1 Elihu a boela a ntshetsa ditaba pele, a re:
2 Ako mpehele pelo hanyenyane, ke tle ke o lemose, hobane ke sa na le seo nka buellang Modimo ka sona.
3 Ke tla lata tsebo ya ka hole, ke tle ke bontshe ho loka ha Mmopi wa ka.
4 Hobane ruri dipolelo tsa ka e ke ke ya eba tsa leshano: pela hao ho eme ya phethehileng tsebong.
5 Bona, Modimo o matla, empa ha o nyedise motho; o moholo ka matla a kutlwisiso ya wona.
6 Ha o boloke bophelo ba molotsana; o ahlolela ba tujwang.
7 Ha o furalle ba lokileng, empa o ba bea le marena teroneng; o ba dudisa teng kamehla, hore ba phahamiswe.
8 Empa ha ba holehilwe ka mahlaahlela, ba tlamilwe ka dikgole tsa hlokofatso,
9 ke moo Modimo o ratang ho ba senolela diketso tsa bona le ditlolo tsa boikgohomoso ba bona;
10 ke moo o thibollang ditsebe tsa bona hore di mamele tayo, mme o ba laelang ho tela bobe.
11 Ha ba ka utlwa, mme ba o dumela, ba tla qetella bophelo ba bona lehlohonolong, le dilemo tsa bona thabong;
12 empa ha ba sa utlwe, ba tla hlajwa ke lerumo, ba timele ke ho hloka kutlwisiso.
13 Ba pelo tse ikakasang ba ipokellela bohale; ha ba rapele ha Modimo o ba tlama.
14 Ba shwa ba sa le batjha; bophelo ba bona bo tshwana le ba dihlola.
15 Empa o lokolla ba hloriswang matswalong a bona, o ba eletsa ka mahlomola.
16 O tla o lokolla jwalo dinaleng tsa matshwenyeho, ho o bea sebakeng, moo o ke keng wa patiswa; dijo tse hlabosang di tla bewa tafoleng ya hao.
17 Empa ha o ka tlala kgopolo ya molotsana, kotlo e tla latelana le kahlolo.
18 Empa bohale ba hao bo se ke ba o isa nyefolong, mme boholo ba tefo eo o ka e ntshang bo se ke ba o kgelosa.
19 Leruo la hao na le ka o ntsha tsietsing na, leha e le matla wohle ao o ka etsang ka wona na?
20 O se ke wa lakatsa bosiu bo tlang ho tlosa batho ditulong tsa bona.
21 O itise, o se ke wa sekamela bobeng, hobane etlaba o bo rata ho fetisa mahlomola.
22 Bona, Modimo o phahamile ka matla a wona; na moruti o teng ya kang wona?
23 Ke mang ya ka o rutang tsela ya wona?
24 Ke mang ya ka reng ho wona: O etsa hampe? O se ke wa lebala ho hodisa mesebetsi ya wona e roriswang ke batho ka dithoko.
25 E bohuwa ke batho kaofela, ba e tadimela hole!
26 Bona, Modimo o moholo, re ke ke ra o tsebisisa, bokae ba dilemo tsa wona bo ke ke ba fumanwa.
27 O hula marothodi a metsi, mohodi oo o o bopang ka wona o hlotlha dipula
28 tse tshelwang ke maru, o di nesetsa hodima batho ka medupe.
29 Ke mang ya utlwisisang ho otlana ha maru, le modumo oo tente ya wona e dumang ka wona?
30 Bona kamoo o hasang lesedi kateng pela wona, kamoo o ikwahelang ka botebo ba lewatle kateng.
31 Ke tseo o otlang batho ka tsona; ke tseo o hlahisang nala ka tsona.
32 O nkile letolo matsohong a wona, o le laela ho otla bakgopo.
33 Modumo wa wona o a o utlwahatsa, esita le diphoofolo di a o utlwa, ha o atamela.