1 ‘Ua fetalai mai fo‘i le ALI‘I ‘iā Mose, ‘ua fa‘apea mai:
2 ‘Inā fai atu ia i le fānauga a Isaraelu, latou te ‘aumai ‘iā te oe le suāu‘u olive lelei e tu‘ia mo le afi, e mū ai pea le lamepa.
3 ‘Ia sauni lea e Arona, e amata i le afiafi e o‘o lava i le taeao, i le itū mai o le ‘ie puipui o le ‘atola‘au o le tulafono i le fale fetāfa‘i o le fa‘apotopotoga i luma o le ALI‘I, i aso uma lava; o le tulafono e fa‘avavau i o ‘outou tupulaga amulī.
4 Na te saunia lamepa o i luga o tu‘ugālamepa auro lelei i aso uma lava i luma o le ALI‘I.
5 ‘Ia e ‘ave fo‘i falaoa lelei ma tao ai ni pōtoi e sefulu ma le lua; ta‘ilua omera i le pōtoi e tasi.
6 ‘Ia e tu‘uina ai fo‘i i atu pōtoi e lua, ia ta‘iono i atu, i luga o le la‘o‘ai auro lelei i luma o le ALI‘I.
7 ‘Ia e tu‘uina fo‘i le pulu lipano lelei i luga o atu pōtoi, ‘ia i ai lava i luga o areto e fai ma fa‘amanatuga, o le taulaga e fai i le afi i le ALI‘I.
8 Na te saunia e lē aunoa i luma o le ALI‘I i lea aso sapati ma lea aso sapati, e ‘aumai e le fānauga a Isaraelu, o le feagaiga e fa‘avavau.
9 E fai ma Arona, ma ona atali‘i, latou te ‘a‘ai ai i le mea pa‘ia; auā e sili ‘ona pa‘ia lea ‘iā te ia i taulaga i le ALI‘I e fai i le afi, o le tulafono lea e fa‘avavau.
10 O le tama a le fafine o Isaraelu, a o le Aikupito lona tamā na latou ō mai ma le fānauga a Isaraelu; ‘ua la femisa‘i o lenei tama a le fafine Isaraelu ma le tagata o Isaraelu i le toagalauapi;
11 ‘ona fāifai lea e le tama a le fafine Isaraelu i le suafa o le ALI‘I, ma ‘upu leaga i ai ‘ona latou ‘aumaia lea o ia ‘iā Mose. O le igoa fo‘i o lona tinā o Salome, o le afafine o Tiperi o le itū‘āiga o Tanu;
12 na latou tu‘uina atu o ia ‘ia leoleoina, se‘ia fa‘aalia mai ‘iā i latou le finagalo o le ALI‘I.
13 ‘Ona fetalai mai ai lea o le ALI‘I ‘iā Mose, ‘ua fa‘apea mai:
14 ‘Ia ‘outou ‘ave i lē na ‘upu leaga i tua o le toagalauapi, ma ia fa‘ae‘e e i latou uma e na fa‘alogologo i ai o latou lima i lona ulu, ma ‘ia fetogi ‘iā te ia i ma‘a o le fa‘apotopotoga uma.
15 ‘Ia e fai atu fo‘i i le fānauga a Isaraelu, ia fa‘apea atu: ‘Ai sē ‘upu leaga i lona Atua e nofo sala lava o ia.
16 O lē na te fāifai i le suafa o le ALI‘I, e fasiotia lava o ia, e fetogi lava ‘iā te ia i ma‘a e le fa‘apotopotoga uma; o le tagata ‘ese ‘atoa ma le tama a le ‘ele‘ele pe a fāifai o ia i le suafa o le ALI‘I, e fasiotia lava o ia.
17 ‘Ai sē fasioti fo‘i i le tasi tagata e fasiotia lava o ia.
18 O sē fasimate i se manu e totogi e ia; o le manu e sui a‘i le manu.
19 ‘Āfai fo‘i e faia e se tasi se mea e leaga ai le tino o le tasi; e fa‘apei ‘ona ia faia, e fa‘apea lava ‘ona faia ‘iā te ia;
20 e suia le manu‘a i le manu‘a, e suia le mata i le mata, e suia le nifo i le nifo; e pei o le leaga ‘ua faia e ia i le tasi tagata, e fa‘apea lava ‘ona faia ‘iā te ia.
21 ‘Ai sē fasimate i le manu e avatu e ia le totogi; ‘ai sē fasioti i le tagata e fasiotia lava o ia.
22 E tasi lava le tulafono ‘iā te ‘outou e tusa lava le tagata ‘ese ma le tama a le ‘ele‘ele; auā o a‘u o le ALI‘I lo ‘outou Atua.
23 ‘Ona fai atu lea o Mose i le fānauga a Isaraelu, ‘ia latou ‘ave i lē na ‘upu leaga i tua o le toagalauapi, ma fetogi ‘iā te ia i ma‘a; ‘ona fai ai lea e le fānauga a Isaraelu e pei ‘ona poloa‘i mai ai o le ALI‘I ‘iā Mose.#