apea fo‘i ‘ona fai.
6 O le toe itūlā o le afiafi, ‘ua alu atu ai o ia, ‘ona iloa atu ai lea e ia nisi ‘ua tutū e leai se galuega, ‘ua na fai atu fo‘i ‘iā te i latou, ‘Se a le mea tou te tutū mai ai ‘i‘inei i le aso ‘atoa e leai se galuega?’
7 ‘Ua latou fai mai ‘iā te ia, ‘E leai sē na te fai mai ‘iā te i matou.’ ‘Ua fai atu o ia ‘iā te i latou, ‘‘Inā ō atu ia o ‘outou fo‘i i le tōvine, ‘ae maua e ‘outou se mea e tusa.’
8 ‘Ua o‘o i le afiafi, ‘ona fai atu ai lea o le ali‘i e ana le tōvine i lana ‘au‘auna e pule, ‘Vala‘au ia, i ē faigaluega ma avatu le taui ‘iā te i latou, ‘ia āfua i ē na mulimuli, ‘ia o‘o i ē na muamua.’
9 ‘Ua ō mai fo‘i o ē na ō ane i le itūlā o le afiafi, ‘ua ta‘itasi ma latou maua le tenari.
10 ‘Ona ō mai ai lea o ē na muamua, na manatu i latou e sili sa latou mea e maua; a ‘ua ta‘itasi fo‘i o i latou ma maua le tenari.
11 ‘Ua maua ai e i latou, ‘ona latou muimui ai lea i le matai,
12 ‘ua fa‘apea mai, ‘E tasi lava le itūlā na galulue ai i latou nei na mulimuli mai, a ‘ua e fa‘atusaina i latou ma i matou o ē na tigāina i le galuega ma le vevela o le aso.’
13 “‘Ona tali atu ai lea o ia i le tasi o i latou, ‘ua fa‘apea atu, ‘Sole, ‘ou te le‘i agaleaga ‘iā te oe; ta te le‘i talanoa ‘ea i le tenari e tasi?
14 ‘Inā tago ia i lau mea ma alu; o la‘u pule lea e avatu lava i lenei na mulimuli e pei o a oe lava.
15 E lē faitalia ‘ea a‘u ‘ona pule i a‘u lava mea, ‘e te fa‘au‘u mai ‘ea ‘ina ‘ua ‘ou agalelei?’
16 “E fa‘apea ‘ona muamua o ē na mulimuli, e mulimuli fo‘i o ē na muamua.”
17 ‘Ua maliu a‘e Iesu i Ierusalema, ‘ona ‘ave ai lea e ia o le ‘au so‘o e to‘asefulu ma le to‘alua i le ala ‘ua na o i latou lava, ‘ua fa‘apea atu ‘iā te i latou,
18 “Fa‘auta, o le a tatou ō a‘e i Ierusalema, e tu‘uina atu ai le Atali‘i o le tagata i le ‘au ositaulaga sili ma le ‘au tusi‘upu, latou te fa‘asala ‘iā te ia ‘ia oti;
19 latou te tu‘uina atu fo‘i ‘iā te ia i nu‘u ‘ese ‘ina ‘ia latou fa‘atauemu ma sasa ma fa‘asatauro ‘iā te ia; ‘ae toe fa‘atūina o ia i le aso tolu.”
20 ‘Ona sau ai lea o le tinā o atali‘i o Sepetaio, fa‘atasi ma ana tama tane, ‘ua ifo ma ole mai ‘iā te ia.
21 ‘Ona fa‘apea atu ai lea o Iesu ‘iā te ia, “Se a se mea ‘e te mana‘o i ai?”‘Ua fai mai o ia ‘iā Iesu, “‘Ia e fetalai ane, ‘ia nonofo a‘u nei tama e to‘alua, o le tasi i lou itū taumatau, o le isi fo‘i i lou itū tauagavale i lou mālō.”
22 ‘Ona tali atu ai lea o Iesu, ‘ua fa‘apea atu, “Lua te lē iloa le mea lua te ole mai ai. Lua te mafaia ‘ea ‘ona inu i le ipu o le a ‘ou inu i ai?”‘Ua la fai mai ‘iā te ia, “Ma te mafaia.”
23 ‘Ona fetalai atu ai lea o ia ‘iā te i lā‘ua, “Lua te feinu lava i la‘u ipu, a o le nofo i lo‘u itū taumatau ma lo‘u itū tauagavale, e lē o ‘iā te a‘u lea ‘ona avatu, ‘ae tau lava o ē ‘ua saunia mo i latou lea mea e lo‘u Tamā.”
24 ‘Ua fa‘alogo ai le to‘asefulu, ‘ona tigā ai lea o latou loto i lea uso e to‘alua.
25 A ‘ua vala‘au atu Iesu ‘iā te i latou ‘ona fa‘apea atu lea o ia, “‘Ua ‘outou iloa o ali‘i o nu‘u ‘ese ‘ua ali‘ita‘i i latou, o ē ‘ua sili fo‘i ‘ua pule ‘iā te i latou.
26 ‘Ae lē fa‘apea ‘outou; a o sē fia sili ‘iā te ‘outou, ‘ia fai o ia ma a ‘outou ‘au‘auna.
27 O sē fia muamua fo‘i ‘iā te ‘outou, ‘ia fai o ia ma a ‘outou ‘au‘auna.
28 E pei o le Atali‘i o le tagata e le‘i sau o ia ‘ina ‘ia ‘au‘auna mai tagata ‘iā te ia, a ‘ia ‘au‘auna atu o ia, ma foa‘iina atu lona ola e fai ma togiola e sui ai tagata e to‘atele.”
29 ‘Ua latou ō atu mai Ieriko, ‘ona mulimuli mai ai lea ‘iā te ia o le motu o tagata e to‘atele.
30 Fa‘auta fo‘i, ‘ua nonofo i le auala tagata tauaso e to‘alua, ‘ua lā fa‘alogo ‘ua maliu ane Iesu, ‘ona la ‘alalaga mai ai lea, “Le Ali‘i e, le alo o Tavita, ‘ia e alofa mai ‘iā te i mā‘ua.”
31 ‘Ona vavao ai lea e le motu o tagata ‘iā te i lā‘ua, ‘ia la fa‘alologo; a ‘ua atili ai ‘ona ‘alalaga o i lā‘ua, ‘ua fa‘apea mai, “Le Ali‘i e, le alo o Tavita, ‘ia e alofa mai ‘iā te i mā‘ua.”
32 ‘Ona tu ai lea o Iesu, ‘ua vala‘au atu ‘iā te i lā‘ua, ‘ona fa‘apea atu lea o ia, “Se a se mea lua te manana‘o i ai ‘ou te faia mo ‘oulua?”
33 ‘Ona la fai mai ai lea ‘iā te ia, “Le Ali‘i e, ‘ia pupula o mā‘ua mata.”
34 ‘Ona mutimutivale ai lea o le alofa o Iesu, ‘ua pa‘i atu i o la mata; ‘ona va‘ai ai lea o la mata, ‘ona la mulimuli mai ai lea ‘iā te ia.