1 ‘Ua fetalai mai fo‘i le ALI‘I ‘iā Mose, ‘ina ‘ua uma ‘ona oti o atali‘i e to‘alua o Arona, na la ositaulaga i luma o le ALI‘I, ma oti ai i lā‘ua.
2 ‘Ua fetalai mai le ALI‘I ‘iā Mose:‘Inā fai ane ia ‘iā Arona lou uso, ‘aua ne‘i ulufale o ia i aso faiso‘o i le mea pa‘ia i tala atu o le ‘ie puipui, i luma o le nofoa o le alofa ‘ua i luga o le ‘atola‘au; ‘ina ne‘i oti ai o ia, ‘aua e fa‘aali a‘u i le ao i luga ‘ae o le nofoa o le alofa.
3 E fa‘apea ‘ona ulufale o Arona i le mea pa‘ia, na te avatua se povi po‘a ta‘anoa e fai ma taulaga mo le agasala, ma se mamoe po‘a e fai ma taulaga mū.
4 E ‘ofu o ia i le ‘ofu tino o le ‘ie vavae e pa‘ia, e ‘ofu fo‘i lona tino i le ‘ofuvae o le ‘ie vavae, e fusia fo‘i lona sulugātiti i le fusi o le ‘ie vavae, ma le pulou o le ‘ie vavae e pulou ai o ia; o ‘ofu pa‘ia ia, o le mea lea na te tā‘ele ai lona tino i le vai, i le ‘ofu ai o ia.
5 Na te talia fo‘i ai le fa‘apotopotoga o le fānauga a Isaraelu ‘oti po‘a e lua e fai ma taulaga mo le agasala, ma se mamoe po‘a e tasi e fai ma taulaga mū.
6 E avatua fo‘i e Arona lana povi po‘a ta‘anoa e fai ma taulaga mo le agasala mo ia lava; ‘ona fai ai lea o le togiola mo ia lava ‘atoa ma lona lava ‘āiga.
7 E ‘ave fo‘i e ia o ‘oti e lua, ma tu‘u atu ai i luma o le ALI‘I i le faitoto‘a o le fale fetāfa‘i o le fa‘apotopotoga.
8 ‘Ona faia lea e Arona o vili i ‘oti ia e lua; o le tasi vili ma le ALI‘I, o le tasi fo‘i vili mā le ‘oti o le a tu‘u atu e alu.
9 E avatua fo‘i e Arona le ‘oti na fa‘asaga i ai le vili a le ALI‘I, ma fai a‘i le taulaga mo le agasala.
10 A o le ‘oti na fa‘asaga i ai le vili o le ‘oti o le a tu‘u atu e alu, e tu‘uina atu ola lea i luma o le ALI‘I, e fai a‘i le togiola, e tu‘u atu ai e fai ma ‘oti e alu i le vao.
11 E avatua fo‘i e Arona le povi po‘a ta‘anoa o le taulaga mo le agasala mo ia lava, ‘ona fai ai lea o le togiola mo ia lava, ‘atoa ma lona lava ‘āiga, na te fasi fo‘i le povi po‘a ta‘anoa o le taulaga mo le agasala mo ia lava.
12 E ‘ave fo‘i e ia le ipu e mū ai mea manogi, ‘ua tumu i le malala ‘a‘asa o le afi mai le fatafaitaulaga i luma o le ALI‘I, ma ona lima ‘ua tumu i mea manogi ‘ua tu‘inini‘ia, e ‘ave fo‘i e ia i tala atu o le ‘ie puipui.
13 Na te tu‘uina atu fo‘i le mea manogi i luga o le afi i luma o le ALI‘I, ‘ina ‘ia ufitia le nofoa o le alofa o i luga o le ‘atola‘au o le tulafono i le asu o le mea manogi, ne‘i oti lava ia.
14 E ‘ave fo‘i e ia nisi toto o le povi po‘a ta‘anoa, ma sausau ai i lona tamatama‘i lima i le nofoa o le alofa i lona itū i sasa‘e; na te sausau fa‘afitu fo‘i nisi toto i lona tamatama‘i lima i luma o le nofoa o le alofa.
15 ‘Ona fasi ai lea e ia o le ‘oti o le taulaga mo le agasala, mo le nu‘u lea, ma ‘ave lona toto i tala atu o le ‘ie puipui, e fai fo‘i i lea toto e pei ‘ona ia faia i le toto o le povi po‘a ta‘anoa, e sausau ai fo‘i i luga o le nofoa o le alofa, ma luma o le nofoa o le alofa.
16 Na te faia fo‘i se togiola mo le mea pa‘ia, ‘ona o le leaga o le fānauga a Isaraelu, ‘ona o latou solitulafono fo‘i ‘iā latou agasala uma e fa‘apea fo‘i ‘ona faia e ia mo le fale fetāfa‘i o le fa‘apotopotoga, o lo‘o tumau ‘iā te i latou i o latou leaga.
