1 ‘Ua fetalai mai fo‘i le ALI‘I ‘iā Mose ma Arona, ‘ua fa‘apea mai:
2 ‘Inā fai atu ia i le fānauga a Isaraelu, ‘ia fa‘apea atu ‘iā te i latou: ‘Ai se tagata ‘ua i ai le gau i lona tino, o lona gau e leaga ai o ia.
3 O le uiga fo‘i lenei o lona leaga i lona gau, pe alu le suāvai i lona tino, pe punitia le suāvai ‘ua lē alu i lona tino, o lona leaga lava lea.
4 O moega uma e ta‘oto ai o ia ‘ua i ai le gau e leaga ia, o mea uma fo‘i na te nofo ai e leaga fo‘i o ia.
5 O sē pa‘i atu fo‘i i lona moega na te taia ona ‘ofu, ma tā‘ele i le vai, e leaga fo‘i o ia se‘ia o‘o i le afiafi.
6 O sē nofo fo‘i i le mea na nofo ai o ia ‘ua i ai le gau, na te taia ona ‘ofu, ma tā‘ele i le vai, e leaga fo‘i o ia se‘ia o‘o i le afiafi.
7 O sē na te pa‘i atu i le tino o lē ‘ua i ai le gau, na te taia ona ‘ofu, ma tā‘ele i le vai, e leaga fo‘i o ia se‘ia o‘o i le afiafi.
8 A feanu atu fo‘i o ia ‘ua i ai le gau i lē ‘ua mamā, ‘ona ta ai lea e ia ona ‘ofu, ma tā‘ele i le vai, e leaga fo‘i o ia se‘ia o‘o i le afiafi.
9 O sē nofoa solofanua e ti‘eti‘e ai o ia ‘ua i ai le gau, o leaga lea.
10 O sē na te pa‘i atu i se mea sa i ona lalo, e leaga o ia se‘ia o‘o i le afiafi, o sē na te ‘ave fo‘i se mea o ia mea, na te taia ona ‘ofu, ma tā‘ele i le vai, e leaga fo‘i o ia se‘ia o‘o i le afiafi.
11 O sē ‘ua pa‘i atu i lē ‘ua i ai le gau, a o le‘i fafano ona lima i le vai, na te taia ona ‘ofu, ma tā‘ele i le vai, e leaga fo‘i o ia se‘ia o‘o i le afiafi.
12 O se ipu ‘omea fo‘i e pa‘i atu i ai o lē ‘ua i ai le gau, e ta‘eia lea; a o ipu la‘au uma e fufuluina ia i le vai.
13 Pe a fa‘amamāina o ia ‘ua i ai le gau a‘i lona gau; ‘ona faitau ai lea e ia o aso e fitu mo lona fa‘amamāina, ‘ona ta lea e ia ona ‘ofu, ma tā‘ele lona tino i le vaipuna, ‘ona mamā ai lea.
14 O le aso valu fo‘i na te ‘aumai ai le uluga manutagi, po o tama‘i lupe e lua fua, ma alu atu i luma o le ALI‘I i le faitoto‘a o le fale fetāfa‘i o le fa‘apotopotoga, ma avane ai i le ositaulaga.
15 E sauni ai fo‘i e le ositaulaga le tasi e fai ma taulaga mo le agasala, a o le taulaga mū le tasi; ‘ona fai ai lea e le ositaulaga le togiola mo ia i luma o le ALI‘I ‘ona o lona gau.
16 ‘Ai se tane ‘ua alu le sua o lona tino, na te tā‘elea lona tino uma i le vai, e leaga fo‘i o ia se‘ia o‘o i le afiafi.
17 O ‘ofu uma fo‘i, ma pa‘u uma, ‘ua i ai le sua o le tino, ia ta ia, e leaga fo‘i se‘ia o‘o i le afiafi.
18 O le fafine fo‘i la te momoe ma le tane e i ai le sua o le tino, ‘ia tā‘e‘ele i lā‘ua i le vai, e leaga fo‘i i lā‘ua se‘ia o‘o i le afiafi.
