1 Howa jwale! Na e mong o teng ya tla o arabela na? Ke ofe wa bahalaledi eo o tla retelehela ho yena?
2 Athe bohale bo bolaya lehlanya, mme lewatla le bolawa ke mona.
3 Nna ke bone lewatla ha le medile metso, empa hang ka tshwanela ho neela ntlo ya lona thohako;
4 bana ba lona ha ba sa na boiketlo, ba hatakelwa dikgorong, ho se ya ba namolelang.
5 Ya lapileng o ya ja kotulo ya lona, o ya nka le hara meutlwa, mme leshodu le hlwibila menono ya lona.
6 Efela kotsi ha e tswe fatshe, mme mahlomola ha a hlomele mobung;
7 motho o tswaletswe maswabi, jwaloka hlase ho qhoma.
8 Hola e le nna, nka be ke ikatametsa ho Modimo, ka beela Modimo taba ya ka;
9 e leng wona o etsang dintho tse kgolo, tse sa fihlelweng, dintho tse makatsang, tse sa balweng.
10 O tshollela pula lefatsheng, o mathisa metsi masimong;
11 o dudisa batho ba kokobetseng nqalong tse diphahameng, ba llang ba phahamisetswa katlehong.
12 O etsa merero ya batho ba mano lefeela, hore matsoho a bona a se ke a e phetha.
13 O tshwasa diqweleqwele manong a tsona, mme morero wa ba lonya o a o heletsa.
14 Hosasa, ba thulana le lefifi, motshehare ba phopholetsa jwaloka hoja ke bosiu.
15 Ya madimabe o mo lokolla jwalo lerumong la melomo ya bona le letsohong la ya matla;
16 tshepo e teng ho ya fokotseng, mme ba sa lokang ba thijwa molomo.
17 Bona, ho lehlohonolo motho eo Modimo o mo layang! Ha ho le jwalo, o se ke wa nyatsa kotlo ya Ya matla wohle;
18 hobane o a hlaba, mme a tlamelle leqeba; o a roba, mme matsoho a hae a fodise.
19 O tla o lokolla ditsietsing tse tsheletseng, mme ho tse supileng ha ho bobe bo ka o amang.
20 Tlaleng o ya o boloka, o se ke wa shwa, ntweng a o pholose bohaleng ba lerumo.
21 O tla sireletswa ha ho shapa leleme, ha o ka ke wa tshaba tshenyo ha e ka fihla.
22 O tla tsheha tshenyo le tlala, ha o ka ke wa tshaba dibatana tsa naha;
23 hobane o tla ba le selekane le majwe a naha, dibatana tsa naha di be le kgotso le wena.
24 Kahona o tla bona hoba tente ya hao e dutse ka kgotso, mme leha o ka lekola moaho wa hao, o ke ke wa hloka letho.
25 Hape, o tla bona lesika la hao ha le ngatafala, le ditloholo tsa hao ha di ata jwaloka jwang ba naha.
26 O tla orohela lebitleng la hao ka botsofadi bo botala, jwaloka ngata ya koro, ha e thothwa nakong ya teng.
27 Bona, ke tseo re di botsisitseng; di dutse jwalo; o di mamele, o di ele sedi.