6 O le tagata fo‘i e liliu ane i ē o i ai aitu vavalo, ma ē taulāitu, e mulimuli atu i ai e mulilulua ai, ‘ou te faia mo‘u fili lea tagata, ‘ou te vavae‘eseina fo‘i o ia i lona nu‘u.
7 O lea ia fa‘apa‘iaina ai ‘outou e ‘outou, ma ia pa‘ia lava ‘outou; auā o a‘u o le ALI‘I lo ‘outou Atua.
8 Ma ‘ia ‘outou tausiusi i a‘u tulafono, ma ‘ia ‘outou faia; o a‘u o le ALI‘I o lē fa‘apa‘iaina ‘outou.
9 ‘Ai se tasi na te fetu‘u i lona tamā po o lona tinā e fasiotia lava o ia ‘ua ia fetu‘u i lona tamā po o lona tinā; e ‘iā te ia lava lona toto.
10 O le tagata fo‘i ‘ua la mulilua ma le avā a le tasi tagata, o lē ‘ua mulilua ma le avā a le la te tuā‘oi, o le tane mulilua ma le fafine mulilua, e fasiotia lava i lā‘ua.
11 O le tagata fo‘i la te momoe ma le avā a lona tamā, ‘ua fa‘atelenoa e ia i lona tamā; e fasiotia lava i lā‘ua; e ‘iā te i lā‘ua o la toto.
12 ‘Āfai fo‘i e momoe se tagata ma le avā a lona atali‘i, e fasiotia lava i lā‘ua; ‘ua la faia le mea matuā leaga lava; e ‘iā te i lā‘ua o la toto.