19 O le fafine fo‘i, pe ‘āfai ‘ua alu le ma‘i i lona tino, o le ‘ele‘ele fo‘i lea, ‘ona nofo ‘ese ai lea o ia i aso e fitu; o sē pa‘i atu ‘iā te ia e leaga ai o ia se‘ia o‘o i le afiafi.
20 O mea uma fo‘i e ta‘oto ai o ia, ‘ina ‘ua nofo ‘ese, e leaga ia, o mea uma fo‘i e nofo ai o ia e leaga ia.
21 ‘Ai sē pa‘i atu fo‘i i lona moega, na te taia ona ‘ofu, ma tā‘ele i le vai, e leaga o ia se‘ia o‘o i le afiafi.
22 ‘Ai sē pa‘i atu fo‘i i se mea na ia nofo ai, na te taia ona ‘ofu, ma tā‘ele i le vai, e leaga fo‘i o ia se‘ia o‘o i le afiafi.
23 ‘Ai se mea ‘ua i luga o le moega, po o se mea na ia nofo ai, a pa‘i atu i ai se tasi, e leaga ai o ia se‘ia o‘o i le afiafi.
24 ‘Āfai fo‘i la te momoe ma le tane, e o‘o fo‘i lona leaga ‘iā te ia, e leaga ai o ia i aso e fitu; o moega uma fo‘i e ta‘oto ai o ia e leaga ia.
25 ‘Ai se fafine ‘ua alu le ‘ele‘ele i aso e tele a o le‘i o‘o i lona nofo ‘ese, pe alu pea e sili i aso o lona nofo ‘ese; o aso uma e alu ai lona ma‘i, e leaga ai o ia, e pei o aso lava o lona nofo ‘ese, e leaga ai o ia.
26 O moega uma e ta‘oto ai o ia i aso uma e ala ai lona ma‘i, e fai lea ‘iā te ia e pei o le moega o lona nofo ‘ese; o mea uma fo‘i e nofo ai o ia e leaga ia, e pei ‘ona leaga i lona nofo ‘ese.
27 ‘Ai sē pa‘i atu fo‘i i ia mea, e leaga ai o ia, na te taia fo‘i ona ‘ofu, ma tā‘ele i le vai, e leaga fo‘i o ia se‘ia o‘o i le afiafi.
28 ‘Ae ‘āfai ‘ua mamā o ia i lona ma‘i sa alu, ‘ona faitau ai lea o ia o aso e fitu, a mavae atu ia, ‘ona mamā ai lea o ia.
29 O le aso valu fo‘i na te ‘aumaia le uluga manutagi, po o tama‘i lupe e lua fua, ma avatu ai i le ositaulaga i le faitoto‘a o le fale fetāfa‘i o le fa‘apotopotoga.
30 ‘Ona sauni ai lea e le ositaulaga o le tasi e fai ma taulaga mo le agasala, ma le tasi e fai ma taulaga mū; ‘ona fai ai lea e le ositaulaga le togiola mo ia i luma o le ALI‘I, ‘ona o lona ma‘i sa alu na leaga ai o ia.
31 ‘Ia fa‘apea ‘ona ‘oulua fa‘ate‘a‘eseina le fānauga a Isaraelu i mea e leaga ai i latou ‘ina ne‘i oti i latou i o latou leaga, pe a leaga ‘iā te i latou lo‘u malumalu ‘ua ‘iā te i latou.
32 O lenei le tulafono ‘iā te ia ‘ua i ai le gau, ‘atoa ma ia ‘ua alu lona sua, e leaga ai o ia,
33 ‘atoa ma lē ‘ua faia le ma‘i o fafine, ‘atoa ma lē na alu le ma‘i, o le tane, po o le fafine, o le tane fo‘i ‘ua la momoe ma le fafine a o i ai lona leaga.