1 Jobo a eketsa a isa polelo ya bohlale ya hae, a re:
2 Hola nka boela ka bona kgwedi tse jwaloka tsa mohla monene, le ditshiu tsa mohla Modimo o neng o mpoloka!
3 Mehleng eo, lebone la wona le ne le kganyetsa hlooho ya ka; ka lesedi la wona ke ne ke tseba ho tsamaya hara lefifi.
4 Hola nka boela ka ba jwaloka matsatsing a nala ya ka, ha Modimo o ne o dula tenteng ya ka jwaloka motswalle;
5 ha Ya matla wohle a ne a na le nna, mme bana ba ka ba nteetse hare;
6 ha maoto a ka a ne a hlatsweha lebeseng, mme lefika le ne le ntswela melatswana ya ole.
7 Enere ha ke tswela kgorong ya motse, ke ne ke bea setulo sa ka lebaleng la yona;
8 ha ke atamela, ba batjha ba ne ba ntshuthela, ba hodileng ba ne ba raoha, ba ema;
9 mahosana a ne a lesa ho bua, a bea matsoho melomong ya wona;
10 lentswe la baeletsi le ne le kgutsa, leleme la bona le ne le kgomarela mahalapa a bona;
11 tsebe e neng e nkutlwa, e ne e re ke lehlohonolo; leihlo le neng le mpona, le ne le nthorisa.
12 Ke hobane ke ne ke lwela mosenyehi, ha a kopa thuso, le kgutsana e hlokileng mothusi;
13 ke ne ke hlohonolofatswa ke ya neng a le lekgatheng la ho timela, ka kenya thabo pelong ya mosadi wa mohlolohadi;
14 ke ne ke ikapesa ka ho loka, mme ho ne ho nkwahela; toka e ne e le kobo ya ka le moqhaka wa ka;
15 ke ne ke le mahlo a sefofu; maoto a sehlotsa e ne e le nna;
16 ke ne ke le ntata mofutsana, ke ne ke botsisisa taba ya motho leha ke sa mo tsebe;
17 ke ne ke roba meno a ya bolotsana, ke ne ke hlwibila thusolelo menong a hae.
18 Ke ne ke lekanya, ke re: Ke tla shwa ditaong tsa ka, ke tla atisa matsatsi a ka jwaloka lehlabathe;
19 motso wa ka o tla namela pela metsi, phoka e hlole bosiu makaleng a ka;
20 kganya ya ka e tla ntjhafala kamehla, seqha sa ka se matlafale letsohong la ka.
21 Ba ne ba sekeha tsebe ho nna, ba lebeletse, ba ne ba kgutsa ha ke eletsa.
22 Ho ne ho se e mong ya fetolang taba tsa ka ha ke se ke buile, ha ditaba tsa ka di rothotha hodima bona;
23 ba ntebella jwalokaha ho lebellwa pula, ba ahlamisa melomo ya bona jwaloka hola ba amohela pula ya lehwetla.
24 Ke ne ke ba tsheha, ha ba tsieleha, ba se ke ba tseba ho tlosa ho ela sefahlehong sa ka.
25 Ka ba kgethela tsela, ka dula sehloohong, ka ba jwaloka morena hara bongata, le jwaloka ya tshedisang ba llang.