1 A ‘aumai fo‘i e se tasi se taulaga i mea e ‘ai i le ALI‘I, na te faia lana taulaga i le falaoa lelei, ma liligi i ai le suāu‘u ma tu‘u i ai le pulu lipano.
2 Na te ‘aumai ai i atali‘i o Arona o ositaulaga, na te lulu‘u mai ai se lu‘utaga a le falaoa ‘atoa ma le suāu‘u ma le pulu lipano uma lava, ‘ona susunu ai lea e le ositaulaga lona fa‘amanatuga i le fatafaitaulaga, o le taulaga lea e fai i le afi, o le mea manogi lelei i le ALI‘I.
3 O mea fo‘i e totoe o le taulaga i mea e ‘ai, e ‘iā Arona ma ona atali‘i ia; o le mea e sili ‘ona pa‘ia i taulaga e fai i le afi i le ALI‘I.
4 Pe a e avatu fo‘i se taulaga i mea e ‘ai ‘ua tao i le umu, ‘ia fai ni pōtoi areto lelei e lē fa‘afefeteina, ‘ua palua fo‘i ma le u‘u, po o fa‘apāpā e lē fa‘afefeteina, ‘ua nini i le u‘u.
5 ‘Ae ‘āfai o lau taulaga o le taulaga lea i mea e ‘ai i se u‘amea salafa, ‘e te faia i le falaoa lelei e lē fa‘afefeteina, ‘ua palua fo‘i ma le u‘u.
6 ‘E te tofitofi fo‘i i ana tofitofiga areto ma liligi i ai le u‘u; o le taulaga i mea e ‘ai lea.
7 ‘Ae ‘āfai o lau taulaga o le taulaga lea i mea e ‘ai ‘ua tunua i le ‘ulo, ‘ia faia i le falaoa lelei ma le u‘u.
8 ‘E te ‘aumai ai fo‘i i le ALI‘I le taulaga i mea e ‘ai ‘ua faia i ia mea; a tu‘uina atu ai fo‘i i le ositaulaga, ‘ona ‘aumai ai lea e ia i le fatafaitaulaga.
9 ‘Ona ‘ave‘eseina ai lea e le ositaulaga sona fa‘amanatuga a‘i le taulaga i mea e ‘ai, ma susunu ai i luga o le fatafaitaulaga. O le taulaga lea e fai i le afi, o le mea manogi lelei i le ALI‘I.
10 O mea fo‘i e totoe o le taulaga i mea e ‘ai, e ia Arona ma ona atali‘i ia; o le mea e sili ‘ona pa‘ia i taulaga e fai i le afi i le ALI‘I.
11 O taulaga uma i mea e ‘ai tou te ‘aumaia i le ALI‘I, ‘aua ne‘i fa‘afefeteina ia; auā tou te lē susunu ni mea e fa‘afefete a‘i po o se meli, i se taulaga i le ALI‘I ‘ua fai i le afi.
12 O le taulaga i mea fa‘apolopoloina, tou te ‘aumai ai i le ALI‘I; ‘ae lē susunuina ia i luga o le fatafaitaulaga e fai ma mea manogi lelei.
13 O taulaga uma fo‘i i au taulaga i mea e ‘ai, ‘e te fa‘amasimaina i le masima; ‘aua le aunoa lau taulaga i mea e ‘ai ma le masima o le feagaiga a lou Atua; o au taulaga uma ‘e te avatu, ma le masima.
14 ‘Ae ‘āfai ‘e te avatua i le ALI‘I se taulaga i mea e ‘ai i mea fa‘apolopoloina, ‘ia e avatu o ‘au saito ‘ua tunua i le afi, o saito matua ‘ua sasaina, o le taulaga i mea e ‘ai lea po au mea ‘ua fa‘apolopoloina.
15 ‘E te liligi i ona luga le u‘u, ‘e te fa‘ae‘e fo‘i i ona luga o le pulu lipano; o le taulaga i mea e ‘ai lea.
16 ‘Ona susunuina ai lea o le ositaulaga o lona fa‘amanatuga, o le saito ‘ua sasaina, ma ona u‘u, ma ona pulu lipano uma lava; o le taulaga lea e fai i le afi i le ALI‘I.