1 Yaba Jobo o arabela Jehova, a re:
2 Ke a tseba hobane ha o sitwe ke letho, le hoba ha ho morero oo o ke keng wa o phetha.
3 Ke haele mang ya ka fifatsang merero ya hao ka dipolelo tse se nang kelello? Ke fela ke buile, ke se na kutlwisiso, ke boletse mehlolo e mphetang, eo ke sa e utlwisiseng.
4 Oho! o mmamele jwale, mme ke tla bua! Ke tla o botsa, mme o tla nthuta.
5 Ke ne ke utlwile tsa hao ka ditsebe feela; empa jwale, mahlo a ka a o bone.
6 Ke fela ke inyatsa, mme ke iteta sefuba ke le leroleng le moloreng.
7 Eitse hobane Jehova a bue dipolelo tseo ho Jobo, Jehova a re ho Elifase wa Themane: Bohale ba ka bo tuketse wena le metswalle ya hao e mmedi, hobane ha le a ka la bolela tsa ka hantle, jwalokaha ho entse Jobo, mohlanka wa ka.
8 Ka baka leo, ntshang jwale dipoho tse supileng, le dipheleu tse supileng, le ikele ho mohlanka wa ka, Jobo, le hlahise setjheso bakeng sa lona, mme Jobo, mohlanka wa ka, a ke a le rapelle; ke ka baka la hae a nnotshi nke keng ka le otla ka baka la bowatla ba lona; hobane ha le a ka la bolela tsa ka ka ho loka, jwaloka mohlanka wa ka, Jobo.
9 Yaba Elifase wa Themane, le Bildade wa Shua, le Tsofare wa Naama, ba ya, ba etsa jwalokaha Jehova a ba boleletse; mme Jehova a mamela thapello ya Jobo.
10 Mme Jehova a ntsha Jobo ditlamong tsa hae, ha a se a rapeletse metswalle ya hae; mme Jehova a mo atisetsa habedi tseo a neng a ena le tsona pele.
11 Yaba banababo bohle, le dikgaitsedi tsa hae kaofela, le bohle bao a neng a tsebana le bona pele, ba tla ho yena, ba ja le yena ka tlung ya hae, ba hlakola meokgo ya hae, ba mo tshedisa hodima bohloko bohle boo Jehova a neng a bo tlisitse hodima hae; e mong le e mong a mo nea sekoto sa silefera le lesale la kgauta.
12 Mme Jehova a hlohonolofatsa qetello ya Jobo ho fetisa qalo ya hae; a rua dinku tse dikete tse leshome le metso e mene, le dikamele tse dikete tse tsheletseng, le dipholo tse lekaneng dijoko tse sekete, le diesele tse sekete tse tshehadi.
13 A ba le bara ba supileng le baradi ba bararo;
14 mme wa pele a mo rea lebitso la Jemima, wa bobedi la Ketsia, wa boraro la Keren-Appuke.
15 Mme ho ne ho sa fumanwe naheng yohle basadi ba leng batle jwaloka baradi ba Jobo; mme ntata bona a ba arolela lefa hara dikgaitsedi tsa bona.
16 Kamora moo, Jobo a nna a phela dilemo tse lekgolo le nang le mashome a mane; mme a bona bara ba hae, le bara ba bara ba hae, ho isa molokong wa bone.
17 Mme Jobo a shwa, a tsofetse, a atetswe ke matsatsi.