1 ‘Ua fetalai mai fo‘i le ALI‘I ‘iā Mose ma Arona, ‘ua fa‘apea mai ‘iā te i lā‘ua:
2 ‘Inā fai ane ia i le fānauga a Isaraelu, ‘ia fa‘apea ane, O manu ia tou te ‘a‘ai ai i manu vaefā uma o i le lau‘ele‘ele;
3 o manu uma ‘ua magalua le atigivae, ma tosiluaina ona atigivae, ‘ua toe ‘ai fo‘i lana mama; tou te ‘aina ia.
4 ‘Ae peita‘i o mea ia tou te lē ‘a‘ai ai i manu ‘ua toe ‘a‘ai a latou mama, po o manu ‘ua magalua le atigivae; o le kamela, auā e toe ‘ai o ia lana mama, ‘ae lē magalua lona atigivae, e leaga ia ‘iā te ‘outou.
5 O le sefanai fo‘i, auā e toe ‘ai o ia lana mama, ‘ae lē magalua le atigivae; e leaga ia ‘iā te ‘outou.
6 O le anapata fo‘i, auā e toe ‘ai o ia lana mama, a ‘ua lē magalua le atigivae; o leaga ia ‘iā te ‘outou.
7 o le pua‘a fo‘i, auā e magalua ona atigivae, ‘ua tosiluaina lava, ‘ae lē toe ‘ai o ia lana mama, e leaga ia ‘iā te ‘outou.
8 O latou ‘a‘ano ‘aua tou te ‘a‘ai ai; o latou tino ‘ua mate ‘aua tou te pa‘i i ai; e leaga ia ‘iā te ‘outou.
9 O mea fo‘i ia tou te ‘a‘ai ai i mea uma o i le vai; o mea uma e fai ‘apa‘apa ma una o i le vai, ma le sami, ma vaitafe, e ‘aina ia e ‘outou.
10 A o mea uma o i le sami ma vaitafe ‘ua leai ni ‘apa‘apa ma una, o mea uma e tata‘a i le vai, ma mea ola uma o i le vai, e fai ma mea e ‘inosia ia mea ‘iā te ‘outou;
11 e fai ma mea e ‘inosia ia mea ‘iā te ‘outou, ‘aua ne‘i ‘aina e ‘outou o latou ‘a‘ano; ‘ia ‘avea fo‘i o latou tino ‘ua mate ma mea e ‘inosia ‘iā te ‘outou.
12 O mea uma o i le vai e leai ni ‘apa‘apa ma una, o mea e ‘inosia ia ‘iā te ‘outou.
13 O manu fo‘i ia i manu felelei e ‘inosia ‘iā te ‘outou; e lē ‘aina lava ia e ‘outou, o mea e ‘inosia ia; o le aeto, ma le perese, ma le oseni,
14 ma le etai, ma le aia, ma manu e uiga fa‘atasi i ai.
15 O oreva uma ma manu e uiga fa‘atasi i ai.
16 O le iaena, ma le teemesa, ma le saape, ma le nesa, ma manu e uiga fa‘atasi i ai.
17 O le kusa, ma le saleka, ma le inesope,
18 ma le tanisamiti, ma le kati, ma le raama,
19 ma le kasita, ma le matu‘u, ma manu e uiga fa‘atasi i ai; o le tukapiti ma le pe‘a.
20 O mea uma felelei e fetolofi, o lo‘o fetolofi i vae e ta‘ifā, e ‘avea ia ma mea e ‘inosia ‘iā te ‘outou.
21 Na o mea ia tou te ‘a‘ai ai i mea fetolofi uma ‘ua felelei, o mea uma e fetolofi i vae ta‘ifā, ‘ua fa‘asilisili nisi vae, e oso ai i le ‘ele‘ele;
22 o mea nei o ia mea tou te ‘a‘ai ai; o le sē akerise, ma mea e uiga fa‘atasi i ai; ma le sē solome, ma mea o uiga fa‘atasi i ai; ma le sē akoli, ma mea e uiga fa‘atasi i ai; ma le sē ‘akava, ma mea e uiga fa‘atasi i ai.
23 A o mea uma e felelei fetolofi i vae ta‘ifā, e ‘avea ia ma mea e ‘inosia ‘iā te ‘outou.
24 O mea ia e leaga ai ‘outou, ai se pa‘i atu i se mea mate o ia mea, e leaga o ia se‘ia o‘o i le afiafi.
25 ‘Ai sē ‘ave fo‘i se mea mate o ia mea, e ta e ia ona ‘ofu, e leaga fo‘i o ia se‘ia o‘o i le afiafi.
26 O manu vaefā uma ‘ua magalua le atigivae, ‘ae lē tosiluaina, e lē toe ‘ai fo‘i lana mama, e leaga ia ‘iā te ‘outou; ai se pa‘i atu i ai pe a mate, e leaga lava o ia.
