28 auā o lo‘u toto lenei o le toto o le feagaiga fou, ‘ua fa‘amaligiina mo tagata e to‘atele e fa‘amāgalo ai agasala.
29 ‘Ou te fai atu fo‘i ‘iā te ‘outou, ‘ou te lē toe inu lava i lenei fua o le vine, se‘ia o‘o i le aso ‘ou te inu ai le uaina fou fa‘atasi ma ‘outou i le mālō o lo‘u Tamā.”
30 ‘Ua uma ‘ona fai o a latou pese, ‘ona latou ō atu ai lea i le mauga o Olive.
31 ‘Ona fetalai atu ai lea o Iesu ‘iā te i latou, “E tausuai ‘outou uma ‘ona o a‘u i lenei lava po; auā ‘ua tusia,‘‘Ou te taia le leoleo mamoe,‘ona ta‘ape‘ape ai lea o le lafu mamoe.’
32 ‘Ae a mavae lo‘u toetū, ‘ona ‘ou muamua atu ai lea ‘iā te ‘outou i Kalilaia.”
33 ‘Ona tali mai ai lea o Peteru, ‘ua fa‘apea mai ‘iā te ia, “E ui lava ‘ina tausuai o tagata uma ‘ona o oe, ‘ou te lē tausuai lava a‘u.”
34 ‘Ona fetalai atu ai lea o Iesu ‘iā te ia, “E moni, ‘ou te fai atu ‘iā te oe, o lenei lava po, a o le‘i vivini moa, ‘e te fa‘afiti fa‘atolu mai ai ‘iā te a‘u.”