18 ‘Inā fai atu ‘iā Arona, ma ona atali‘i, ‘atoa ma le fānauga uma a Isaraelu, ‘ia fa‘apea atu ‘iā i latou: ‘Ai se tagata o le ‘āiga o Isaraelu, po o se tagata ‘ese e i Isaraelu ‘ua fia avatu sana taulaga i mea uma na ia tautō ai, ma mea uma e fai fua i le loto i mea latou te faitaulaga ai i le ALI‘I e fai ma taulaga mū;
19 tou te faia ma le loto i ai o se manu po‘a e sao ‘ona lelei, o se povi, po o se mamoe, po o se ‘oti.
20 ‘Ai se manu ‘ua i ai se mea leaga, ‘aua tou te avatu ai; auā e lē talia lea mo ‘outou.
21 ‘Ai sē avatu se taulaga fa‘afetai i le ALI‘I, e fa‘ataunu‘u ai le mea na ia tautō ai, po o le taulaga na te faia fua, i lona loto, po o se povi, po o se mamoe, ‘ia sao ‘ona lelei, ‘ina ‘ia talia; ‘aua ne‘i i ai se mea e tasi e ponā ai.
22 O se mea ‘ua tauaso, po ‘ua gau se vae, po ‘ua mutu, po ‘ua i ai se papala, po o se ma‘i pa‘upa‘ua, po o se ma‘i mageso ‘ua po‘upo‘ua, ‘aua tou te avatu mea ia i le ALI‘I, ‘aua fo‘i tou te fai a‘i taulaga e fai i le afi i luga o le fatafaitaulaga i le ALI‘I.
23 O se povi, po o se tama‘i mamoe ‘ua i ai se mea fa‘alēgatusa, po ‘ua avilu, faitalia lava oe ‘ona fai taulaga ai e fai ma taulaga ‘ua e loto lava ‘ona fai, ‘ae lē talia lava lea i le mea na e tautō ai.
24 ‘Aua tou te avatu i le ALI‘I se manu ‘ua tu‘itu‘ia, po ‘ua momomo, po ‘ua ‘omia, po ‘ua seleseleina ona fua manava; tou te lē faia fo‘i lea i lo ‘outou nu‘u.