1 Jobo a fetola, a re:
2 Le tla nne le hlokofatse moya wa ka, le ho nthuhakanya ka dipolelo tsa lona ho isa kae?
3 Le se le nkentse motho e mobe ha leshome; ha le na dihlong tsa ho nnyefola!
4 Ha ekaba ke nnete ha ke kgelohile, molato oo ke taba ya ka.
5 Ha le fela le ikgodisa ka nna, mme le dihela ho nna molato wa dihlong tseo ke dutseng ho tsona,
6 le utlwisise hoba ke Modimo o mphallelang, o ntiketse sefing sa wona.
7 Bonang, le dumaduma hodima bothata boo ke bo etswang, empa ha ke bone karabo; ke howa ka matla, empa ha ho ya nkahlolelang.
8 O thibile mmila wa ka hore ke se ke ka feta, mme tseleng ya ka o beile lefifi.
9 O ntlhobodisitse kganya ya ka, o rotse moqhaka hloohong ya ka.
10 O ntshentse ka nqa tsohle, mme ke fedile; o epolotse tshepo ya ka jwaloka sefate.
11 Kgalefo ya wona e tukile hodima ka, o ntadimile jwaloka sera sa wona.
12 Makgotla a wona a futuhetse nna, a iphunyeditse tsela ho tla ntshwara, a hlomile a teetse tente ya ka hare.
13 O suthiseditse banabeso hole le nna, bao ke tsebanang le bona ba ikentse basele ho nna.
14 Baheso ba itulela thoko, bao e neng e le metswalle ya ka ba ntebetse.
15 Bahlanka ba ka le makgabunyane a ka ba ntadima jwaloka hoja ke osele; ho bona ke ya sa tsejweng.
16 Ke bitsa mohlanka wa ka, ha a arabe, leha ke mo rapela ka molomo wa ka.
17 Phefumoloho ya ka e nkga ho mosadi wa ka, le monko wa ka o mobe ho bara ba mme.
18 Esita le bana ba nnyedisa le bona; ha ke re ke a tsoha, ba bua hodima ka.
19 Ke tshabeha ho bao ke kunutang le bona, bao ke neng ke ba rata ba fetohile dira ho nna.
20 Masapo a ka a kgomaretse letlalo la ka le dinama tsa ka, ke phonyohile ka thata ka letlalo la meno a ka.
21 Nkgauheleng, nkgauheleng, lona metswalle ya ka, hobane letsoho la Modimo ke lona le nkotlileng.
22 Na le ntlhorisetsang jwaloka Modimo? Ha le kgolwe keng ka nama ya ka?
23 Hola mantswe a ka a ka ngolwa jwale! Hola a ka ngolwa bukeng!
24 A ke a ngolwe ka tshepe e betlang le ka loto lefikeng ka ho sa feleng.
25 Empa ke a tseba hobane Molopolli wa ka o a phela, le hobane qetellong o tla ema lefatsheng.
26 Mme leha letlalo la ka le senyehile, ke tla bona Modimo ke se ke se nameng.
27 Ke tla o bona e le moemedi wa ka; ke tla o bona ka mahlo a ka, e seng ka a e mong. Pelo ya ka e hlolohetswe hoo fubeng sa ka.
28 Mohlang oo, le tla be le re: Na re ne re mo hlorisetsang? athe le tla bona nyewe ya ka ha e emelwa.
29 Itshabiseng lerumo ke hona, hobane bolotsana ke sebe se loketseng lerumo, mme le tsebe hoba kahlolo e teng.