27 O manu uma fo‘i ‘ua sāvavali i o latou alofivae, o manu uma e sāvavali i vae ta‘ifā, e leaga ia ‘iā te ‘outou; o se pa‘i atu i se tino o ia manu ‘ua mate, e leaga ia se‘ia o‘o i le afiafi.
28 ‘Ai sē ‘ave fo‘i se tino o ia manu ‘ua mate, e ta e ia ona ‘ofu, e leaga fo‘i o ia se‘ia o‘o i le afiafi; e leaga ia mea ‘iā te ‘outou.
29 O mea nei e leaga ‘iā te ‘outou, o mea fetolofi e fetolofi i le ‘ele‘ele, o le kalati, ma le imoa, o le mo‘o, ma mea e uiga fa‘atasi i ai.
30 O le anaka, ma le pili kua, ma le pili leta, ma le pili hometa, ma le pili nasama.
31 O mea ia e leaga ‘iā te ‘outou i mea uma e fetolofi; ai se pa‘i atu i ai pe a mamate, e leaga o ia se‘ia o‘o i le afiafi.
32 O mea uma e pa‘ū i ai le tino o so latou ‘ua mate, e leaga lea ‘iā te ‘outou; po o se ipu la‘au, po o se ‘ofu, po o se pa‘u, po o se taga, o mea uma e fai a‘i galuega e tu‘uina ia i le vai, e leaga ai se‘ia o‘o i le afiafi, ‘ona mamā ai lea.
33 O ipu ‘omea uma, fo‘i, e pa‘ū i ai se mea o ia mea, o mea uma fo‘i o i totonu o ipu, e leaga ia ‘iā te ‘outou, tou te ta‘ei ia.
34 O mea e ‘ai uma e lē sa ‘ona ‘ai ai, a ‘ua o‘o i ai ni vai, ‘ona leaga lea ‘iā te ‘outou; o mea uma fo‘i e inu e lē sā ‘ona inu ai, o lo‘o i ai i ia ipu uma e leaga ia ‘iā te ‘outou.
35 O se mea fo‘i ‘ua pa‘ū ai se mea mate o ia mea, e leaga ia, po o se ‘ogāumu, po o lagolago o le ‘ogāumu, ‘ia saeina lava; ‘ua leaga ia mea e ‘avea ma mea leaga ‘iā te ‘outou.
36 Na o le vaipuna po o se vai‘eli, e tele vai o i ai, e mamā lea a o lē e papa‘i so tino ‘ua mate, e leaga ia.
37 ‘Ai se saito e lūlūina, o le a lūlūina ai, ‘ua pa‘ū fo‘i mate o ia mea, e mamā lea.
38 ‘Ae ‘āfai ‘ua avane ni suāvai i le saito, ‘ua pa‘ū fo‘i i ai se mea mate o ia mea, ‘ona leaga lea ‘iā te ‘outou.
39 ‘Āfai fo‘i o se manu vaefā e ‘aina e ‘outou a ‘ua mate ia; o sē papa‘i atu i lona tino ‘ua mate e leaga o ia se‘ia o‘o i le afiafi.
40 O sē ‘ai i lona tino ‘ua mate na te ta ona ‘ofu, e leaga fo‘i o ia se‘ia o‘o i le afiafi; o sē ‘ave fo‘i lona tino ‘ua mate na te ta ona ‘ofu, e leaga fo‘i o ia se‘ia o‘o i le afiafi.
41 O mea fetolofi uma e fetolofi i luga o le ‘ele‘ele e ‘inosia ia, e lē ‘aina.
42 O mea uma e sosolo i le manava, o mea uma fo‘i e sāvavali i vae e fa, o mea uma fo‘i e tele o latou vae i mea fetolofi uma e fetolofi i luga o le ‘ele‘ele, ‘aua tou te ‘a‘ai ai, auā o mea ia e ‘inosia.
43 ‘Aua ne‘i fa‘a‘inosia ‘outou ‘iā te ‘outou i ni mea fetolofi e fetolofi, ‘aua fo‘i ne‘i leaga ‘outou ‘iā te ‘outou i ia mea, e leaga ai ‘outou;
44 auā o a‘u o le ALI‘I lo ‘outou Atua; ‘ia fa‘apa‘iaina ‘outou e ‘outou, ma ‘ia pa‘ia i ‘outou; auā e pa‘ia lava a‘u; ‘aua lava ne‘i leaga ‘outou i ni mea fetolofi e fetolofi i luga o le ‘ele‘ele.
45 Auā o a‘u o le ALI‘I, e ‘aveina a‘e ‘outou a‘i le nu‘u o Aikupito e fai ma o ‘outou Atua; ‘ia pa‘ia ‘outou, auā e pa‘ia lava a‘u.
46 O le tulafono lenei i manu e tata‘a ma manu felelei, ma mea ola uma e fetolofi i vai, ‘atoa ma mea ola uma e fetolofi i luga o le ‘ele‘ele;
47 ‘ina ‘ia fa‘ailogaina mea mamā ma mea e leaga, o manu fo‘i e ‘aina ma manu e lē ‘aina.#