17 ‘Aua ne‘i i ai se tagata i le fale fetāfa‘i o le fa‘apotopotoga pe a ulufale o ia i le mea pa‘ia e fai ai le togiola, ‘ina se‘ia ulufafo ia, se‘ia uma fo‘i ‘ona faia e ia le togiola mo ia, ‘atoa ma lona ‘āiga, ‘atoa fo‘i ma le fa‘apotopotoga uma o Isaraelu.
18 E alu fo‘i o ia i fafo i le fatafaitaulaga o i luma o le ALI‘I e fai ai le togiola mo le fata na te ‘ave fo‘i nisi toto o le povi po‘a ta‘anoa, ‘atoa ma nisi toto o le ‘oti, ma tu‘u ai i nifo o le fatafaitaulaga ‘ia so‘o ai.
19 Na te sausau fa‘afitu i ona luga nisi toto i lona tamatama‘i lima e fa‘amamāina ai, ma fa‘apa‘iaina ai, a‘i le leaga o le fānauga a Isaraelu.
20 A uma fo‘i ‘ona faia e ia o le togiola mo le mea pa‘ia, ma le fale fetāfa‘i o le fa‘apotopotoga, ma le fatafaitaulaga, ‘ona ‘aumai ai lea o le ‘oti ola;
21 e fa‘ae‘e fo‘i e Arona ona lima e lua i le ulu o le ‘oti ola, ma fa‘aali i ona luga o amio leaga uma a le fānauga a Isaraelu, ma o latou solitulafono uma ‘iā latou agasala uma, o lo‘o fa‘ae‘e ai i le ulu o le ‘oti, ‘ona tu‘u atu ai lea o le ‘oti i le lima o le tagata ‘ua saunia e ‘ave i le vao.
22 E ‘ave fo‘i e le ‘oti i ona luga a latou amio leaga uma i le nu‘u e lē ‘ainā, na te tu‘ua fo‘i le ‘oti e alu i le vao.
23 ‘Ona ulufale atu ai lea o Arona i le fale fetāfa‘i o le fa‘apotopotoga, ma tu‘u ‘ese ai ‘ofu a o le ‘ie vavae na ia ‘ofu ai ‘ina ‘ua ulufale o ia i le mea pa‘ia, ‘ae tu‘u ai lava.
24 Na te tā‘elea fo‘i lona tino i le vai i le mea pa‘ia, ma ‘ofu i ona lava ‘ofu, ‘ona ulufafo lea, ma fai lana taulaga mū, ma le taulaga mū a le nu‘u, ‘ona fai ai lea o le togiola mo ia lava ‘atoa ma le nu‘u.
25 O ga‘o fo‘i o le taulaga mo le agasala na te susunuina ia i le fatafaitaulaga.
26 O lē na tu‘u atu le ‘oti na fai ma ‘oti e tu‘u atu e alu, na te taia ona ‘ofu, ma tā‘ele lona tino i le vai, e mulimuli ane ‘ona alu ane ai lea o ia i le toagalauapi.
27 O le povi po‘a ta‘anoa o le taulaga mo le agasala, ma le ‘oti o le taulaga mo le agasala, na ‘avea o la toto i le mea pa‘ia e fai ai le togiola, e ‘ave i tua o le toagalauapi; ma latou susunu i le afi o la pa‘u, ma o la tino, ma o la otaota.
28 O lē na te susunuina ai e ta e ia ona ‘ofu, ma tā‘ele lona tino i le vai, e mulimuli ane ‘ona alu ane ai lea o ia i le toagalauapi.
29 O le tulafono lea ‘iā te ‘outou e fa‘avavau, a o‘o i le fitu o masina, o le aso sefulu o lea masina, ‘ia puapuagātia ai ‘outou e ‘outou, ‘aua tou te faia sina galuega, e se tama a le ‘ele‘ele, po o se tagata ‘ese a āumau ‘iā te ‘outou.
30 Auā o le aso lea e fai ai le togiola mo ‘outou e fa‘amamāina ai ‘outou, ‘ina ‘ia mamā ‘outou i luma o le ALI‘I ‘iā ‘outou agasala uma.
31 O le sapati lea tou te mālōlō ai, ‘ia puapuagātia ai ‘outou e ‘outou, o le tulafono lea e fa‘avavau.
32 O le ositaulaga fo‘i e fa‘au‘uina e ia, e tofia fo‘i e ia ‘ina ‘ia faia le faiva o le ositaulaga e sui a‘i lona tamā, o ia lea na te faia le togiola, na te ‘ofu fo‘i i ‘ofu o le ‘ie vavae, o ‘ofu pa‘ia lava ia.
33 Na te faia fo‘i le togiola mo le malumalu pa‘ia, na te faia fo‘i le togiola mo le fale fetāfa‘i o le fa‘apotopotoga, ma le fatafaitaulaga, na te faia fo‘i le togiola mo le ‘au ositaulaga, ‘atoa ma tagata uma o le fa‘apotopotoga.
34 O le tulafono lenei ‘iā te ‘outou e fa‘avavau, e fai le togiola mo le fānauga a Isaraelu ‘ona o a latou agasala uma, e ta‘i fai fa‘atasi i tausaga.‘Ua ia faia fo‘i e pei ‘ona fetalai mai ai o le ALI‘I ‘iā Mose.#