1 Na o ka tshwasa Leviathane (kwena) ka selope le ho tshwasa leleme la yona ka kgole na?
2 O ka kenya mohala dinkong tsa yona, le ho e phunya lehlaya ho kenya lesale na?
3 Na e tla o rapela haholo, kapa e bue le wena ka lentswe la ho o qeka na?
4 Na e tla itlama ho wena hore e tla o sebeletsa kamehla na?
5 Na o tla ya bapala le yona jwalokaha o ka etsa le nonyana, o e holehe ho bapadisa banana ba hao na?
6 Na e balwa kgwebong ke batshwasi ba dihlapi, kapa na ba ka e arolela bareki na?
7 Na o ka hlaba letlalo la yona ka dikwebe, le hlooho ya yona ka ditsenene?
8 Leka hle ho bea letsoho la hao hodima yona! ha o sa tla hlola o e qala.
9 Ha ho kamoo o ka tshepang kateng ho e hlola; ere o qala ho e bona, o ya fela pelo.
10 Ha ho mohale ya ka betang pelo ho ya e tsosa. Ha ho le jwalo, ke mang ya ka emang pela ka na?
11 Ke mang eo ke nang le molato wa hae, ke tle ke tshwanele ho mo lefela? Tsohle tse katlasa lehodimo kaofela ke tsa ka.
12 Nke ke ka kgutsa kamoo ditho tsa yona di bopehileng kateng, le matla a yona, le botle ba sebopeho sa yona.
13 Ke mang ya ka karapang makgapetla a yona? Ke mang ya ka kenang hara mehlahare ya yona?
14 Ke mang ya ka bulang menyako ya ditlena tsa yona? Mela ya meno a yona e a tshabeha.
15 Mokokotlo wa yona o apesitswe ka thebe ya dikgetla tse tiisitsweng hammoho.
16 Di kopane hammoho, esita le moya o ke ke wa kena dipakeng tsa tsona;
17 di kgomarelane, di momahane, di ke se ke tsa arolwa.
18 Ho ethimola ha yona ho hlahisa ngata ya lesedi, mahlo a yona a jwaloka dintshi tsa mafube.
19 Dirumula di tswa molomong wa yona, le dihlase tsa mollo tse kubellang.
20 Mosi o tswa dinkong tsa yona jwaloka sesi se tswang nkgong le pitseng e belang.
21 Pudulo ya yona e tshwana le mashala a hlenneng, malakabe a tswa ditleneng tsa yona.
22 Matla a ikgaheletse molaleng wa yona, tshoho e tsamaya pela yona.
23 Mesifa ya yona e kopane hammoho, e tiile, ha e sisinyehe.
24 Pelo ya yona e thata jwaloka lejwe, jwaloka letlapa la lelwala.
25 Ha e ka tsoha, bahale ba tshoha, mme ba thethelwa ke ho tshaba.
26 Ha o ka e hlatha, tjhaka ha e kene; ha e re letho ka tsenene le lerumo le kwebe.
27 Ho yona tshepe e jwaloka jwang, le koporo jwaloka patsi e bodileng.
28 Motsu o phoswang ha o e balehise, majwe a betswang ka letjeketjane a jwaloka mooko ho yona.
29 Melamu ho yona e ka mahlokwa feela; e tsheha modumo wa marumo.
30 Mpa ya yona e mangeta a thata; e ka selei se hulwang seretseng.
31 E tsapodisa bodiba jwaloka pitsa e belang, e bedisa lewatle jwaloka pitsa ya dihlare.
32 Tsela ya yona e benya mehlaleng ya yona, ho le jwaloka hoja lewatle e le moriri o moputswa.
33 Ha ho letho le lekanang le yona lefatsheng, e entswe e le e hlokang tshabo.
34 Ha e tshabe ho tadima tsa phahameng kaofela, ke morena wa dibatana kaofela.