1 ‘Ua fetalai mai fo‘i le ALI‘I ‘iā Mose: ‘Ia e fai atu i ositaulaga o atali‘i o Arona, ‘ia fa‘apea atu ‘iā i latou:‘Aua ne‘i leaga so latou i se tagata o lona nu‘u ‘ua oti.
2 A o se tagata o lona ‘āiga tō tino, o lona tinā ma lona tamā, ma lona atali‘i, ma lona afafine, ma lona uso,
3 ma lona tuafafine o le taupou, o lona ‘āiga tō tino, ‘ua leai sana tane; e lē sa ‘ona leaga o ia ‘ona o ia.
4 ‘Aua ne‘i leaga o ia ‘iā te ia, o ia le tagata sili i lona nu‘u, e leaga ai o ia.
5 ‘Aua ne‘i latou sele mamā i o latou lauulu, pe tafi o latou pito ‘ava, pe saei o latou tino.
6 ‘Ia pa‘ia lava i latou mo lo latou Atua, ‘aua ne‘i latou fa‘aleagaina le igoa o lo latou Atua; auā o taulaga ia i le ALI‘I e fai i le afi, ma le areto a lo latou Atua, ‘ua latou fai taulaga ai; o le mea lea ‘ia pa‘ia ai i latou.
7 ‘Aua ne‘i fai avā so latou i se fafine talitane, po o se fafine faita‘aga; ‘aua fo‘i ne‘i fai avā o ia i se fafine ‘ua fa‘ate‘a e lana tane; auā ‘ua pa‘ia o ia mo lona Atua.
8 ‘E te fa‘apa‘iaina fo‘i o ia, auā o ia na te avatu le areto a lou Atua; e pa‘ia lava o ia ‘iā te oe; auā o a‘u o le ALI‘I, o lē fa‘apa‘iaina ‘outou, e pa‘ia lava a‘u.
9 O le afafine fo‘i o se ositaulaga, ‘āfai na te fa‘aleaga o ia ‘iā te ia i lona talitane, ‘ua fa‘aleaga o ia i lona tamā; e susunuina lava o ia i le afi.
10 A o le ositaulaga sili i ona uso, sa liligi i lona ulu le u‘u e fa‘au‘uina ai ma ‘ua tofia o ia e ‘ofu i ‘ofu, na te lē tōina lona pulou, pe saei ona ‘ofu.
11 ‘Aua fo‘i le ulufale atu o ia i se tagata oti, ‘aua ne‘i leaga o ia ‘iā te ia ‘ona o lona tamā, po o lona tinā;
12 ‘aua fo‘i le ulufafo atu o ia i le malumalu, pe leaga ‘iā te ia le malumalu o lona Atua; auā ‘ua i luga ‘iā te ia le pale o le u‘u o lona Atua e fa‘au‘uina ai; o a‘u o le ALI‘I.
13 O se taupou lava e fai avā ai o ia.
14 O se fafine ‘ua oti lana tane, po o se fafine ‘ua fa‘ate‘a e lana tane, po o se fafine faita‘aga, po o se fafine talitane, o fafine ia ‘aua le fai avā ai o ia; a o le taupou o lona lava nu‘u e fai avā ai o ia.
15 ‘Aua ne‘i leaga ‘iā te, ia lona gafa i lona nu‘u; auā o a‘u o le ALI‘I, ‘ua ‘ou fa‘apa‘iaina o ia.
16 ‘Ua fetalai mai fo‘i le ALI‘I ‘iā Mose ‘ua fa‘apea mai:
17 ‘Ia e fai atu ‘iā Arona, ia fa‘apea atu: ‘Ai se tagata o lau fānau i o latou tupulaga amulī ‘ua i ai se pona, ‘aua ne‘i fa‘alatalata atu o ia e avatu le areto a lona Atua.
18 Auā o se tagata ‘ua i ai se pona, ‘aua le fa‘alatalata lava o ia; o le tauaso, po o le pipili, po o le isu papa, po o le ‘ua i ai se mea fa‘alēgatusa,
19 po o se tagata ‘ua gau le vae, po ‘ua gau le lima,
20 po o sē ‘ua tua pi‘o, po o sē ‘ua fa‘atinotinoa, po o se tagata ‘ua i ai le moalili i lona mata, po o sē ‘ua ma‘i pa‘upa‘ua, po o sē ‘ua ma‘i mageso po‘upo‘ua, po o sē ‘ua momomo sona fuāmanava.
21 ‘Aua ne‘i fa‘alatalata se tagata o le fānau a Arona le ositaulaga ‘ua i ai se pona e avatu taulaga e fai i le afi i le ALI‘I; ‘ua ‘iā te ia le mea e ponā ai, ‘aua ne‘i fa‘alatalata atu o ia e avatu le areto a lona Atua.
22 E ‘ai lava e ia le areto a lona Atua, o mea e sili ‘ona pa‘ia ‘atoa ma mea pa‘ia.
23 ‘Ae lē alu o ia i tala atu o le ‘ie puipui, pe fa‘alatalata, i le fatafaitaulaga, auā ‘ua ‘iā te ia le mea e ponā ai; ‘ina ne‘i leaga ‘iā te ia a‘u mea pa‘ia; auā o a‘u o le ALI‘I, ‘ua ‘ou fa‘apa‘iaina ia mea.
24 ‘Ua fai atu ai Mose ‘iā Arona ma ona atali‘i, ‘atoa ma le fānauga uma a Isaraelu.