1 ‘Ua fetalai mai fo‘i le ALI‘I ‘iā Mose, ‘ua fa‘apea mai:
2 ‘Inā fai atu ia i le fānauga a Isaraelu, ‘ia fa‘apea atu ‘iā i latou: O a‘u o le ALI‘I lo ‘outou Atua.
3 O mea ‘ua faia i le nu‘u o Aikupito, na ‘outou mau ai, ‘aua tou te faia fa‘apea; o mea fo‘i ‘ua faia i le nu‘u o Kanana ‘ou te fa‘ao‘o atu ai ‘outou, ‘aua tou te faia fa‘apea; ‘aua ne‘i usiusita‘i fo‘i ‘outou ‘iā latou tu.
4 ‘Ia ‘outou faia a‘u fa‘amasinoga, ‘ia ‘outou tausiusi fo‘i i a‘u tulafono, ‘ina ‘ia sāvavali i ai: O a‘u o le ALI‘I, o lo ‘outou Atua.
5 ‘Ia ‘outou tausiusi i a‘u tulafono ma a‘u fa‘amasinoga; o mea ia, a faia e le tagata, e ola ai lava ia: O a‘u o le ALI‘I.
6 ‘Aua ne‘i fa‘alatalata atu so ‘outou i se tasi o lona lava ‘āiga, e fa‘atelenoa i lona tino; o a‘u o le ALI‘I.
7 ‘Aua ‘e te fa‘atelenoa i lou tamā po o lou tinā, o lou tinā lava ia, ‘aua ‘e te fa‘atelenoa ‘iā te ia.
8 ‘Aua ‘e te fa‘atelenoa i le avā a lou tama, o le telenoa lea o lou tamā.
9 O lou tuafafine, o le afafine o lou tamā, po o le tama a lou tinā, sa fānau mai i le ‘āiga, pe fānau mai i se tasi ‘āiga, ‘aua ‘e te fa‘atelenoa ‘iā te ia.
10 O le afafine o lou atali‘i, po o le tama a lou afafine, ‘aua ‘e te fa‘atelenoa ‘iā te i lā‘ua; auā o lo la telenoa, o lou lava lea.
11 O le tama teine a le avā a lou tamā, o lou tamā na fānau ai, o lou tuafafine lea, ‘aua ‘e te fa‘atelenoa ‘iā te ia.
12 ‘Aua ‘e te fa‘atelenoa i le tuafafine o lou tamā; o le ‘āiga lava ia o lou tamā.
13 ‘Aua ‘e te fa‘atelenoa i le uso o lou tinā; o le ‘āiga lava ia o lou tinā.
14 ‘Aua ‘e te fa‘atelenoa i le uso o lou tamā, ‘aua ‘e te fa‘alatalata atu i lana avā; o le avā ia a le uso o lou tamā.
15 ‘Aua ‘e te fa‘atelenoa i le avā a lou atali‘i; o le avā ia a lou atali‘i, ‘aua ‘e te fa‘atelenoa ‘iā te ia.
16 ‘Aua ‘e te fa‘atelenoa i le avā a lou uso; o le telenoa lea o lou uso.
17 ‘Aua ‘e te fa‘atelenoa i se fafine ‘atoa ma lana tama teine; ‘aua ‘e te tago fo‘i i le afafine o lana tama tane, po o le tama teine a lana tama teine e fa‘atelenoa ‘iā te ia auā o fafine o lona lava ‘āiga i latou; o le mea leaga lava lea.
18 ‘Aua fo‘i ‘e te fai avā i le uso o lau avā e fa‘atigā ‘iā te ia, e fa‘atelenoa ‘iā te ia ‘atoa ma le tasi a o ola mai o ia.
19 ‘Aua fo‘i ‘e te fa‘alatalata atu i se fafine e fa‘atelenoa ‘iā te ia, ‘ina o nofo ‘ese o ia ‘ona o lona leaga.
20 ‘Aua fo‘i ne‘i momoe ‘oulua ma le avā a le tasi, e leaga ai oe ‘iā te ia.
21 ‘Aua fo‘i ‘e te tu‘uina atu o so lau fānau e ui ane i le afi ‘iā Moloka. ‘Aua fo‘i ‘e te fa‘aleagaina le igoa o lou Atua; o a‘u o le ALI‘I.
22 ‘Aua lua te momoe ma se tane, e pei ‘ona momoe ma se fafine; o le mea e ‘inosia lava lea.
23 ‘Aua fo‘i lua te momoe ma se manu, e leaga ai oe ‘iā te ia; ‘aua ne‘i tu atu fo‘i se fafine i luma o se manu la te momoe ma ia: o le mea matuā leaga lava lea.
24 ‘Aua lava ne‘i leaga ‘outou ‘iā te ‘outou i se tasi mea o ia mea; auā o mea uma lava ia ‘ua leaga ai nu‘u ‘ou te tulia i o ‘outou luma.
25 ‘Ua leaga ai fo‘i le lau‘ele‘ele; ‘ou te taui atu ai le agasala ‘ua i ai, e luai mai lava e le lau‘ele‘ele i ē o nonofo ai.
26 O lenei, ‘ia ‘outou tausiusi i a‘u tulafono ma a‘u fa‘amasinoga; ‘aua ne‘i ‘outou faia se mea e tasi o ia mea e ‘inosia; o se tama a le ‘ele‘ele, po o se tagata ‘ese e āumau ‘iā te ‘outou.
27 Auā o mea e ‘inosia uma ia ‘ua faia e tagata o le nu‘u ‘ua mua‘i i ai ‘iā te ‘outou, ‘ua leaga ai fo‘i le lau‘ele‘ele;
28 ‘ina ne‘i luai mai e le lau‘ele‘ele ‘iā te ‘outou fo‘i, pe a leaga ‘iā te ‘outou, e pei ‘ona luai mai ai nu‘u ‘ua mua‘i i ai ‘iā te ‘outou.
29 Auā ‘ai sē na te faia se mea e tasi o ia mea e ‘inosia, o tagata lava o ē faia e vavae‘eseina i latou i lo latou nu‘u.
30 O lenei, ‘ia ‘outou tausiusi i a‘u sauniga, ‘ina ne‘i faia e ‘outou se mea e tasi o ia tu e ‘inosia ‘ua faia a o ‘outou le i ai, ‘ina ne‘i leaga ai ‘outou ‘iā te ‘outou: O a‘u o le ALI‘I lo ‘outou Atua.