1 Die Here het weer met Moses gepraat:
2 “Jy moet die tent op die nuwejaarsdag, die eerste dag van die eerste maand, oprig. By hierdie tent sal Ek my volk ontmoet.
3 Gaan sit die ark met die bewys van ons ooreenkoms op sy plek in die tent. Hang dan die gordyn voor die ark om dit van die ander deel van die tent af te skerm.
4 Gaan sit ook die tafel op sy plek en rangskik alles wat daarby behoort, rondom hom. Sit ook die ligstaander op sy plek en hang sy lampies op hulle plek aan die staander.
5 Gaan sit die goue altaartjie op sy plek reg voor die gordyn wat voor die ark hang. Hang ook die gordyn by die ingang van die tent op sy plek.
6 Gaan sit die altaar vir die brandoffers buite die tent regoor die ingang na die tent.
7 Sit die koperbak waar die priesters hulle was, tussen die tent en die altaar neer. Maak dit vol water.
8 Sit die linnemure rondom die binnehof op. Hang die gordyn op by die ingang na die binnehof.
9 “Vat dan van die salfolie en gooi daarvan uit oor die tent en alles wat daar binne-in is. Dra die tent en alles wat daar kom aan My op, sodat dit vir My afgesonder kan wees.
10 Gooi ook salfolie oor die brandofferaltaar uit en oor alles wat daarby hoort. Dra die altaar aan My op, sodat dit uitsluitlik aan My gewy kan wees.
11 Wy ook die waskom en sy voetstuk aan My wanneer jy salfolie daaroor gooi.
12 Sê dan vir Aäron en sy seuns om nader te kom na die ingang van die tent van ontmoeting toe. Laat hulle dan hulleself daar met water was.
13 Trek vir Aäron die klere aan wat hy by die tent moet dra. Gooi olie op sy kop uit en stel hom aan in sy werk sodat hy my priester kan wees.
14 Laat sy seuns ook nader kom en hulle spesiale klere aantrek.
15 Gooi op dieselfde manier olie op elkeen van hulle se kop sodat hulle ook my priesters kan wees wat by die tent vir My werk. Wanneer jy hulle vir hulle werk aanstel, sal hulle en hulle nakomelinge vir altyd my priesters wees.”
16 Moses het presies gedoen wat die Here vir hom gesê het.
17 Die tent is aan die begin van die tweede jaar na hulle uit Egipte weg is, op die eerste dag van die jaar, opgeslaan.
18 Moses het die tent opgerig deur eers die voetstukke wat onder die panele kom, in posisie te laat plaas. Die panele is daarop gesit en aan mekaar vasgesluit by die koppelpunte en met die dwarslatte wat deur die ringe kom.
19 Hy het die verskillende lae wat hulle vir die dak gemaak het, bo-oor die panele laat trek met die laag velle heel bo, net soos die Here gesê het hy moet maak.
20 Hy het die plat klippe waarop God sy ooreenkoms geskryf het in die ark gaan sit. Hy het die drastokke van die ark deur die ringe aan die kant daarvan gesteek en die deksel bo-op die ark op sy plek geskuif.
21 Daarna het hy die ark op sy plek laat neersit. Hy het die gordyn opgehang en die ark met die bewys van God se ooreenkoms agter die gordyn toegemaak, soos die Here gesê het.
22 Hy het toe die tafel waarop die brood kom, binne-in die tent teen sy noordelike muur voor die gordyn gaan neersit.
23 Hy het die offerbrood daarop neergesit.
24 Hy het die ligstaander ook daar gaan neersit, regoor die tafel teen die suidelike muur.
25 Hy het die lampies aan die staander vasgesit soos die Here gesê het.
26 Hy het die altaartjie vir die wierook ook in die tent laat sit, reg voor die gordyn wat in die middel hang.
27 Hy het die wierook daarop gesit en dit aan die brand gesteek, soos die Here vir hom gesê het hy moet maak.
28 By die ingang van die tent het hy toe die gordyn opgehang wat die tent toemaak.
29 Hy het die altaar vir die brandoffer reg teenoor die ingang van die tent laat sit sodat hy daarop die brandoffer en die graanoffers kon bring op die manier wat die Here vir hom voorgeskryf het.
30 Hy het die koperbak tussen die altaar en die tent laat sit. Dit is met water volgemaak sodat die werkers van die tent hulle daar kon gaan was.
31 Moses en Aäron en sy seuns het water uit hierdie bak gevat om hulle hande en voete te was.
32 Wanneer hulle op pad was na die tent toe om offers op die altaar te bring, moes hulle eers hulleself daar gaan was. Dit was soos die Here vir Moses gesê het.
33 Laaste het Moses die binnehof rondom die tent en die altaar opgeslaan. Hy het ook die gordyn by die ingang na die binnehof laat hang. So het Moses gedoen wat hy moes.
34 ’n Wolk het afgesak en oor die tent gaan hang. ’n Mens kon voel dat God daar by die tent was.
35 Die wolk en die Here wat daar was, was so geweldig dat Moses nie eens in die tent kon ingaan nie.
36 As die wolk van die tent af oplig, was dit vir die Israeliete die teken om op te pak en verder te gaan.
37 As die wolk oor die tent bly hang het, het hulle op daardie plek gebly totdat die wolk weer opgelig het.
38 Terwyl Israel op pad was na die land wat die Here vir hulle sou gee, het hulle die hele tyd gevoel dat die Here in die tent was. Hulle het dit gesien aan die wolk wat bo die tent gehang het. In die nag was daar ’n bol vuur wat hulle verseker het dat die Here by hulle is.