1 Bona, le wona mahlo a ka a bone taba tseo kaofela, tsebe tsa ka di di utlwile, mme di di etse hloko.
2 Seo le se tsebang ke a se tseba le nna, ha ke monyenyane ho lona.
3 Empa nka rata ho bua le Ya matla wohle, nka lakatsa ho kena tsekong le Modimo;
4 hobane lona, le balohi ba mashano, kaofela ha lona le dingaka tse se nang molemo.
5 Hoja la na la kgutsa, ho bo ho tla thwe: le bohlale.
6 Mamelang hle phetolo ya ka, molomong wa ka le utlwe ditaba tseo ke ikemelang ka tsona.
7 Na le rata ho bua leshano bakeng sa Modimo na? Na le ka bua tse thetsang sebakeng sa wona na?
8 Na le o emela feela na? Kapa le rata ho ipea babuelli ba Modimo na?
9 Na le ka rata hore o le botsisise hohle na? Kapa le ka o thetsa jwalokaha ho thetswa batho na?
10 Kannete, o tla le kgalemela, ha le ka ahlola ka tshobotsi sephiring sa lona.
11 Boholo ba wona bo tla le tshosa, letsoso la wona le le tshware.
12 Mantswe a eletsang a lona ke dithole feela. Qhobosheane tsa lona ke diqhobosheane tsa mobu.
13 Kgutsang, le ntese ke bue; nke ke hlahelwe ke seo nka hlahelwang ke sona.
14 Ke thusang, leha nka tshwara nama ya ka ka meno a ka, ka fuparela moya wa ka letsohong la ka?
15 Bonang, o ka mpolaya, ha ho sa le kamoo nka tshepang kateng. Ke mpa ke rata ho hlahisa mekgwa ya ka pela wona;
16 ke hona ho tla ba poloko ho nna; hobane moikaketsi a ke ke a itlhahisa pela wona.
17 Elang hloko, le mamele polelo tsa ka, mme ditaba tsa ka di kene ditsebeng tsa lona.
18 Bonang, ke hlomahantse taba ya ka, ke tseba hobane ke tla bewa ya lokileng.
19 O kae ya ratang ho tsekisana le nna? Ha ho se jwalo nka kgutsa, ka shwa.
20 Feela, o ntshitse ka ntho tse pedi, etlaba ke moo nke keng ka pata sefahleho sa ka pela hao.
21 O honyetse letsoho la hao hole le nna, mme o se ke wa ntshosa ka letsoso la hao.
22 O bitse, mme ke tla araba, kapa ho bue nna, mme wena o nkarabe.
23 Makgopo a ka le dibe tsa ka di kae na? O ntsebise tshito ya ka le molato wa ka.
24 O patelang sefahleho sa hao? O ntadimelang jwaloka eka ke sera ho wena?
25 Na o rata ho roba lehlaku le fefolwang, leha e le ho phallela mooko o omeletseng na?
26 Ke kang ha o mpeetse ntho tse babang, leha o nkotlela makgopo a botjha ba ka?
27 Ho ya kang ha o tshwasitse maoto a ka ka difate, leha e le ho hlwela dika tsa ka kaofela le ho dikadiketsa bohato ba maoto a ka;
28 athe ke pherehlana jwaloka ntho e jelweng ke diboko, jwaloka kobo e jewang ke tshwele?