1 ‘Ua fetalai mai fo‘i le ALI‘I ‘iā Mose, ‘ua fa‘apea mai:
2 ‘Inā fai ane ia ‘iā Arona, ma ona atali‘i, ‘atoa ma le fānauga uma a Isaraelu, ‘ia fa‘apea ane ‘iā te i latou: O lenei le mea ‘ua poloa‘i mai ai le ALI‘I, ‘ua fa‘apea mai.
3 ‘Ai se tagata o le ‘āiga o Isaraelu, na te fasi se povi po‘a, po o se tama‘i mamoe, po o se ‘oti, i le toagalauapi, pe fasi i tua o le toagalauapi.
4 a ‘ua lē ‘aumaia i le faitoto‘a o le fale fetāfa‘i o le fa‘apotopotoga e avatu ai le taulaga i le ALI‘I i luma o le malumalu o le ALI‘I, e ta‘ua lea tagata o le fa‘amaligi toto; ‘ua fa‘amaligiina e ia le toto; e vavae‘eseina lea tagata i lona nu‘u,
5 ‘ina ‘ia ‘aumaia e le fānauga a Isaraelu a latou taulaga latou te fai taulaga ai i le vao, ‘ia latou ‘aumaia lava i le ALI‘I i le faitoto‘a o le fale fetāfa‘i o le fa‘apotopotoga i le ositaulaga; latou te fai taulaga ai, o taulaga fa‘afetai i le ALI‘I.
6 E sausauina fo‘i e le ositaulaga le toto i luga o le fatafaitaulaga o le ALI‘I i le faitoto‘a o le fale fetāfa‘i o le fa‘apotopotoga, e susunu fo‘i le ga‘o e fai ma mea manogi lelei i le ALI‘I.
7 Latou te lē toe faia fo‘i a latou taulaga i aitu, sa latou mulimuli atu ai e mulilulua ai; o le tulafono lenā e fa‘avavau ‘iā i latou i o latou tupulaga amulī.
8 ‘E te fai ane fo‘i ‘iā i latou: ‘Ai se tagata o sa Isaraelu, po o se tagata ‘ese e āumau ‘iā te i latou, na te faia se taulaga mū, po o se isi taulaga,
9 ‘ae lē ‘aumaia i le faitoto‘a o le fale fetāfa‘i o le fa‘apotopotoga e sauni ai i le ALI‘I; e vavae‘eseina lava lea tagata i lona nu‘u.
10 ‘Ai se tagata fo‘i o sa Isaraelu, po o so se tagata ‘ese ‘ua āumau ‘iā te i latou, na te ‘aina sina toto lava; ‘ou te fai mo‘u fili lea tagata na te ‘aina le toto, ma ‘ou vavae ‘ese ‘iā te ia i lona nu‘u.
11 Auā o i le toto le ola o le tino; ‘ua ‘ou tu‘uina atu ai fo‘i ‘iā te ‘outou e fai a‘i le togiola mo ‘outou i luga o le fatafaitaulaga; auā o le toto o le mea lava lea e fai a‘i le togiola mo le tagata.
12 O le mea lava lea na ‘ou fai atu ai i le fānauga a Isaraelu, ‘Aua le ‘aina ni toto e so ‘outou, ‘aua le ‘aina fo‘i le toto e se tagata ‘ese e āumau ‘iā te ‘outou.
13 ‘Ai se tagata fo‘i o le fānauga a Isaraelu, po o so se tagata ‘ese ‘ua āumau ‘iā te i latou, na te tulia se manu o le vao, po o se manulele e ‘aina; ‘ia fa‘amasa‘aina lava e ia lona toto ma ufiufi ai i le ‘ele‘ele.
14 Auā o le ola lea o mea ola uma; o lo latou toto, o lo latou ola lava lea; o le mea lava lea na ‘ou fai atu ai i le fānauga a Isaraelu, ‘Aua tou te ‘a‘ai i le toto o se mea ola; auā o le ola o mea uma o lo latou toto lava lea ai se ‘ai ai e vavae‘eseina o ia.
15 ‘Ai se tagata fo‘i ‘ua ‘ai i se mea ‘ua mate, po o se mea ‘ua saeia, o se tama a le ‘ele‘ele, po o se tagata ‘ese, na te taia ona ‘ofu, ma tā‘ele i le vai, e leaga fo‘i o ia se‘ia o‘o i le afiafi; ‘ona mamā ai lea.
16 ‘Ae ‘āfai na te lē tāina ona ‘ofu, ma lē tā‘ele lona tino, ‘ona nofo sala lava lea o ia.