1 Ke ne ke hlabe selekane le mahlo a ka, sa hore nke ke ka tadima morwetsana!
2 Hobane ke be nka bona kabelo e jwang hodimo ho Modimo, mme ke be nka bona lefa lefe lehodimong ho Ya matla wohle?
3 Tshenyeho na hase ya mosenyi na? le tahleho na ha ya beelwa ba sebetsang bokgopo na?
4 Na ha o bone ditsela tsa ka na? Na ha o bale mehato ya ka kaofela na?
5 Ha eba nkile ka tsamaya ka leshano, leha eba leoto la ka le phakisitse ho thetsa,
6 (Modimo o ke o ntekanye ka sekala sa ho loka, mme o tla fihlela hoba ha ke na molato)
7 ha ekaba mehato ya ka e kgelohile tsela ya wona, kapa pelo ya ka ha e lateletse takatso ya mahlo a ka, ditshila tsa ba tsa kgomarela matsoho a ka;
8 ha ho ka ba jwalo, nke ke leme, mme e mong a kotule, mahlomela a ka a ke a fotholwe.
9 Ha ekaba pelo ya ka e kile ya thetswa ke mosadi, kapa ha nkile ka lalla monyako wa eo ke ahisaneng le yena,
10 ha ho ka ba jwalo, mosadi wa ka a silele e mong, mme a fejwe ke ba bang;
11 hobane hoo ke sebe se tshabehang, ke bokgopo bo tshwanetseng ho otlwa ke baahlodi.
12 Efela ke mollo o ka tjhang ho isa sehokong, o tshwanetseng ho fothola maruo a ka kaofela.
13 Ha ekaba ke hanne tokelo ya mohlanka wa ka e motona, kapa ya e motshehadi, mohla ba tsekisanang le nna,
14 ke ne ke tla etsa jwang, hoja Modimo o ne o ka tsoha, le hoja o ne o ka batlisisa ditaba, ke be ke tla reng ho wona?
15 Ha ke re, ya mpopileng popelong, le eo o mmopile na? Na hase wona o re entseng popelong ya mosadi na?
16 Ha ekaba ke ne ke hane thapelo ya mofutsana, ka lebellisa mosadi wa mohlolohadi, a ba a khathala mahlo,
17 leha ekaba ke jele bohobe ba ka ke nnotshi, ke sa ka ka bo ngwathela kgutsana;
18 (athe, e sa le botjheng ba ka, o holetse ho nna, ka ba ho yena jwaloka ntatae, mme ke tsamaisitse mosadi wa mohlolohadi haesale ke etswa popelong ya mme)
19 ha ekaba nkile ka bona e mong ya timelang a se na diaparo, kapa mofumanehi ya hlokang seo a ikapesang ka sona,
20 mme matheka a bona a sa ka a ntlhohonolofatsa, mme ba sa ka ba futhumala ka boya ba dikonyana tsa ka;
21 ha ekaba letsoho la ka le kile la otla kgutsana, kahobane ke bone ha ke emetswe ke ba dutseng kgorong;
22 ha ho ka ba jwalo, lehetla la ka a le ke le we makopanong a lona, mme letsoho la ka le we, le robehe.
23 Hobane teng, ditefetso tsa Modimo di ne di tla ntshosa, ke ne ke tla sitwa ho ema pela bophahamo ba wona.
24 Ha ekaba ke entse kgauta tshepo ya ka, ka ba ka re ho kgauta e hlwekileng: Tshepo ya ka e ho wena;
25 ha ekaba ke nyakalletse boholo ba maruo a ka le tse ngata tse bokeletsweng ke matsoho a ka;
26 ha ekaba nkile ka boha letsatsi ha le kganya, kapa kgwedi ha e tsamaya ka kganya ya yona,
27 pelo ya ka ya ba ya thetswa ka sephiring, ka isa letsoho melomong ho le aka;
28 le teng e be e tla ba sebe se tshwanetseng ho otlwa ke baahlodi, hobane ho etsa jwalo ke ho latola Modimo o phahameng.
29 Ha ekaba nkile ka thabela tshenyeho ya eo e neng e le sera ho nna, ka hlasimoloha mohla ditlokotsi di mo welang hodimo;
30 (athe ha ke a ka ka dumella molomo wa ka ho seba, ka ho kopela bophelo ba hae thohako)
31 ha ekaba batho ba ntlo ya ka ba ne ba sa bue, ba re: O kae ya sa kang a kgora dijo tafoleng ya hae?
32 ha eba hase nnete hobane moeti o ne a se na ho hlola bosiu kantle, hobane ke ne ke ntse ke buletse baeti monyako wa ka;
33 ha eba ke apesitse bokgopo ba ka ka mokgwa wa batho, ka pata melato ya ka fubeng sa ka,
34 ka ho tshaba bongata, le kahobane nyatso ya setjhaba e ne e ntshosa, mme ka itholela, ke sa tswele ntle ho monyako wa ka! ...
35 Hola ke na le ya nkutlwang! Bonang, tiiso ya letsoho la ka ke ena! Hola Ya matla wohle a ka mphetola! Hola lengolo le le teng la ya nqosang molato!
36 Nka be ke fela ka le jara ka lehetla la ka, nka ba ke le rwala phatleng jwaloka moqhaka!
37 Ke be ke tla mo phetela metsamao ya ka kaofela, mme jwaloka morena ke ne ke tla mo atamela!
38 Ha ekaba tshimo ya ka e a nqosa, mme ditema tsa yona di lla hammoho;
39 ha ekaba ke jele letshere la yona ke sa ka ka lefa, ka ba ka llisa pelo ya monga yona;
40 teng, ho ke ho mele meutlwa bakeng sa koro, le lehola bakeng sa harese.Dipolelo tsa Jobo di fella moo.