1 Na a‘u iloa atu fo‘i le tasi agelu malosi ‘ua alu ifo mai le lagi, ‘ua ‘ofu i le ao, ‘ua i lona ulu le nuanua, o ona fofoga fo‘i e pei o le lā, o ona vae fo‘i e pei o poutū afi.
2 ‘Ua i lona lima fo‘i le tusi ta‘ai itiiti ‘ua fofola; ‘ua tu lona vae taumatau i le sami, ma lona vae tauagavale i le fanua.
3 ‘Ua ‘alaga fo‘i ia ma le leo tele, e pei o le leona pe a tagi; ‘ua ‘alaga ia, ‘ona fegānavai mai ai lea o faititili e fitu i o latou lava leo.
4 ‘Ua fegānavai mai faititili e fitu, na fai a a‘u tusia; ‘ona ‘ou fa‘alogo ai lea i le leo mai le lagi, ‘ua fa‘apea mai ‘iā te a‘u, “‘Inā fa‘amaufa‘ailogaina ia o nā mea na fegānavai mai ai o faititili e fitu, ‘aua ne‘i e tusia na mea.”
5 O le agelu fo‘i na iloa e a‘u, ‘ua tu i le sami ma le fanua, ‘ua si‘i a‘e e ia lona lima i le lagi,
6 ma ‘ua tautō i lē o soifua e fa‘avavau fa‘avavau lava, o lē na faia le lagi ma mea o i ai, ma le fanua ma mea o i ai, ma le sami ma mea o i ai. “E lē toe ai ni aso,
7 ‘ae peita‘i a o‘o i ia ona pō o le leo o lona to‘afitu o agelu, pe a ilia e ia le pū, ‘ona taunu‘u ai lea o le mea lilo a le Atua, e pei ‘ona folafolaina mai e ia i ana ‘au‘auna le ‘au perofeta.”
8 O le leo fo‘i na ‘ou fa‘alogo ai mai le lagi, ‘ua toe tautala mai ‘iā te a‘u, ‘ua fa‘apea mai, “Alu ia, ‘inā tago i le tusi ta‘ai itiiti ‘ua fofola, o i le lima o le agelu o lo‘o tu i le sami ma le fanua.”
9 ‘Ona ‘ou alu atu ai lea i le agelu, ma ‘ou fai atu ‘iā te ia, ‘aumai ‘iā te a‘u le tusi ta‘ai itiiti. ‘Ona fa‘apea mai ai lea o ia ‘iā te a‘u, “‘Inā tago ia i ai, ma ē ‘aina; e ‘o‘ona i lou manava, ‘ae suamalie i lou gutu e pei o le meli.”
10 ‘Ona ‘ou tago ai lea i le tusi ta‘ai itiiti nai le lima o le agelu, ma a‘u ‘aina; ‘ona suamalie ai lea i lo‘u gutu e pei o le meli; ‘ua uma ‘ona ‘ou ‘ai ai, ‘ona ‘o‘ona lea i lo‘u manava.
11 ‘Ona fa‘apea mai ai lea o ia ‘iā te a‘u, “E ao ‘ina e toe vavalo i nu‘u, ma atunu‘u, ma gagana ‘ese‘ese, ma tupu e to‘atele.”#